Galesia 3 - Kịrịkẹnị Baịbụl

Oloko Anịkanịka Ḅereni

¹ Ómine yenemika Galesiapụ! Tụḅọ ọ́mịna ḅie ḍin? Ómine mgba tọrụkuḅu ḅụ mgbẹsẹchịn ọgọnọ Kraịst Ḅe ḅakụḅaa ọkụ mị ini nwọ ḍuko ḅelema ọ́ pịrịmẹ.

² Mịn gbọrịye mị kẹngẹ ọ́ nwọ ḍuko ọkọmụ; Oloko mị ḅiye mịẹ ḅụ ọ́ ḅọrọ Tamụnọ Tẹmẹ Ḅe nwọ ọkị mụnọ, se iḅiọkwẹịn mị na se pịkị anị ḅereni mị ḅụ ọ́ ḅọrọ ori ọkị?

³ Nde ó gose ineda nwọ sime oḅori sọye! Ọ́ Tamụnọ Tẹmẹ Ḅe ḅụ wẹrị sakịmẹ; mịọkụ ó ḅi-ao ómine ọ́mịna kụrọ ḅụ wẹrị anị mịẹkarama?

⁴ Ómine ọrị tọrụsiọrị mamgba papa faye sọ ḅe? Pikipikiye ofori-ẹ, papa fakẹ!

⁵ Ómine Oloko mị ḅiye nwọ mịẹye gose Tamụnọ Ḅe ọ̀ Tẹmẹ Ḅe seni ọ́ pịrị, pịkị ọ́mịna ogboku ḅụgbiripumaye mịẹ mụnọ, se ómine iḅiọkwẹịn mị naa pịkị anị ḅereniye gose?

⁶ Fịafịa ḍiri mị Ebraham ḅe ḅụ ḍukoye mị nwọse ḅiekoroma na, “Ọ̀ Tamụnọ Ḅe ḅerenimẹ, se ọ̀ Tamụnọ Ḅe ḅụ nyana ḅereni mị gose, Tamụnọ Ḅe karakara ḅọ ḅara nwọse ori ọkịmẹ.”

⁷ Anịọkụma ó nemi gbẹịnmẹ, na kọkọma Ebraham ḅe ḅụ pakaḅo apụma anị ḅereni nyana apụ ma-ẹ.

⁸ Fịafịa ḍiri mị pịkịna tatarị ḍukosam na Tamụnọ Ḅe Jịnsẹapụma inia ḅereni ḅụ ḅọrọ ini na karakaraḅịa. Anịgose Fịafịa ḍiri mị iḅiọkwẹịn mị ḅụ ḅọrọ ḍuko Ebraham ḅe pịrịmẹ na: “Tamụnọ Ḅe ị́ ḅụ ḅọrọ tomoni mamgba nwọ ḅẹlẹmaḅịa.”

⁹ Ebraham ḅe ḅereni se ḅẹlẹma nwọ nyana ọkụ mị; anị ḅereni apụma ḅẹlẹma nyana sa ọkụ-ẹ.

¹⁰ Kuḅie se Oloko mị ḍukoye mịẹ ḅụ gbana apụma ini worinime chuku ḅie omi-ẹ. Anịatịḅị fịafịa ḍiri mị nwọ ḅẹmẹ, “Sịkịmamgba Oloko ḍiri mị ḅie gịẹịnye goyegoye nwọ mịẹka ḅọ goyegoye Tamụnọ worinime chuku ḅie iniḅọ omi-ẹ!”

¹¹ Mịọkụ anị ḅelemẹ na Oloko mị ḅụ ḅọrọ Tamụnọ Ḅe na karakara gbọrị tomoniḅọ sọ ofori-ẹ, anịatịḅị fịafịa ḍiri mị nwọ ḅẹmẹ na, “Ḅereni ḅụ kẹngẹ ḅọrọ Tamụnọ Ḅe na karakara ḅọ ḅe mị ḍumoḅịaye-ẹ.”

¹² Ọkụma Oloko mị anị ḅereni na mịẹgboloma nyanakẹ. Anịnakaraka, fịafịa ḍiri mị ḍuko ḅara ḅụ, “Oloko mị ḅiye mịẹḅọ goyegoye iniḅọ ḍumoḅịa.”

¹³ Ọkụma Kraịst Ḅe ḅo wori sa ḅọ sọ wa pịrị sa ye gose, ori Oloko mị ọkịḅo worinime mị ḅie mine pẹkẹrẹ pakụmaḅosam, anịatịḅị fịafịa ḍiri mị nwọ ḅẹmẹ na, “Ini se chịn ọgọnọ sololo ḅọ goyegoye iniḅọ Tamụnọ worinime chuku ḅie omi-ẹ.”

¹⁴ Kraịst Ḅe mịn mị nwọ mịẹmẹ, mịẹse Tamụnọ Ḅe ḅereni se Ebraham ḅe pịrị ḅẹlẹma mị, ini nwọse Kraịst Jizọs Ḅe ḅụ ḅọrọ Jịnsẹapụma pịrịḅịa ọkụ, mịẹse ḅereni ḅụ wa ḅọrọ Tamụnọ Ḅe ḅereni Tẹmẹ Ḅe nwọ daọkịḅịa ḅara.

