Hosia 14 - Kịrịkẹnị Baịbụl

Hosia Ḅe Izrẹlapụma Tẹkẹaḅẹ Na Ọ́ Nyanaḅọ Ḅe Damaḅo

¹ Ó vinpịkị Nyanaḅọ, ọ́mịna Tamụnọ Ḅe damaḅo Izrẹlapụ, ọ́mịna sima ọ́ mịẹse ọ́ ḅụọ tọmbụlọ se ọ́ ḅịkịsam.

² Ó vinpịkị Nyanaḅọ Ḅe damaḅo, se ye mị tẹkẹ mị ọ́mịna agba nwọsọ ọ̀ pịrị. “Mịna si mamgba ḅụ ḅarasin wa pịrị se mịna tẹkẹ ḅereni ọkị, se wa ị́ bomaḅịa wa ḅerenisa ḅaraḅụ.

³ Asiria mị ineda jenejene wa ḍụa ẹkẹ pịkị owuni asụn ineda wa koko ẹkẹ. Wa ḅarị jenejene pịkị mine mịna ḅara se tẹmẹ oru ma ḅẹ ẹkẹ na àrị ma anị mịna Tamụnọ-ẹ. Yei Nyanaḅọ, ị́rị́ ị́ya ḍikiḅụgerere ḍiepakụma se, tọrụpịkị-daḅịaḅọ-nyanakapụma pịrịpịrịmẹ.”

Nyanaḅọ Ḅe Ịwọ Ḍumo Ḅereni Izrẹl Mị Pịrịmẹ

⁴ Nyanaḅọ Ḅe nwọ ḅẹmẹ, “Àrị ị̀ya tomonima pịkịma ị̀ damaḅoḅịa. Àrị ị̀ kuḅie mgba se ini ḅẹlẹmaḅịa; à ḅarị ịganị ini pịrị ẹkẹ.

⁵ Ene samịna kiri ọgọnọ sara ọkụ mị àrị Izrẹlapụma ḅụ sime ọkụ-ẹ. Ini ngwengwe buruku buruku ma paka ọkụ se pakaḅịa; ini kụrọ kuno chụaḅịa, Lẹbanọn ejema sime ọkụ.

⁶ Ini ḍumoḅịa ịwọ sẹnị ḅụ, se oliv eje iḅiọkụ iḅiḅịa. Ini Lẹbanọn ḅie awụ chịnma kụnụ ọkụ kụnụḅịa.

⁷ Ini pịkị kpoto ḅo ị̀ chuku ḅie angaḅịa. Ini fịayemgbọlụ ḍipi pakụmaḅịa se irumịẹ chịnmgbọlụ ozu ḅie fịye chụaḅaka ọkụ ḅakaḅịa. Ini Lẹbanọn iru ẹrẹso ọkụ se ẹrẹsoḅịa.

⁸ Izrẹlapụma ini ḅarị oru na mịẹgbolomaye nyana ẹkẹ; àrị inia tẹkẹma pẹkẹrẹ se ini ḍikiḍikiḅịa. Wiliwili ịnyanya chụa eje sime ọkụ àrị ini jụḅịa; Ị̀rị̀ anị inia ḅẹlẹma mamgba ḅe chuku-ẹ.”

Yemamgba Ḅe Kuluma

⁹ Ye yenemi apụma pa mịanga gịẹịnye mị kaịnḅo, se ye ini pa anị se kuḅie chụa. Nyanaḅọ Ḅe oria mịẹmịẹ yemamgba karakaramẹ, pịkị karakara mịẹmịẹye nyanapụ àrị ḍiki angamẹ, ọkụma si mịẹapụ ma inia ḅụọ tọmbụlọ se ini ḅịkịmẹ anịatịḅị ini àrị se yechịnkẹ.