Galesia 5 - Kịrịkẹnị Baịbụl

Ọ́mịna Ḅụ Nyana Mị Ọ́ Nwọ Kura

¹ Ngẹrị ḅụ nyana mị sime wa pịrịmẹ—Kraịst Ḅe ọ̀ mịẹse wa mịna ḅụ nyanasam! Anịọkụma mịna ḅụ nyana tomoni ḅara ọ́ nwọse chịẹsime, ọ́ ḅarị ḅereni ma ó vinpịkị mun omoniapụ sọ.

² Poki! Ị̀rị̀ Pọl ḅe ḍuko ọ́ pịrịaḅẹ na ó ḅereni se ọ́mịna ḅụ ma pẹlẹmẹ ḅẹḅẹ, anị fiemẹ na Kraịst Ḅe ngịsị ọ́ ḅụ ò ye sọkẹ.

³ À pịkị ó ḅerijine-aḅẹ ḅereni se mịna ḅụpẹlẹ owuḅọ goyegoye anị mịẹka mịẹka ḅara sime ọ̀ pịrịsam na ò bebe Oloko mị mgba ḍukoye nwọ mịẹḅịa.

⁴ Ómine ḅụkụrọma Oloko mị ḍukoye mịẹ ḅụ ḅọrọ Tamụnọ Ḅe na karakara ḅiarịapụ ma, Kraịst Ḅe ḅụ ómine ọ́mịna ḅụ ma pẹlẹsinsam. Tamụnọ Ḅe ḍikiḅụgerere mị ḅie ọ́ ḅarị ofori-ẹ.

⁵ Mine ọkụma, wa tọrụseḍikiye anị, Tamụnọ Ḅe ómine na karakaraḅịa; mịn mị anị wa pịkị koruarịye-ẹ Tamụnọ Tẹmẹ Ḅe kụrọ mị ḅụ, mịna ḅereni ḅụ ḅọrọ fịrịnwẹngịarịḅọ ḅe.

⁶ Anịatịḅị wa Kraịst Jizọs Ḅe na gbọrịye mịẹ waraḅẹ nwọ ḅẹ sịkị, ḅụpẹlẹ na ḅụpẹlẹka na mịẹ kịrịma gbọrịye sọnị ofori-ẹ; bebema yemịẹ gbọrịye anị ḅẹlẹma ḅụ ḅọrọ fịrịnwẹngịarị ḅereni mị-ẹ.

⁷ Ómine iḅiọkụ mịẹ simemẹ! Tụḅọ ó kiki se ọ́ ḅarị kọkọmaye mị ḍukoyemịẹka? Nde ọ̀ mịẹse ọ́mịna tọrụ irima ọkụ?

⁸ Ómine chịn Tamụnọ Ḅe anị mịẹkẹ.

⁹ “Boka fịturu sumaye mị, anị mịna-mịnaka ḅaka fịturu mị nwọ sumaye-ẹ,” ini ḍuko ḅara ḅụ.

¹⁰ Ọkụma à pa kuḅie se ọ́mịna ḅụgbana waraḅẹ. Mịna ḍumo se Nyanaḅọ Ḅe na gbọrịye mịẹ mị mịẹse à kuḅie se ọ́mịna ḅụgbanamẹ, na ó jịn kịrị tọrụ nwọ chụa ẹkẹ, na ọ́mịna tọrụirimarị ḅọ ḅe, ò simeọkụ simeọkụ sọnị Tamụnọ Ḅe ḅụfụka seni ọ̀ pịrịḅịa.

¹¹ Ị̀rị̀ ọkụma, ị̀ya mịnapụ, à nemikase pa ḍuko na ḅụpẹlẹ mị ḅụpalịmamẹ nwọ ḅẹ ọkụma ini cheye gose pa ị̀ tọrụsiọrịma-ao? Anị mị nemikase kọkọmaye ọkụma, mgbọkụ ị̀ya Kraịst mgbẹsẹchịn ḅẹrẹ ḍuko mị ḅụfụka dekiḅo ẹkẹ.

¹² À ḅimẹ ọ́mịna ḅụḅalaḅalamarịapụ ma gbọtụḅara mun inia ḅụ ma nwọ po-eke la!

