Hosia 1 - Kịrịkẹnị Baịbụl

¹ Mịn anị Nyanaḅọ Ḅe se Beraị tọkụ, Hosia ḅe fịrịma oku mị-ẹ. Tamụnọ Ḅe mị oku mị se ọ̀ fịrịmamẹ anị Ọzaya ḅe na Jotam ḅe na, Ehaz ḅe na, Hẹzekaya ḅe na ini Juda amanyanapụ sọ kụra ma ḅie anị Jẹhoash ya Jeroboam ḅe Izrẹl amanyanaḅọ sọ sịkị mị-ẹ.

Hosia Ta Ma Na Awọmẹnị Ma Na Ḅe Ḅẹrẹ

² Nyanaḅọ Ḅe tatarị Hosia ḅe ḅụ ḅọrọ ọkwẹịn Izrẹl pịrị sịkị, ọ̀ nwọse Hosia ḅe ḅẹmẹ, “Mun amanwẹngị eremeniḅọ sime, á yi ḅịa awọma sọ pịkị amanwẹngịapụ sọḅịa. Anị gbọrị ḅaraḅụ, ị̀ya tomonima ini ị̀ wẹrịsosam, se tomoni-kuḅie-se-ḅụgbana-ẹkapụ nwọ sọsam.”

³ Anị Hosia ḅe gbọrị eremeniḅọ, ini Goma se chịnḅọ, Dibleim ḅa ma simeye-ẹ. Inia tatarị owutọkụ ḅe yi ḅọrọso,

⁴ anị Nyanaḅọ Ḅe Hosia ḅe ḅẹye-ẹ, “Ọ̀ chịn ‘Jezriẹl’, anịatịḅị ḅọlọ-ẹkẹ à fomuḅara se Izrẹl amanyanaḅọ ḅe pịrịḅịa, anị oria ḅieju ḍaḅọ, Jẹhu ḅe, Jezriẹl ḅie kọn nini ma ẹrẹchị. À mịẹḅịa Jẹhu furo mị amanyana ḅụ kuluma nyana.

⁵ Pịkị Jezriẹl Pẹsịkiri mị ḅie anị àrị anịsịkị Izrẹl owuni kụrọ mị kankọsịmaḅịaye-ẹ.”

⁶ Goma ma árị maịn-karama tọkụ yimẹ. Mị sịkị eremeni tọkụ-ẹ. Nyanaḅọ Ḅe Hosia ḅe ḅẹmẹ, “Á chịn ‘Ḅẹlẹmaka,’ anịatịḅị à ḅarị ḅẹlẹma nyana Izrẹlapụma pịrị-ẹkẹ anịkanịka si ḅụ ḅarasin nyana ini pịrị-ẹkẹ.

⁷ Ọkụma Judapụma à ḅẹlẹma ḍiepakụma ini pịrịḅịa. Ị̀rị̀, Nyanaḅọ inia Tamụnọ Ḅe, ini ḍụaḅọrọmaḅịa, ọkụma àrị ọmụ ḅụ anị mịẹ-ẹkẹ—kongo anịkanịka lubu na ḍẹịn na ḅụkẹ, anịkanịka asụn na asụn owuni na ḅụkẹ.”

⁸ Goma ma, árịa eremeni tọkụ ma ḅịpị ndo pẹlẹ sịkị á ḅo pịkị jịn fura kọn se owutọkụ yimẹ.

⁹ Nyanaḅọ Ḅe Hosia ḅe ḅẹmẹ, “Ọ̀ chịn, ‘Ị̀ya Tomonikẹ,’ anịatịḅị Izrẹlapụma ini ị̀ya tomonikẹ, ị̀rị̀ pịkị inia Tamụnọkẹ.”

Tamụnọ Ḅe Kpoto Izrẹl Mị Namaḅịa

¹⁰ Izrẹlapụma ini ḅo tomoni ineda kịẹnka pịkị ineda yese tọn-ẹka opu tọrụ ḅie onwun ḅaka ọkụ ḅakaḅịa. Mịọkụ Tamụnọ Ḅe ini ḅẹ aḅẹ, “Ómine ị̀ya tomonikẹ,” ọkụma ene mị ḅoaḅẹ ori ini ḅẹḅịa sịkị na “Ómine anị ḍumo Tamụnọ Ḅe awọ ma-ẹ!”

¹¹ Judapụma na Izrẹlapụma na, ini pịkị ḅo gbolomaḅịa. Ini gbọrịḅọ sẹlẹ iniaḅụ pịrịḅịa ḅo ini se tọrọkọ ịsụnḅịaḅọ, se ini pịkị jịn sịkị seni pịkị mịẹyeḅarasọ nyanaḅịa ama mị ḅie. Iin, Jezriẹl ene mị anị opu ene sọḅịa!