Hibru 13 - Kịrịkẹnị Baịbụl

Tamụnọ Ḅe Ḅieḅẹlẹma Ye Nwọ Mịẹḅịa Ọkụ

¹ Ọ́ jịnḅọ jịnḅọ ḅẹlẹma ḅụ sime ma mun Kraịstḍukonwẹngị mịnapụ ḅara ḅụ.

² Iḅiọkụ se ọ́mịna warịma ḅie igoniapụ da ọkị mị ó se ḅiekoroma. Dapụ anị ḅara mịẹmẹ, se nemika ḅụ iḅiọkụ se enjẹlapụ da ọkịmẹ.

³ Ómine ikoli ḅie sime apụma nwọse ḅiekoroma, ómine ini na ikoli ḅie omi-ẹ nwọ ḅẹ ḅara. Ọ́ tọrụsiọrị àrị apụma nwọse ḅiekoroma ómine sọnị ini na tọrụsiọrịaḅẹ nwọ ḅẹ ḅara.

⁴ Nwenimgba osi se ama na ere na sime mị nwọ pịrị, deḅọ na ịrọḅọ na kuḅie se jịnḅọ jịnḅọ ḅụgbana gbẹịn apụ nwọsọ, Tamụnọ Ḅe Ọ̀ ḅẹrẹkọn ama nwẹngị apụ na sẹfị apụ na pịrịḅịa.

⁵ Ómine igbiki ḅẹlẹma ḍumo kọnma, se ye ọ́ nyanaye ọ́mịna ḅụ na deinkoro. Anịatịḅị Tamụnọ Ḅe Ọ̀ nwọ ḅẹsam, “Ngịsị àrị ọ́ wẹrịso ẹkẹ, ngịsị àrị ọ́ sịkị ẹkẹ.”

⁶ Ye anịọkụma wa kụrọ kuḅie nyana se nwọ ḅẹ, “Nyanaḅọ Ḅe ị̀ya ḅarachụaḅọ-ẹ, ị̀ ḅalafa ẹkẹ. Tomoniḅọ ineda cheye se ị̀ mịẹ ḅe?”

⁷ Tatarị ó se tọrọkọ ịsụn apụma ọ́ nwọse ḅiekoroma, Tamụnọ oku mị ḍuko ọ́ pịrị apụma. Ini ḍumokọn se fị ḅara mị ọ́ nwọse ḅiekoroma, se inia ḅereni mị ọ́ nwọ ḍa-ẹ.

⁸ Jizọs Kraịst Ḅe ḅịa Ò simeọkụ, anị mịmgba sọ Ò simeọkụ-ẹ, anị Ọ̀ pịkị simegbasoḅịa ọkụ-ẹ.

⁹ Ó ḅerenima se kịrị ḍieaye karakara achọ mị ḅụ ọ́ dairima. Anị iḅimẹ na ọ́ Tamụnọ Ḅe ḍikiḅụgerere mị ḅụ ḅo ịnyọ nwọ nyana, ọkụma fịaye oloko koko ḅụkẹ, àrị olokoma koko apụma àrị ḅarachụa ini pịrịkẹ.

¹⁰ Juapụ Tamụnọ tẹkẹ nyọ ḅụ agbamịẹapụma, ini kụrọ nyanakẹ mịna agbamịẹ ẹbẹ mị ọgọnọ, se agba mịẹ ye nwọ fị.

¹¹ Juapụ Gele Agbamịẹḅọ ḅe namama pulo mị nwọ ọkị Fịafịa Tẹịn Nyọ mị sọmunmẹ anị sima gose agba mịẹḅịa ẹrẹchị; ọkụma namama ojuma ini nwọ dọkịmamẹ ikowarị mị ọḅụju ḅụ.

¹² Mịn mị gose, Jizọs Ḅe sọnị opu ama mị ọḅụju ḅụ sime se fịmẹ mịẹse Ori Oria pulo mị se tomoni mịẹfịafịamaḅịa ẹrẹchị inia sima ḅụ.

¹³ Ó ye wa anịọkụma ikowarị mị ọḅụju Ọ̀ damamun se Ori na Oria ḅụgerere mị ḍiaọkị.