¹³ Ómine ọkụma, ị̀ya mịnapụ, ómine ọ́mịna ḅụ nyanaḅịaye gose ini ọ́ chịnmẹ. Ọkụma ó ḅereni se mịn ḅụ nyana mị, se gbẹịnma siye mịẹma, mịẹse ọ́mịna ojuma ḅiarịye ḅẹrẹtọn ọ́ pịrịye sọ ẹka ọkụ. Anịnakaraka, ye ḅẹlẹma mị ọ́ mịẹse ọ́ fịrịnwẹngị jịnḅọ jịnḅọ pịrị.

¹⁴ Anịatịḅị bebe Oloko mị mgba ini nwọ koḅirima se gbọrị Oloko mịẹmẹ, “Ị́ ḅụ ḅẹlẹma ḅara nwọse ị́ juo tomoniḅọ ḅẹlẹma.”

¹⁵ Ọkụma ó nemikase owoi nama yemịẹ ọkụ nwọ mịẹ ọkụma, se ye se jịnḅọ jịnḅọ lama ọkụma, anịgose ómine ọbị anịka ó jịnḅọ jịnḅọ ḅaafamaḅịa.

Tẹmẹ Na Ojumịnị Na

¹⁶ Mịn à ḍukoarịye mị-ẹ: ye Tẹmẹ Ḅe ọ́mịna ḍumo ma nwọ dagbụkụkụma, mịẹse ómine ojumịnị mị ḅiarịyema ọ́ nwọ mịẹ ḅeinma ẹka ḅara.

¹⁷ Anịatịḅị mịna ojumịnị mị ḅiarịyema Tẹmẹ Ḅe ḅiarịyema na tụḅụrụmẹ, Tẹmẹ Ḅe ḅiarịyema pịkị mịna ojumịnị ma ḅiarịyema na tụḅụrụmẹ. Mịna mamaye ma taraka apụ-ẹ, mịn mị fieaḅẹ na ómine ineda ó mịẹḅịa ẹrẹchị ḍọkịarịye mị nwọ mịẹ ẹkẹ.

¹⁸ Tẹmẹ Ḅe nemikase ọ́ dagbụkụkụmamẹ ḅẹḅẹ anịọkụma, ọ́ ḅarị Oloko mị chuku ḅie sime ẹkẹ.

¹⁹ Ojumịnị mị mịẹarịaye ma opuma ḅelemẹ. Anị mịnaḅụ ḍiepakụmamẹ, sẹfị, fịafịaka ḍumo, pịkị ḅụjịnjịnma mịẹmịẹaye na;

²⁰ oru tẹkẹ na, ḍirikọrị, taraka, owusọ, jịn apụ ḍikipụkọsoli, ịganịḍọkị, puaḍọkị, ngẹrịfịḍọkị, kamụḍọkị, juḍia, pịkị ogbo tọn;

²¹ jịnḅọ ḍikiḅụnwọnwọ, iruḅutọrụḅaama, tọrụḅẹlẹ ḅụtima na àrị kịkẹ jịn aye na. À tatarị ó tetema sa ḅara ḅụ: mịn mịọkụ à pịkị ó tetemarị ọkụ-ẹ, na mayema mịẹarịapụ ngịsị Tamụnọ Amanyanakiri mị ḍiaọkị ẹkẹ.

²² Ọkụma Tẹmẹ Ḅe chịnmgbọlụma, ma àrị-ẹ, ḅẹlẹma, ḅieḅẹlẹ, deinma, ye-inema, iḅimịẹ, iḅi ḍumo kuḅie se ḅụgbana gbẹịn,

²³ ḅụiderima, pịkị ḅụọlọ. Mayema àrị oloko na tụḅụrụkẹ.

²⁴ Se sime Kraịst Jizọs Ḅe pịrị apụma ini inia ojumịnị ma ḅe yemịẹḅara mị nwọ ḅaasam, anịḅe pụkọtarịye ma na anị ḅiarịye mamgba na.

²⁵ Tẹmẹ Ḅe ḍumo nwọ seni wa pịrịsam; ọ̀ pịkị ḅẹrẹtọn mịna ḍumo ma nwọ pịrịḅịa.

²⁶ Wa opuaye mịẹma, anịkanịka jịnḅọ jịnḅọ ịganịma ma, anịkanịka jịnḅọ jịnḅọ ḍikipụkọsoli ma.