Galesia 6 - Kịrịkẹnị Baịbụl

Ọ́ Jịnḅọ Jịnḅọ Ḅụfụka Nemi

¹ Ị̀ya mịnapụ, ó nemikase ḅẹyeḅẹye ḅụ mịẹkuramaka ḅọ nwọ kunmẹ ḅẹḅẹ, ómine tẹmẹ ḅụ nwẹngịarịapụ ma, iniḅọ datekerema; ọkụma ó dein ḅara se anị mị-ẹ. Se ómine ọ́ ḅụ ọbị mịẹse ómine sọnị mun telima ḅie sọ ẹka ọkụ.

² Ḅụfụka ḅie ọ́ ḅarachụa jịnḅọ jịnḅọ pịrị, se mịn ḅara mị ḅụ ọ́ Kraịst Ḅe oloko mị ḍukoye nwọ mịẹḅịa.

³ Tomoniḅọ nemikase koromamẹ na iniḅọ ye sọ waraḅẹ iniḅọ ye ḅụ ofori sịkị ḅụ, iniḅọ papa oḅori se iniḅọ ḅụ chịn-aḅẹ.

⁴ Ḅọḅọ iniḅọ yemịẹḅara ḅe ḅẹrẹ nwọ kọn iniḅọ ḅụ pịrị. Anị iḅimẹ ḅẹḅẹ, anịọkụma iniḅọ anị gose opuaye mịẹḅịa, iniḅọ jịnḅọ mịẹye nwọse anị na otoma ḍikiḅịa sịkị.

⁵ Anịatịḅị tomoniḅọ goyegoye iniḅọ ikuye nwọ pụraḅịa.

⁶ Ye ini Tamụnọ ọkwẹịn mị se ḍiearịḅọ ḅe ọ̀ nyana iḅiaye mamgba seni ye se ò ḍiearịḅọ ḅe na ḍia.

⁷ Ómine oḅori se ọ́mịna ḅụ ma chịnma, ineda oḅori se Tamụnọ chịnḅịa ḅọ ofori-ẹ. Tomoniḅọ ḅe ò ḍipiye mị ọ̀ pịkị sokuḅịaye-ẹ.

⁸ Oria ojumịnị mị ḅiarịye ḍipi anị pịrị ḅọ ḅe, anịa ḅụ fị anị ò soku ọkịḅịaye-ẹ! Ọkụma Tẹmẹ Ḅe ḅie oria ye ḍipi ḅọ ḅe, ọ̀ Tẹmẹ Ḅe ḅie ḅụ simegbamaso ḍumo soku ọkịḅịa.

⁹ Anịẹrẹchị, ye ịnyọ mịnaḅụ fama iḅi mịẹ ḅụ, anịatịḅị ịnyọ nemikase mịnaḅụ faka ọkụma, sịkị lasịkị wa ḍipiye wa nwọ sokuḅịa.

¹⁰ Wa sịkị nyanasịkị nyanasịkị, wa iḅi se nweni mgba mịẹ, anịtẹịn-anga kọkọma ḅara se mịna furo mị ḅie ḅereni nyana apụma.

Kuluma Ḅerijine Na Kereniḅịpị Na

¹¹ Mịọkụ, àrị ị̀ ḅara se gịẹịn ọ́ sẹịnma ḍiri mị ḍụḅa la-ọkụ ọ́ nwọ ḍiki!

¹² Pakapaka ḍọkị pịkị tọrụseọrịaye ḅụ wẹrị ḅụboma ḍọkịarịapụ ma mịn pụnụma ọ́ ḅụpẹlẹkapẹlẹka nwọse ọ́ ḅẹ àrịye-ẹ. Ini gose ọkọ mịẹye anị, mịẹse ini Kraịst Ḅe mgbẹsẹchịn mị gose inia tọrụsiọrịma ẹka ḅara.

¹³ Ini ḅụpẹlẹ apụma sọnị Oloko mị ḍukoye mị ini mịẹkẹ; ini ḅimẹ ómine ọ́mịna ḅụ ma pẹlẹ, mịẹse ini anị se inia ḅụbomaḅịa ḅara, na ini mịn mịẹse ómine anị mịẹmịẹye mị nwọ mịẹye-ẹ.

¹⁴ Ị̀rị̀ ọkụma, anị simeọkụ simeọkụ sọnị, wa Nyanaḅọ Jizọs Kraịst Ḅe mgbẹsẹchịn mị kẹngẹ mịn à seni ḅụbomaḅịaye-ẹ, anịatịḅị oria mgbẹsẹchịn mị ḅụ anị tomonikiri mị fịsaye sọ ị̀ pịrịye-ẹ, ị̀rị̀ sọnị pịkị fịsaḅọ sọ tomonikiri mị pịrị waraḅẹ.

¹⁵ Anị ngịsị ḅẹrẹ nyanakẹ tomoniḅọ ḅụpẹlẹ anịkanịka ḅụpẹlẹka mị. Ḅẹrẹ nyanaye anị iniḅọ ḅo ịwọ ḅọ nwọ sọ mị-ẹ.

¹⁶ Inia ḍumo ḅụ, mịn oloko mị nwọ ḍuko nwẹngịarịapụ ma, ye deinma na ḍikiḅụgerere na sime ini pịrị—pịkị Tamụnọ-a tomoni mamgba na!

¹⁷ Ọkwẹịn kuluma ḅụ: ye gbọrịḅọ sọnị gbọrị ḅụfụka sọ nwọse ị̀ pịrị ma, anịatịḅị ị̀ya oju ḅụ sime elekima ma ḍiepakụmamẹ na ị̀rị̀ Jizọs omoniḅọ-ẹ.

¹⁸ Ye wa Nyanaḅọ Jizọs Kraịst Ḅe ḍikiḅụgerere mị ómine mgba na sime, ị̀ya mịnapụ. Amẹn.