Hosia 3 - Kịrịkẹnị Baịbụl

Hosia Ḅe Na Kuḅie-se-Ḅụgbana-Gbẹịnka Eremeniḅọ Ma Na

¹ Nyanaḅọ Ḅe nwọse ị̀ ḅẹmẹ, “Pịkị mun se oloḅọ na sẹfị arịḅọ ma ḅẹlẹma. Ị́ á ḅẹlẹmaḅịa, Ị̀rị̀ sọ pa Izrẹlapụma ḅẹlẹma àrị ḅara mị, ini pa inia tọrụ ma pịkị oru ma da se fịaye se àrị pịrịmẹ nwọḅẹ sọ.”

² Anịḅụ seleḅa jie-a okpokpo na irumịẹ ịpịamgba opu sọnọma akpa à nwọse á fẹmẹ.

³ À ḍuko á pịrịmẹ na ḅọlọ sịkị á nwọse ị̀ koruḅịa, amanwẹngịka anịkanịka sẹfịka ḅụ; se mị sịkị ḅụ àrị á koruḅịa.

⁴ Mị ḅaraḅụ anị Izrẹlapụma ḅọlọ sịkị se simeḅịa ọkụ-ẹ, amanyanaḅọ ofori ḅụ, anịkanịka tịḅịdapụ nyanaka na, agbamịẹ ofori na anịkanịka osiḅụ-sime ḍụparị-ogbo-chịn na oru na, ini tẹmẹ aye na ofori ḅịa, ini se ḅịrị kọnḅịaye ḅụ.

⁵ Ọkụma sịkị mị ḅoḅịa, Izrẹlapụma pịkịma tọrụ se Nyanaḅọ, inia Tamụnọ Ḅe da pịkị Devid, inia amanyanaḅọ ḅe furo ḅie koroḅo ḅọ ḅe daḅịa. Anịsịkị mị ini Nyanaḅọ Ḅe ḍikiḅalafa se oria iḅi ḅẹlẹma ma ọkịḅịaye-ẹ.