Hibru 6 - Kịrịkẹnị Baịbụl

¹ Anịọkụma ó ye wa tọrọkọ mun ogulasa apụ ḍawọye ḅụ sọ Kraịst Ḅe ḅie sọ, se tatarị oku mị se ọḅụ pịrị. Ó ye wa yeḅụsọka fịrịma ḅụ ḅarasin se Tamụnọ Ḅe ḅereni.

² Mengisara na, ḅara se tịḅị ọgọnọ gbana na, fịapụ fịḅụsịsẹ mị na; pịkị simegbamaso ḅẹrẹkọn mị gboloma ḍieayema na ḅọlọ sịkị ngịsị ọ́ ḍawọ ḅọrọsaye-ẹ.

³ Ó ye wa tọrọkọ mun! Mịn mị anị wa mịẹḅịaye-ẹ, Tamụnọ Ḅe ḅọrọ nemikase ḅereni ọkụma.

⁴ Nde anị sarasara ọkụ Tamụnọ Ḅe ḅụ ḅịkịsa apụma nwọ pịkịmaḅo, na ini si ḅụ vinpịkị-ẹ nwọ ḅẹye mị? Anịatịḅị ọkọ sime apụma ini gbọrị sịkị se Tamụnọ enekuḅu mị nwọ ọrịsam, ini Tamụnọ Ḅe ḅara tọn-a ḅẹlẹma nwọ nyana ọkịsam, ini Fịafịa Tẹmẹ Ḅe ḅe ḍiekiri nwọ nyana ḅọrọsam.

⁵ Ini ọrịsam na Tamụnọ ọkwẹịn mị iḅimẹ, ini pịkị ḅara na ḅoḅịa ḅụọ mị ḅe kụrọ mị sọ nwọ nemisam.

⁶ Maye mamgba nwọ ḅereni sosa apụma Tamụnọ Ḅe ḅụ ḅịkịmẹ ḅẹḅẹ, gbọrịḅọ sọnị ḅarị ineda ini mịẹse ini vinpịkị Tamụnọ Ḅe damaḅo ẹkẹ, anịatịḅị ini kpoto Tamụnọ Tọkụ Ḅe nwọse mgbẹsẹchịn ọgọnọ ḅakụḅaaḅẹ, pịkị ḅelema amaogbo ọ̀ ḅụgererema aḅẹ.

⁷ Ene sịkịna sịkịna koro sararị kiri mị, nemikase fịye pakụma anịa ḅie yeḍipi apụma pịrị ọkụma, Tamụnọ Ḅe anị ḅẹlẹmamẹ.

⁸ Ọkụma anị kiri mị nemikase ịga na nangị na kẹngẹ nwọ pakụmamẹ ḅẹḅẹ, ọkọ sime kiri yeḅụsọkẹ; Tamụnọ worinime se anị pịrịmẹ, se anị gbọtụḅara dọkịḅịa.

⁹ Ọkụma mịna ḅụ yela ikiapụ, wa ḅọrọ mị ḅara mị se ọkwẹịn aḅẹ nwọ ḅẹ sọnị, wa iḅiọkụ nemimẹ na, ómine iḅitẹịn ḅẹlẹma nyanamẹ anị sime ọ́mịna ḍụaḅọrọma mị pịrịayema.

¹⁰ Tamụnọ Ḅe karakarakaye mịẹmịẹḅọkẹ. Ọ́ nwẹngị fịrị mị Ò se ḅieḅarama ẹkẹ, ọ́ pịkị, se, Ọ̀ ḅụ ọ́ nyana ḅẹlẹma mị ḍiepakụma gose ḅarachụa ó juo Kraịst ḍukonwẹngịapụma pịrị ḅara mị na, anị mịọkụ sọnị ọ́ pa ḅarachụa ini pịrịarị ḅara mị.

¹¹ Wa iḅiọkụ ḅimẹ na ómine mgba pa pịkị ḅụkụrọma mun kuluma mị nwọ la, ngịsị ọ́ ḅarasin ma, mịẹse ọ́ tọrụseḍikiarịye goyegoye ọ́ nwọ nyana ọkịḅịa ḅara.

¹² Wa ḅikẹ ómine ikula, anịnakaraka, wa ḅimẹ ó ḅereniapụma simeọkụ sime se ye inema, anịatịḅị ini mị Tamụnọ Ḅe ḅereniaye ma nwọ nyana ọkịḅịaye-ẹ.

Gbarịmaka Tamụnọ Yeḅereni Mị

¹³ Tamụnọ Ḅe yeḅereni Ebraham ḅe pịrị sịkị Ori Oria ẹrẹ nwọse yekarịfịmẹ, na ò ḅereni ọ̀ pịrịye mị Ọ̀ nwọ mịẹḅịa, anịatịḅị ọ̀ nẹngị se ò se yekarịfịḅịa jịnḅọ ofori-ẹ.

¹⁴ Ọ̀ nwọ ḅẹmẹ na, “Gbarịmaka ḅara ḅụ àrị ị́ ḅẹlẹmaḅịa, à mịẹse ị́ furo ḅie pakaḅoḅịa apụma ḅakaḅịa.”

¹⁵ Ebraham ḅe ò ye inemamẹ, anịẹrẹchị Tamụnọ Ḅe ḅereni ọ̀ pịrịayema ọ̀ ḅara lamẹ.

¹⁶ Tomoniḅọ yekarịfịarị sịkị, ọ̀ nẹngịḅọ ẹrẹ mị ò se yekarịfịḅịaye-ẹ, tomoni pịkị yekarịfị nwọse ini jinearịye nwọ mịẹkụrọmakụrọmamẹ.

¹⁷ Tamụnọ Ḅe Ò ḅimẹ Ò ḍieḅelema se Ò yeḅereni pịrị apụma pịrị na Ò kuḅie ḍinma ẹkẹ Ò ḅereni ini pịrịsaye mị ḅụ. Anịẹrẹchị Ori Oria ẹrẹ se yekarịfịmẹ na Ò ḅereniye mị Ọ̀ nwọ mịẹ ḅeinmaḅịa.

¹⁸ Anị ḅara ḅụ ma mamaye ma Tamụnọ Ḅe nwọse yemịẹ kụrọmamẹ, anị Ò ḅereniye mị na Ọ̀ karịfịye mị na-ẹ; mama anị ngịsị ḍinma ẹkaye-ẹ; Ọ̀ pịkị ngịsị iruokọn ẹkẹ. Mine Tamụnọ Ḅe ḅie ḍụaḅọrọma nyana sa apụma anị opuma mịna kuḅie kụrọmamẹ kapụma wa tọrụseḍikiarịye mị ọlọchịẹma.

¹⁹ Mịn wa tọrụseḍikiarịye mị, anị lịmọ sọ se mịna kuḅie ma pịrịmẹ. Jikejikekẹ pịkị ḅụokoromẹ, anị pịkị soḅie Oputẹkẹwarị mị ḅie kikichụa ḅịtẹ mị tolu ḅọrọ mun ḅieju osiḅụ sime anga mị sọ lamẹ.

²⁰ Mịna tịḅị gose Jizọs Ḅe tatarị anịanga sọmunsam, Ò ḅo Gele Agbamịẹḅọ nwọ sọmẹ, anị Mẹlkizẹdẹk agbamịẹ ọrụ mị ḅụ.