Hibru 9 - Kịrịkẹnị Baịbụl

Tomonikiri Na Soḅie Na Ḅe Tẹkẹ Ḅara

¹ Tatarị ọḅọkụ mị ḅie tomoni se Tamụnọ tẹkẹḅịa oloko ḅara omi-ẹ, tomoni karakarama sime Tamụnọ Ḅe tẹkẹḅịa nyọ.

² Anịanga gbọrị ikowarị ini nwọ namamẹ. Nụngọda gbọrị ḅie mị ini nwọse anị chịnmẹ Fịafịa Nyọ. Anịa ḅie simearịye anị tọnjie gbanaye na dẹbụl na pịkị ini se agbamịẹ Tamụnọ Ḅe pịrị fịturu mị na-ẹ.

³ Maịn karama kikichụa ḅịtẹ mị ọḅụju sime ikowarị mị ini nwọse anị chịnmẹ Fịafịa Tẹịn Nyọ.

⁴ Anịa ḅie goli goli agbamịẹ ẹbẹ omi-ẹ, anịa ọgọnọ ini insẹnsị dọkịma dọkịmamẹ, pịkị Ọḅọkụ Igbe mị na ini goli se anịmgba oḅoloye mị, anịa ḅie soḅie koroḅo fịye mị, anị ini mana nwọse chịnye mị, gbọrị goli goli ojongo ḅie omi-ẹ, Erọn ḅe oria ịnyanya chụa amgbara mị na, pịkị olokoma arịa ọgọnọ gịẹịn mama ḍụparị pẹkẹrẹ ma na.

⁵ Anị Igbe mị ọgọnọju cherubim nwọ chịn enjẹlapụ omi-ẹ, se tomoni ḍie na Tamụnọ Ḅe anịanga Ori omi-ẹ, arịa pamba ma àrị nwọ finji anịanga mị jụmẹ anị Tamụnọ Ḅe siḅụ-ḅarasin tomoni pịrịarị nyọ mị. Ọkụma wa mịn sịkị mị ḅụ gbunma mayema nwọ ḍuko ẹkẹ.

⁶ Ye tọn koromasa ḅara ḅụ, agbamịẹapụma eneḅeneḅene sọ mun tọrọkọda ḅie mị ḅụ inia fịrịma nwẹngị-nwẹngịmẹ,

⁷ ḅieju sime ḅie mị ọkụma gele agbamịẹḅọ ḅe kẹngẹ mị kụra ḅụ gbọrị sịkị kẹngẹ nwọse anịa ḅie sọsọye-ẹ. Anịsịkị mị ḅụ ọ̀ nama pulo ọkị se oria sima na pịkị tomonima sima na gose agbamịẹ Tamụnọ Ḅe pịrịpịrịmẹ, anị nemika ḅara ḅụ ini mịẹarị sima.

⁸ Fịafịa Tẹmẹ Ḅe mayema nwọse ḅụḅelema yese wa ḍiemẹ na anị ikowarị mị pa chịẹ warasịkị, ateli ofori-ẹ, tomoni ḅọrọ mun Fịafịa Tẹịn Nyọ mị la.

⁹ Mịn sịkị mị ḅe ḅẹrẹ anị mịn mị ḍiepakụmarịye-ẹ. Àrị fiearịye anị, ḍiepịrịayema na ini se agbama mịẹ Tamụnọ Ḅe pịrị namama na àrị ineda kara ḅara se Tamụnọ Ḅe tẹkẹarị apụma kuḅie ma mịẹfịafịama ẹkẹ,

¹⁰ anịatịḅị fị na ḅu na pịkị tọn tọn-a ḅụ-sịkịrị mịẹmịẹaye na kẹngẹ mị ini mịẹḅịaye-ẹ nwọ ḅẹ sịkị. Mamgba ọgọnọ paka se tọrụse ọrị àrị oloko-ẹ, kala sịkị kẹngẹ se sime mun Tamụnọ Ḅe yemamgba mịẹ ịwọmaḅịa sịkị mị laḅịaye-ẹ.

¹¹ Ọkụma mịọkụ Kraịst Ḅe ori iḅiaye na ḅosam Gele Agbamịẹḅọ ḅara ḅụ anị wa mịanga nyana ḅọrọsa iḅiaye ma-ẹ. Ò sime fịrịnwẹngịarị ikowarị mị tomonikiri mị ḅe ye mị nẹngị pịkị karagbasịye-ẹ. Tomoni pike ikowarịkẹ pịkị mị tomonikiri mị ḅe ye kẹ.

¹² Ori oḅori pulo na ayamburama owoi nambulo pulo na nwọse Ọ̀ ḅara ọlọ munkẹ, ọkụma Oria oju pulo, mị Ò se mine pẹkẹrẹ pakụmaḅo gbasoye mị-ẹ.

¹³ Oḅori na owoi nambulo pulo na, pịkị ini dọkịmasa ayamburama nambulo fọnma, nwọse pụlasa apụ sana ọkụma, anị ini mịẹse ini tẹmẹ ḅụ fịafịa-fịafịamẹ, inia tẹmẹ anga ḅe fịafịaka mị ḅụ.

¹⁴ Ọkọ sime nama pulo nemikase anị sime ḅara ḅụ, kụrọ nyana anị ḅara se tomoni mịẹfịafịamamẹ nwọ ḅẹ ọkụma, Kraịst pulo mị kụrọ nyanatẹịnmẹ mịna kuḅie ma nwọ mịẹfịafịama ḅụ! Ori Oria mịẹirima nyanaka oju mị nwọse mịna tịḅị gose agbamịẹ Tamụnọ Ḅe pịrịmẹ, Fịafịa Tẹmẹ Ḅe kụrọ ḅụ anị ḍumo gbamasoḅọ Ḅe. Anị mịn ḅụ Oria pulo mị mịna kuḅie ma nwọ mịẹfịafịamamẹ, mịẹse wa ḅarị yeḅụsọka agbamịẹ ẹka ḅara, se fịrịnwẹngị ḍumo sime Tamụnọ Ḅe pịrịḅịa ọkụ.

