Hosia 6 - Kịrịkẹnị Baịbụl

Tomoni Ma Ḅe Siḅụ-pịkị Mị Karakarakẹ

¹ Tomonima nwọ ḅẹmẹ, “Ó ye wa pịkịma Nyanaḅọ Ḅe damamun! Ó ye se wa lamasam, ọkụma ọ̀ kọkọma wa gwọḅịa; mịna ojuma ye àrị lasam, ọkụma ò ye se mịna ịnọ ma fịnaḅịa, ò ye ẹka?

² Mama ḍin na tẹrẹ-a ḍin na ḅụ ọ̀ mịẹḅịa wa ḅo wa tatarị sime ọkụ sime, se pịkị ọ̀ tọrụkuḅu simeḅịa.

³ Ó ye wa ḅụkụrọma Nyanaḅọ Ḅe nemi. Ene gbarịmaka ḅaraḅụ ḅa-ọkụ, ene sịkị ene gbarịmaka ḅaraḅụ koro kiri sara ọkụ, anị gbarịmaka ḅaraḅụ ọ̀ wa damaḅoḅịa ọkụ-ẹ.”

⁴ Ọkụma Nyanaḅọ Ḅe nwọ ḅẹmẹ, “Izrẹl na Juda na, àrị ómine na chemịẹḅe? Ọ́ nyana ị̀ pịrị ḅẹlẹma mị, dede oḅuto ḅọlọka se-so-ọkụ anị anị so-ọkụ-ẹ; anị otita kịkẹmẹ, anị dede ḅie maịn sosoye mị.

⁵ Anị à gose ị̀ya ịkịankoroapụma fịrịma ómine sẹịnmaye-ẹ ini ị̀ya ḅẹrẹkọn pịkị yesima oku mị se ḅo ọ́ pịrị. Àrị ọ́mịna ḅara ḅiye mị ḅele pịkị ọrụtọnmẹ:

⁶ Ọ́mịna dachịẹka ḅẹlẹma mị, anị à ḅiye-ẹ, ọ́mịna nama agba makẹ. Ị̀ya tomonima ị̀ nemi mị iḅitẹịn dọkịma ḍiepịrịaye agba se ị̀ pịrị mị nẹngịmẹ.

⁷ “Ọkụma ini Adam ama ḅie sọ kirikiri àrị ini na fị ọḅọkụ mị ini kanmẹ.

⁸ Giledị mị anị, si-a tomoni na nweniḅaa apụ na ḅein opu ama-ẹ.

⁹ Agbamịẹ apụma, ini ḅọịma tomoniḅọ koru àrị furuogbo apụ kịkẹmẹ. Ḅọrọ Shẹkẹm mun fịafịaḅụ sime ateli ḅie ini nini kọnkọnmẹ, ini tọrụgbẹịnma mịna si mịẹmịẹaye ma mịẹmẹ!

¹⁰ Izrẹl mị ḅie à ḅalafamaye ọrịsam: ị̀ya tomonima, ini inia ḅụ pụlamasam oru tẹkẹ ḅụ.

¹¹ “Ómine Juda apụma ọkụma, à fomuḅara se ọ́ pịrịḅịa sịkị à nwọ pẹlẹsam, ọ́ mịẹarịye ma gose.