Hibru 1 - Kịrịkẹnị Baịbụl

Tamụnọ Ḅe Oria Tọkụ Ḅe Ḅụ Ḅọrọ Kọn Ọkwẹịn Mị

¹ Ḅọrọsa sịkị Tamụnọ Ḅe ịkịankoroapụma ḅụ ḅọrọ tọn-a kịrịkịrị ḅọkọ ḅụ ọkwẹịn mịna olomu ḅieju-aḍapụma pịrịmẹ,

² ọkụma ma kuluma enema ḅie Ori Oria Tọkụ Ḅe ḅụ ḅọrọ ọkwẹịn wa pịrịsam. Ọ̀ ḅụ Tamụnọ Ḅe ḅọrọ bebe tomonikiri mị nwọ tẹmẹmẹ, Tamụnọ Ḅe ye mamgba nwọ tọn pịrị ḅọ Ḅe.

³ Tamụnọ Ḅe boma Ọ̀ ḅụ ḅụ ḅịapakamẹ, Ò simeọkụ anị dada Tamụnọ Ḅe simeọkụ-ẹ; Oria kụrọ nyana ọkwẹịn mị Ọ̀ nwọse tomonikiri mị ọlọchịẹmamẹ, Ò siḅụ ḅarasin mị ọkịḅo nweni mamgba pịrị so sịkị, soḅie ḅụ Tamụnọ Ḅe Tịḅịda Kụrọ mị ḅe amaḅara anga ḅụ Ọ̀ kpọnjị sime waraḅẹ.

Tamụnọ Tọkụ Ḅe Gele Mị

⁴ Tọkụ Ḅe ini nwọse opu kiri ḅụ koromatẹịn enjẹlapụma nẹngịmẹ, anị Tamụnọ Ḅe se ọ̀ chịn ẹrẹ mị pịkị geletẹịn enjẹlapụma ẹrẹma nẹngị ọkụ-ẹ.

⁵ Tamụnọ Ḅe nwọse ḅẹsa enjẹlḅọ ofori-ẹ oria enjẹlapụma ḅie, “Ị́rị́ ị̀ya Tọkụ-ẹ; mịmgba àrị ị́ Ḍa sọsam.” Tamụnọ Ḅe ma pịkị nwọse gbọrị enjẹlḅọ sọ ḅẹkẹ, “À Ḍaḅọ sọ ọ̀ pịrịḅịa; ori pịkị Tọkụ sọ ị̀ pịrịḅịa.”

⁶ Tamụnọ Ḅe Oria tatarị Tọkụ Ḅe se tomonikiri mị fịrịma-ẹ tọn sịkị, ọ̀ nwọ ḅẹmẹ, “Ye Tamụnọ Ḅe enjẹlapụ mamgba kpẹrẹkị Ọ̀ tẹkẹ-ẹ.”

⁷ Mịn Tamụnọ Ḅe enjẹlapụma gbolomaye ḅụ Ò ḍukoye mị-ẹ, “Tamụnọ Ḅe Oria enjẹlapụma nwọse fọrụ mịẹmẹ, se Oria fịrịnwẹngịapụma nwọse fịnị ḅẹlẹ nwọ mịẹmẹ.”

⁸ Ọkụma Tọkụ Ḅe gbolomaye ḅụ Ọ̀ nwọ ḅẹmẹ: “Yei Tamụnọ, Ị́ya Amanyanakiri mị, anị sime ḅene-ḅene laḅịa! Karakara ḅẹrẹkọn Ị́ nwọse Ị́ya Amanyanakiri mị damẹ.

⁹ Ị́ karakaraye mị ḅẹlẹmamẹ se taraka se kurakaye mị wẹrịmamẹ. Anịẹrẹchị Tamụnọ Ḅe, anị Ị́ Tamụnọ Ḅe, gose Ị́ sẹlẹọkị se pịkị opu na ḅieḅẹlẹ na se Ị́ pịrịtẹịn Ị́rị́ na nwẹngịapụma nẹngịye-ẹ.”

¹⁰ Ọ̀ pịkị nwọ ḅẹmẹ, “Ị́rị́, Nyanaḅọ Ḅe, mị sakị sịkị ngịsị tomonikiri mị tẹmẹye-ẹ, Ị́rị́ pịkị ḅarana soma tẹmẹmẹ.

¹¹ Arịmgba ḅọrọḅịa, ọkụma Ị́rị́ Ị́ simegbamasoḅịa; arịmgba ḅụchụaye olomu ọkụ nwọse olomu pịkị kanḅịa.

¹² Ḅụchụaye iko ọkụ Ị́ nwọse àrị iko anga pịrịḅịa, se àrị ḅụchụaye sịkịrị ọkụ se sịkịrịḅịa. Ọkụma Ị́rị́ Ị́ sime gbọrị ḅara mị, mị Ị́ simeḅịa ọkụ-ẹ, Ị́ pịkị kuluma nyana ẹkẹ.”

¹³ Tamụnọ Ḅe Oria enjẹlapụma ḅie Ọ̀ nwọse ḅẹsa ḅọ ofori-ẹ: “Ị̀ya amaḅara anga ḅụ sime, ọkịmun àrị Ị́rị́ na tarakapụma se Ị́ ḅụọ sẹkẹye nwọ mịẹḅịa sịkị la.”

¹⁴ Enjẹlapụma ḅọrọ cheye, anịọkụma? Inimgba tẹmẹ-ẹ, fịrịnwẹngị Tamụnọ Ḅe pịrịaḅẹ, Ori ini fịrịma pakụmamẹ ḅarachụa ḍụaḅọrọma nyanaḅịa apụma pịrịḅịa ẹrẹchị.