¹⁵ Mịn mị fieaḅẹ na Kraịst Ḅe mị Tamụnọ na tomoni na ogboku chịẹḅọ Ḅe-ẹ, Ori ịwọ ọḅọkụ nwọ mịẹmẹ mịẹse Tamụnọ Ḅe chịn ọkịsa apụma ḅo simegbamaso ḅẹlẹma ma ḍiaọkịḅịa ọkụ, Ò ḅereni na Ò se ini pịrịḅịa nwọ ḅẹ ayema. Mịn mị mịẹḅịa, anịatịḅị Kraịst Ḅe Ọ̀ fịsam, Oria fị mị tomoni pẹkẹrẹ pakụmaḅoḅịa ini mịẹ siayema ḅụ, tatarị ọḅọkụ mị pa ini fịnama koroma kiri mị ḅụ.

¹⁶ Warị tọn gbolomaye ḅụ, anị ḅụgbẹịnmẹ nwọ mịna warị tọnsa ḅọ ḅe ọ̀ fịsam nwọ ḅẹye mị ḍọkị nemi.

¹⁷ Ori ḅọ ḅe nwọ ḍumo warasịkị ọ̀ tọn warị mịn anị mịẹmịẹye nyanakẹ, anị ḅo ọ̀ fị sịkị nwọ lasam ḅẹḅẹ ọ̀ tọn warị mị kiri ọkịḅịa.

¹⁸ Anịẹrẹchị tatarị ọḅọkụ mị sọnị ineda yeḅụsọ ẹkaye-ẹ, pulo ọsụnka simeogbo.

¹⁹ Tatarịye, Moziz ḅe chụakoroma Oloko mị ḅie simeaye mamgba ọ̀ nwọ ḍukopakụma tomonima pịrị so sịkị, ò ḅo owoi nambuloma pulo mị nwọ ọkị mengi se anị gwa; se anị seni Oloko ḍiri mị na pịkị tomonima na sanamẹ. Hisọp na pịkị pulo-pulo owo na mị ò seni anịa ḅie su se ini sanasanaye-ẹ.

²⁰ Ọ̀ nwọse ini ḅẹmẹ, “Mịn anị Tamụnọ Ḅe se ọ́ pịrị na ó koko nwọ ḅẹ ọḅọkụ mị mịẹkụrọma pulo mị-ẹ.”

²¹ Anị gbọrị ḅara ḅụ, Moziz ḅe pulo mị se Ọḅọkụ Ikowarị mị ḅụ na pịkị tẹkẹwarị mị ḅie fịrịnwẹngịaye mamgba ḅụ sanamẹ.

²² Kọkọmaye-ẹ, Oloko mị sime ḅara ḅụ, ini pulo se yegoyegoye nwọ mịẹfịafịamamẹ, pịkị pulo ọsụnka simeogbo siḅụ-ḅarasin pịrị ofori-ẹ.

Kraịst Ḅe Mịẹ Agba Mị Anị Si Dekisinmẹ

²³ Ini nwọ soḅie ḍikiḍa mịẹarịye ma, anị ini se àrị mịẹfịafịamaḅịa ọkụ-ẹ nwọ ḅẹ sịkị; ọkụma soḅie ayema ḅoju, iḅitẹịn agbama mị àrị ḅiarịye-ẹ.

²⁴ Anịatịḅị Kraịst Ḅe sọmun anga mị anị tomoniḅọ ḅara se mịẹ Fịafịa ma Nyọkẹ, anị ini kọkọmaye mị ḍikiḍa mịẹye mị. Ò so soḅie mun mẹ, anị mịọkụ ọ́mịna tịḅị gose Tamụnọ Ḅe tọrọkọ chịẹ sime nyọ mị.

²⁵ Juapụ Gele Agbamịẹḅọ ḅe kụrakụra ḅụ ọ̀ nama pulo ọkị Fịafịa Tẹịn Nyọ mị ḅie sọsọmẹ. Ọkụma Kraịst Ḅe Ọ̀ tọn-a sịkị se sọmun Ọ̀ ḅụ se agbamịẹkẹ,

²⁶ anịka ọkụma mgbọkụ tomonikiri mị tẹmẹ sịkị ngịsị sakị, tọn-a sịkị Ọ̀ nwọse tọrụsiọrịsam. Anịnakaraka, mịọkụ, ḅụọḅụọ ḅe kuluma mị ḅo kpekisa sịkị, Ori Ọ̀ ḅụ se agbamịẹmẹ, se gbọrị sịkị kẹngẹ ḅụ si sịkịrị sinḅịa ẹrẹchị.

²⁷ Tomoniḅọ goyegoye gbọrị sịkị kẹngẹ nwọse fịḅịa, anị mị ḅọrọ sịkị, Tamụnọ Ḅe ḅẹrẹkọn iniḅọ pịrịḅịa.

²⁸ Anị gbọrị ḅara ḅụ, Kraịst Ḅe sọnị ini Ò se agbamịẹmẹ gbọrị sịkị ḅụ, se tọn apụ si dekisinḅịa ẹrẹchị. Ọ̀ pịkị maịn karama ḅoḅịa, si dekisin gosekẹ, ọkụma sime Ò koruarị apụma ḍụaḅọrọmaḅịa ẹrẹchị-ẹ.