Hibru 2 - Kịrịkẹnị Baịbụl

Opu Ḍụaḅọrọma Mị

¹ Anịẹrẹchị wa iḅiḅara se kapụma wa naa kọkọmaye ma ọlọḅịa, mịẹse wa arịa ḅụ tẹịn sikima-ẹka ḅara.

² Wa nemimẹ na enjẹlapụma ọkịḅo mịna ḅieju-aḍapụma pịrị oku mị kọkọmaye-ẹ, se ininachịn se anị ḍukonwẹngịka pịkị ḅịpịpokika ḅọ goyegoye iniḅọ la gbẹịn fomuḅara nwọ damẹ.

³ Nde, anịọkụma, fomuḅara wa gbarịḅịa ọkụ wa nemikase nwọ sime opu ḍụaḅọrọma nwọse yechịnka ọkụma? Nyanaḅọ Ḅe ḅarana tatarị mị ḍụaḅọrọma mị ḍukopakụmamẹ, se ò ḍukoye naa apụma pịkị se wa ḍiemẹ na kọkọmaye-ẹ.

⁴ Anị gbọrị sịkị ḅụ, Tamụnọ Ḅe pịkị onyechịẹ inia onyechịẹ mị mịẹkụrọmamẹ, anị tọrụkịrịkịrị elekima na ḅụgbiripumaye na nwọ mịẹ ḅụ pịkị ò ḅi ḅara se Fịafịa Tẹmẹ Ḅe ḍiepịrịayema ḍie wasama ḅụ na.

Wa Se Mun Ḍụaḅọrọma Ḅie Chu Ḅọ Ḅe

⁵ Tamụnọ Ḅe, ḅoḅịa ịwọ tomonikiri mị anịa tịḅịdaḅịa kiri mị, enjẹlapụma, ma ori ini se koromakẹ; anị wa ḍuko ḍuko tomonikiri ḅẹrẹ mị.

⁶ Anịnakaraka, Fịafịaḍiri mị gbọrị anga ḍuko ḅara ḅụ: “Yei, Tamụnọ, tomoniḅọ ḅe cheye, se Ị́ gose koroma kọn ọ̀ pịrịḅịaye; papa tomoniḅọ ḅe ị́rị́ ori abalaḅe?

⁷ Boka kala sịkị Ị́ nwọse Ori iderima enjẹlapụma nẹngịmẹ; boma na osi na Ị́ nwọse amanyanaḅọchu mịẹ Ò chiramẹ,

⁸ Ò se ḅẹrẹtọnḅọ mịẹ yemamgba pịrịmẹ.” Anị nwọ ḅẹmẹ, Tamụnọ Ḅe tomoniḅọ ḅe mịẹse “ọ̀ ḅẹrẹtọnḅọ sọ yemamgba pịrịmẹ”; mịn mị ḅelema yegoyegoye nwọse chụa ḍukomẹ. Ọkụma tomoniḅọ ḅe ḅẹrẹtọn yemamgba pịrị ḅara, ma wa nwọ ọrịkẹ mịọkụ.

⁹ Ọkụma wa kọkọma Jizọs Ḅe nwọ ọrịmẹ, ḅẹrẹtọn yemamgba pịrịaḅẹ, Tamụnọ Ḅe boka kala sịkị ḅụ ori iderima enjẹlapụma nẹngịmẹ, mịẹse Tamụnọ ḍikiḅụgerere ḅụ Ọ̀ fị tomoni mamgba pịrịḅịa ḅara. Mịọkụ wa ọrịmẹ, boma na osi na ini nwọse amanyanachu mịẹ Ò chirasam, Ọ̀ tọrụsiọrị se kọn fị mị gose.

¹⁰ Anị karakaramẹ na Tamụnọ Ḅe anị yemamgba tẹmẹ pịkị àrị kokoarịḅọ Ḅe, Jizọs Ḅe mịẹse Ọ̀ kara anị tọrụsiọrị ḅụ mịẹse Ọ̀ tọn-a awọ ọkịḅo Oria boma mị ḍieọkịḅịa ẹrẹchị. Anịatịḅị Jizọs Ḅe anị ini ḅọrọma mun ḍụaḅọrọma mị ḅie chuye-ẹ.

¹¹ Ò tomoni mịẹ fịafịama fịafịamamẹ inia sima ḅụ, se Ori na Ọ̀ mịẹfịafịamasa apụma na gbọrị Ḍaḅọ nwọ nyanamẹ. Anịẹrẹchị, Jizọs Ḅe Oria mịnapụ nwọse ini chịn mị Ọ̀ ḅụgereremakẹ.

¹² Jizọs Ḅe nwọse Tamụnọ Ḅe ḅẹmẹ “Àrị Ị́ nwẹngịsa fịrị mị nwọ ḍuko Ị̀ya mịnapụma pịrịḅịa; àrị ini na inia koḅiria mị ḅie Ị́ tokoniḅịa.”

¹³ Ọ̀ pịkị nwọ ḅẹmẹ, “À kuḅie se Tamụnọ Ḅe ḅụgbanaḅịa.” Ọ̀ pịkịna nwọ ḅẹmẹ, “Mị Ị̀rị̀-ẹ Tamụnọ Ḅe se Ị̀ pịrị awọma na Ị̀rị̀ na.”

¹⁴ Oria awọ mamgba ojumịnị chụa apụ-ẹ, anị mịẹse Jizọs Ḅe inia sime ḅara ḅụ wẹrị ḅomẹ, mịẹse Ọ̀ fịḅịa ḅara, mịẹse Ori Oru ḅe fị kụrọ mị nyanaḅọ ḅe, kụrọ mị kansinḅịa ḅara,

¹⁵ mịn ḅara mị ḅụ Ọ̀ mịẹse fị mị ḍikiḅalafa se ini ḍumo ene mamgba omonisọ apụma inia ḅụ nyanamẹ.

¹⁶ Anị iḅiọkụ ḅelemẹ na Ò ḅo ḅarachụa enjẹlapụma pịrị-ẹ ḅokẹ, anịnakaraka Ebraham ḅe ḅụ pakaḅo apụma mị Ọ̀ ḅo ḅarachụa pịrị-ẹ ḅoye-ẹ.

¹⁷ Anị karakaramẹ pịkị ḅụgbẹịnmẹ Ori Oria mịnapụma simeọkụ sime yegoyegoye ḅụ, mịẹse Ò kuḅie se ḅụgbana gbẹịn pịkị ḍikiḅụgerere nyana Gele Agbamịẹḅọ sọḅịa ọkụ fịrịnwẹngị Tamụnọ Ḅe pịrị ḅụ, mịẹse ini tomonima sima ḅụḅarasin ini pịrịḅịa ẹrẹchị.

¹⁸ Ori sọnị tọrụsiọrị se ini pịkị Ò telimaye gose, Ori ineda ḅarachụa ini mịọkụ telima àrị apụma pịrịḅịa.