Hosia 7 - Kịrịkẹnị Baịbụl

¹ “Àrị ị̀ya tomoni Izrẹlapụma gwọ mịẹse mịẹmịẹaye pịkịna inia ḅarasọ à nwọ ḍọkị-sịkị-ḍọkị-sịkị àrị ineda ọrịḅịaye anị, inia sitịḅị na ini mịẹmịẹ si ayema na-ẹ. Ini jụmḅọ jụmḅọ inumanumamẹ, ini warị kan mun ḅie ye furu furumẹ, ini nweni-a ḅara ye pọkọ ọkịkịmẹ ateli ogbo.

² Ini pa nemikẹ na ma si-a mịẹmịẹaye mamgba à se ḅiekoromaḅịa; ọkụma inia sima ini kelemamẹ, se àrị ineda ị̀ tọrụsin ẹkẹ àrị ọrịḅụ.”

Tomonima Amanyanaḅọ Odo Ḅie Si Ḅẹrẹ Ḅiamẹ

³ Nyanaḅọ Ḅe nwọ ḅẹmẹ, “Tomoni oḅori se amanyanaḅọ ḅe na oria fịrịnwẹngịapụma na chịẹmamẹ ini ḅọịma ḅia si-a ḅẹrẹmaḅụ.

⁴ Inimgba ḅụọchụa na nyana ḅerenika na apụ-ẹ. Inia ḅụnwọnwọ mị, anị pa fịturu mịẹḅọ ḅe oria anyịma kporoni sin sọ se fịturu mịẹ warị mị pa ọfọrị ọkụ ọfịrịmẹ.

⁵ Amanyanaḅọ ḅe alalị fị ene, ini mịẹmẹ amanyanaḅọ ḅe na oria fịrịtịḅịnị ma na iḅiọkụma iruḅu inia tọrụḅaa se ḅarị mịẹmịẹye nemikẹ.

⁶ Iin, ini ḅọịma ḅia ḅẹrẹ ma fịturu-fọị-ọpọchuku dọkị ọkụ se dọkịmẹ. Ḍin mị ḅiemgba inia ịganị mị ẹrẹrẹmẹ, se dedeḅie laḅịa sịkị anị kọrịpakamẹ.

⁷ “Inia ọfịrị ịganị mị ḅie ini inia ḅie ḅẹrẹtọn apụma ḅaamẹ. Inia amanyanapụma gbọrịḅọ gbọrịḅọ ini nwọ ḅaamẹ, ọkụma ḅarachụa ḅi ḅụ ị̀ tẹkẹḅọ ofori-ẹ.”

Izrẹl Mị Mun Jịn Sẹ Na Ikiasọ Mị Anị Ḅarachụa Ini Pịrị-ẹka

⁸ Nyanaḅọ Ḅe nwọ ḅẹmẹ, “Izrẹlapụma, ma fọị karamaka fịturu okpokpo ini nwọ kịkẹmẹ. Ini kuḅie-se-ini-kelema sẹma ḅụgbanamẹ.

⁹ Se ḅarị nemikẹ na, mị kuḅie-se-jịn-sẹ-ḅụgbana mị, inia kụrọ mị famamẹ. Inia enema àrị kịẹnḅịpị ḅụ sọsam ọkụma anịsọ ini ngịsị nemikẹ.

¹⁰ Izrẹlapụma inia ḅụdekichịẹma mị, anị tụḅụrụ ini dasam. Paka ini pịrị ḅọrọsa ye mamgba-o, Izrẹl mị pa pịkịna ị̀ ḍọkịmaḅokẹ, Ị̀rị̀ Nyanaḅọ, inia Tamụnọ Ḅe.

¹¹ Izrẹl mị anị yenemika elesika tọị-tọịma fuku ọkụ fukuma ḅọrọmẹ; tatarị mị anịa tomonima Ijipt ḅara ḅarachụa ḅimẹ, anịeso ini mangị Asiria damamunmẹ!

¹² Ọkụma àrị ịgbọ finjima ini kunḅịa ini feni ḅaraḅụ fin ḅọrọarịogbo. À fomuḅara se ini pịrịḅịa ini mịẹsa sima gose.

¹³ “Ini anị fasapụ-ẹ! Ini ị̀ wẹrịso se sịsẹ ị̀ dapakasam. Ini kankọsịḅịa. Àrị ini ḍụa-ẹtọnmẹ, ọkụma kombo ḅara anị ini se ị̀ tẹkẹarịye.

¹⁴ Ma ini gbunma ị̀ tẹkẹkẹ, ọkụma anịnakaraka ini inia ḅụ se kiri gbin se oru nemi apụma ḅara mị nwọse oloku owu mẹ. Ini fịayemgbọlụ na iru na gose tẹkẹḅịa sịkị, ini inia ḅụ ma pupu kọsịmamẹ, oruḅẹrẹnemiapụ ma mịẹmịẹ ọkụ mị. Mịna apụma karakarama ḍukoye naaka tomoni-ẹ!

¹⁵ Ị̀rị̀ anị ini ḍikiḍiki pakụmaḅo, pịkị ini mịẹkụrọmaḅọ ḅe-ẹ nwọḅẹ sọ, ini ḅẹrẹḅia ị̀ pịrịmẹ.

¹⁶ Ini pa ị̀ ḅụ ḅụ ḍarịma se ịnyọ nyanaka oru ma ḍọkịmamun-aḅẹ. Kuḅie-se-ḅụgbana-gbẹịnka lubu sime ọkụ anị ini sime ọkụ-ẹ. Inia tịḅịnịma ini opuaye mịẹḅara se ọkwẹịn kọnkọn ẹrẹchị, ini kụrọ fị kọnḅịa, se Ijipt apụma ini ini ḍẹrịḅịa.”