Hagaị 1 - Kịrịkẹnị Baịbụl

Nyanaḅọ Ḅe Kụrọ Pịrịmẹ Ini Kpoto Oputẹkẹwarị Mị Nwọ Nama-ẹ

¹ Darịọs ḅe Pesia mị ḅie amanyana maịn karama kụra mị ḅie, sonio akalụ mị ḅie ngei ene mị ḅụ, Nyanaḅọ Ḅe ịkịankoro Hagaị ḅe ḅụ ḅọrọ ọkwẹịnmẹ. Oku mị anị sime Juda mị ḍikiḍiki sime gọvịnaḅọ Zẹrubabẹl, Shealtịẹl yaḅe na pịkị Gele Agbamịẹḅọ Jọsụwa, Jẹhozadak yaḅe na pịrịmẹ.

² Kụrọmamgba Nyanaḅọ Ḅe nwọse Hagaị ḅe ḅẹmẹ, “Mịnapụ ma nwọ ḅẹmẹ na mị sịkị mị anị Oputẹkẹwarị mị namaḅịa sịkị anịka-ẹ.”

³ Anịgose, wa Nyanaḅọ Ḅe Hagaị ḅe ḅụ ḅọrọ mị oku mị se tomonima pịrịmẹ:

⁴ “Ị̀ya tomoni, nde ó gose ini iḅi ọkụma nama warịma ḅie angaḅịaye-ẹ, ị̀ya Oputẹkẹwarị mị kan koro simearịogbo?

⁵ Paka ọ́ pịrịarịaye ma ómine ọrịka?

⁶ Ọ́ ḅakama ịpịamgba ḍipisam, ọkụma ómine ngịsị boka ye sokumẹ. Ọ́ ḅakama fịye nyanamẹ, ọkụma anị ọ́mịna ḅụlọ ḅeinmakẹ, fịye pa ọ́ tarịaḅẹ. Ọ́ ḅakama iru nyanamẹ, ọkụma ó ḅu ọ́mịna ḅụ ma na karaḅịa ḅara anị nwọse ḅakakẹ. Ọ́ ḅụchụaye nyanamẹ, ọkụma ọ́mịna ojuma nwana-nwanamaḅịa ḅara anị nwọ simekẹ. Pịkị fịrịnwẹngị ḅọḅe ó se ḍumoma munḅịa igbiki ini nwọse ḅakama ọ́ gbẹịnkẹ.

⁷ Ómine ineda ọrịka mịn mị gose ọkọ pakaye?

⁸ Mịọkụ ọ́ chịngịma tanjị, chịn pẹlẹ, se kpoto Oputẹkẹwarị mị nama; anịsịkị anị ị̀ ḅụḅẹlẹḅịa, ị̀ tẹkẹ gbẹịn ḅara ọ́ nwọse ị̀ tẹkẹ.

⁹ “Ị́ koromamẹ na ị́ ḅakama ye sokuḅịa, ọkụma arịa pakaḅo ḅara mị ngịsị bokẹ. Ị́ ḅụkụrọma soku kalaye ma ḅo warị lasịkị à mịẹse àrị mụmamụma ma famẹ. Cheye gose àrị anị mị mịẹ? Anịatịḅị ị̀ya Oputẹkẹwarị mị kansara waraḅẹ, anịsịkị ọ́mịna ḅie ọrụḅọ ọrụḅọ nụḅọ angaḅịa warị mị gose kụrọma fịrịnwẹngịaḅẹ.

¹⁰ Anịgose mị ene korokaye-ẹ, ḍipiaye pịkị paka ẹkẹ.

¹¹ À mịẹse kụrọ ịrụa kpoin kiri ọgọnọ ma na—chịngịma ọgọnọ ma na, fịayemgbọlụ ozuma ḅie na, irumịẹ chịnmgbọlụ ozuma ḅie na, oliv ozuma ḅie na—kiri mị pakụma pakụmaye goyegoye ọgọnọ na, tomoni ọgọnọ na, namama ọgọnọ na, ḍipi se pakaḅịaye goyegoye ọgọnọ na sarasam.”

Tomoni Ma Nyanaḅọ Ḅe Ḅịpị Pokimẹ

¹² Se anị Zẹrubabẹl ḅe na Jọsụwa ḅe na pịkị ini de Babilọn ḅie sẹịn se vinpịkị ḅoapụ ma na, Nyanaḅọ inia Tamụnọ Ḅe ḍuko ini pịrị ayema mịẹye-ẹ. Inia ḅalafamẹ se ini ịkịankoro Hagaị, Nyanaḅọ Ḅe okunwẹngịḅọḅe, ḅịpị poki mẹ.

¹³ Se anị Hagaị ḅe ọ̀ Nyanaḅọ Ḅe oku mị se tomonima pịrịye-ẹ: “Àrị ómine na simeḅịa anị à ḅereniye mị-ẹ.”

¹⁴ Oputẹkẹwarị mị nama gose, Nyanaḅọ Ḅe, ọrụḅọḅọ kuḅie jikemẹ mịẹse ini fịrị mị nwẹngịḅịa ọkụ: Zẹrubabẹl, Juda gọvịna ḅe na; Jọsụwa, Gele Agbamịẹḅọ ḅe na, pịkị ini de Babilọn ḅie sẹịn se vinpịkị ḅoapụ mamgba na. Ini sakị paka Kụrọmamgba Nyana inia Tamụnọ Ḅe Oputẹkẹwarị mị ḅụ fịrịnwẹngịmẹ,

¹⁵ mịn mị kiri ọkị sịkị anị sonio kara akalụ mị ḅie ḅụ si inein-a ḍin fịnjị ene, anị Darịọs ḅe ḅo amanyana mama kụra karama kụra mị ḅie ḅụ.