Oloko Mị Na Yeḅereniḅịpị Mị Na

¹⁵ Ị̀ya mịnapụ, àrị eneḅeneḅene ḅụ mịẹarịye nwọse ye otoma-ẹ mun aḅẹ; mama apụ ye ḅụ ḅịpịogbosọ nyana se anị gose ḅara se ḅịpịogbosọ ḍiri pụnụ ọkụma, gbọrịḅọ sọnị anị kan ẹkẹ pịkị ye seni anịa ḅụ chụa ẹkẹ.

¹⁶ Mịọkụ, Tamụnọ Ḅe yeḅereni Ebraham ḅe pịrịmẹ, pịkị ọ̀ ḅụ pakaḅoḅịa ḅọ ḅe na, fịafịa ḍiri mị anị ḅakapụ ḅẹkẹ, “ọkụma gbọrịḅọ kẹngẹ-ẹ,” anị fieaḅẹ ẹrẹ go ọkụma anị Kraịst Ḅe-ẹ.

¹⁷ À fiearịye, anị na, Tamụnọ Ḅe Ebraham ḅe na ọḅọkụ fịmẹ, se yeḅerenimẹ na ori anị kokoḅịa. Ọḅụkọ, kụra ẹndẹ na kụra soi na ḅọrọ sịkị pịrị sa Oloko mị, ineda anị ọḅọkụ mị kan se Tamụnọ Ḅe ḅerenisaye mị sin ẹkẹ.

¹⁸ Anịatịḅị Tamụnọ Ḅe ḍiepịrịye mị nemikase Oloko mị ḅụ sẹrẹrẹmẹ nwọ ḅe ọkụma; anị simeọkụ simeọkụ sọnị, Tamụnọ Ḅe ḅereni Ebraham ḅe pịrịye mị gose mị ori anị ḍiepịrịye mị nwọ seni Ebraham ḅe pịrịye-ẹ.

¹⁹ Anịọkụma nde Oloko mị gose mịẹye? Ini gose anị se chụa ye, anị se mịẹirima mị ḍiepakụmaḅịa ẹrẹchị-ẹ, anị pịkị sime Ebraham ḅe ḅụ pakaḅoḅịa ḅọ ḅe ḅoḅịa sịkị laḅịa, anị yeḅereniḅịpị mị sime pịrị ḅọ ḅe. Oloko mị enjẹlapụ mị anị daḅọrọmaḅoye-ẹ. Tamụnọ Ḅe na mine na ogboku sime ḅọ ḅe ḅara ḅụ.

²⁰ Ọkụma ini ḅikẹ gbọrịḅọ kẹngẹ sọnị anịa ogboku sọpaka nwọ gbọrịḅọ-ẹ ḅe sịkị, se Tamụnọ Ḅe gbọrịḅọ-ẹ.

Oloko Mị Gose Simeye

²¹ Mịn mị anị ḍie-ao na Oloko mị anị Tamụnọ Ḅe yeḅereniḅịpị ma na tụḅụrụ? Ẹn-ẹn, ngịsị ọkọkẹ! Anịatịḅị tomonima nemikase ineda ḍumo ọkịḅoḅịa oloko nwọ nyanaḅomẹ ḅẹ ọkụma, mgbọkụ tomoniḅọ goyegoye ineda Tamụnọ Ḅe na karakaraḅịa anịa ḅịpịpoki mị ḅụ.

²² Ọkụma fịafịa ḍiri mị nwọ ḅẹmẹ na bebe tomonikiri mị mgba si mị kụrọ chuku ḅie omi-ẹ; anịẹrẹchị sime Jizọs Ḅe ḅụ ḅereni nyana apụma pịrị ḍiepịrịye mị, ini anị se ḅereniapụma kẹngẹ nwọ pịrịmẹ.

²³ Ọkụma ḅereni sịkị mị ma ḅo laka simeogbo, Oloko mị ikoliapụ ḅara nwọse wa ịkasị koromamẹ ọkịmun ḅoarị ḅereni mị ḍieḅelema sịkị laḅịa.

²⁴ Anịẹrẹchị Oloko mị anị mịna ḅụ kụrọ nwọ nyanamẹ, ọkịmun Kraịst Ḅe ḅo ḅịa sịkị nwọ la, mịẹse wa ḅereni ḅụ ḅọrọ Tamụnọ Ḅe na karakaraḅịa ḅara.

²⁵ Mịọkụ ḅereni mị ḅo lasa sịkị, wa ḅarị Oloko mị chuku ḅie ofori-ẹ.

²⁶ Ḅereni ḅụ mị ómine mgba ḅọrọ ḅo Tamụnọ awọ sọsaye-ẹ Kraịst Ḅe na gbọrịye mịẹ ḅụ.

²⁷ Kraịst Ḅe na gbọrịye mịẹ gose ini mengi seni ọ́ saramẹ, ḅẹrẹ ḍuko ḍuko ḅara ḅụ, mịọkụ ini Kraịst Ḅe ḍumo nwọse ḅụchụaye mịẹ ọ́ chụasam.

²⁸ Anịọkụma kịrịye ḅarị ofori-ẹ Juapụma na Jịnsẹapụma na ogboku ḅụ, omoniapụ na furoawọ na ogboku ḅụ, eremeni na owuapụ na ogboku ḅụ, ómine mgba gboloma Kraịst Jizọs Ḅe na gbọrịye nwọ mịẹmẹ.

²⁹ Ó nemikase sime Kraịst Ḅe pịrịmẹ ḅẹḅẹ, anịọkụma, ómine Ebraham ḅe ḅụ pakaḅoapụ-ẹ, se Tamụnọ Ḅe yeḅereniḅịpị mị ọ́ pịkị nwọ ọkịḅịa.