¹⁴ Anịatịḅị mịanga wa anga gbasoḅịa ama ofori-ẹ mịn tomonikiri mị ḅie, wa tọrụse ḅoḅịa ama nwọ ḍikiaḅẹ.

¹⁵ Ó ye wa anịọkụma, sịkịmamgba tokoni se Tamụnọ Ḅe pịrị anị Jizọs Ḅe ḅụ wa ḅọrọ mịẹarị agba ḅara ḅụ. Ori anị Nyanaḅọ Ḅe-ẹ nwọ ḅẹye mị ḍukopakụma anị ḅịpịpẹkẹrẹma mịẹarị agba mị-ẹ.

¹⁶ Iḅimịẹ na ḅarachụa jịnḅọ jịnḅọ pịrị na ó se ḅieḅaramama, anịatịḅị mayema mị Tamụnọ Ḅe ḅieḅẹlẹma agbama-ẹ.

¹⁷ Ó se tọrọkọ ịsụn àrị apụma ḅịpị ọ́ nwọ poki pịkị ini tọn ọ́ pịrị ayema ọ́ nwọ ḍukonwẹngị. Ini ọ́mịna tẹmẹma nwọ koru gbasomẹ ịnyọsaraka ḅara ḅụ, ini inia fịrịma ḅe opolitọn Tamụnọ Ḅe pịrịḅịa nwọ ḅẹ sịkị. Ó nemikase inia ḅịpịpoki ọkụma ini ḅieḅẹlẹ nwọse inia fịrịnwẹngịḅịa, anịka ọkụma ini ngịrị se anị nwẹngịḅịa anịsịkị anị mị anị ḅarachụa ọ́ pịrị ẹkẹ.

¹⁸ Mịna tịḅị gose sịkịmamgba ọ́ tẹkẹ ḅụ sime. Wa iḅiọkụma nemimẹ na mịna kuḅie fịafịamẹ, anịatịḅị wa ḅimẹ wa sịkịmamgba karakaraye mị nwọ mịẹ.

¹⁹ Anịtẹịn anga à pịkị ómine mgba tẹkẹaḅẹ na ọ́ Tamụnọ Ḅe tẹkẹ Ọ̀ ḅọlọka sịkị ḅụ ị̀ se pịkị ọ́ sẹịnma.

Kuluma Tẹkẹ

^20-21 Tamụnọ Ḅe fị apụma ḅie wa Nyanaḅọ Jizọs Ḅe nwọ sịsẹmasam, Oria fịḅụ ḅọrọ Opu Anana Koruḅọ sọ ananama pịrị ḅọ Ḅe, anị ḅụ ini ḅọrọ simegbaso ọḅọkụ mị nwọ mịẹ kụrọmaye mị. Ye deinma nyana Tamụnọ Ḅe ọ́mịna ḅụ palịma iḅiye goyegoye nwọ seni ọ́ pịrị, ómine Ò ḅiye nwọ mịẹḅịa ḅara, ye Ọ̀ pịkị Jizọs Kraịst Ḅe ḅụ ḅọrọ mịna ḅụ Ọ̀ ḅụḅẹlẹye nwọ mịẹ. Ye boma mị pịkị sime Kraịst Ḅe pịrị ḅẹsịkị ḅẹsịkị ḅụ! Amẹn.

Kuluma Ọkwẹịnma

²² Àrị ọ́ tẹkẹmẹ ị̀ya mịnapụ, ó deinma kuḅie kụrọma oku mị nwọ poki; anịatịḅị mị, à gịẹịn ọ́ pịrị àrị ḍiri mị opuma nangwọkẹ.

²³ À ḅimẹ ó nemi na ikoli ḅie mịna numbireowu Timoti ḅe ọ̀ pakaḅosam, ori iḅi se ḅo lamẹ ḅẹḅẹ, àrị ori na ḅo ómine na ịrịaḅịa.

²⁴ Mịna kereniḅịpị ọ́ nwọ seni ọ́mịna tọrọkọ ịsụn àrị apụ mamgba pịrị, pịkị Tamụnọ-a tomoni mamgba na. Itili ḅie sime mịna mịnapụma inia kereniḅịpị seni ọ́ sẹịnmasam.

²⁵ Ye Tamụnọ Ḅe ḍikiḅụgerere mị ómine mgba na sime.