Galesia 2 - Kịrịkẹnị Baịbụl

Pọl Ḅe Na Ísí Okunwẹngịapụ Ma Na

¹ Oyi inein-a kụra fịnjị ḅo ḅọrọ sịkị à vinpịkị Jerusalẹm mun mẹ, Banabas ḅe na ị̀rị̀ na, Taịtọs ḅe nwọ ọkị ị̀ ḅụ chụamẹ.

² À gose munye anị Tamụnọ Ḅe anị se ḅelema ị̀ ḍiemẹ na à mun. Se tịḅịda apụma na kikima anga ịrịamamẹ, anịsịkị à ḍuko Jịnsẹapụma pịrịarị iḅiọkwẹịn mị nwọ ḍuko ḅelema ini pịrịmẹ. À ḅikẹ à nwẹngịsa fịrịma ḅo papaye nwọ sọ.

³ Ị̀rị̀ na agbamaḅọ Taịtọs ḅe, ori Grik ḅọ-ẹ nwọ ḅẹ sọnị, ḅụpẹlẹkapẹlẹka nwọ ḅẹ ḅara ini nwọse ori na yemịẹkẹ,

⁴ dapụ ḍọkịmẹ ori anị mịẹ nwọ ḅẹ sọnị. Ini sọnị ḅereni apụ-ẹ nwọ ḅe ḅara ini nwọse yemịẹmẹ, mịna apụma ye ẹnyẹ apụ ḅara se sịnịnị mịna ogboku sọ ḅomẹ, mịẹse Kraịst Ḅe na mine na ḅe gbọrịye mịẹ mị ḅụ, wa ḅọrọ mịna ḅụ nyana ọkụ nwọ ḍọkịḅoḅịa ẹrẹchị. Ini wa se omoniapụ mịẹ ḍọkịmẹ,

⁵ ọkụma mịẹse iḅiọkwẹịn mị ḅe karakara mị wẹrị kpaịnma ọ́ pịrịḅịa ẹrẹchị ngịsị wa sịkị se ini pịrịkẹ.

⁶ Ọkụma inia ḅie tọrọkọ da apụ simeọkụ sime apụ ma—à mịn mị nwọ ḍukoaḅẹ anịatịḅị ị̀ ḅụ anị opu kịrịye mịẹkẹ ini sọye sọye sọnị, anịatịḅị Tamụnọ Ḅe ò nweni-a tọrụ kun ḅẹrẹkọnkọnkẹ—à nwọ ḅẹrẹ ḅẹ tọrọkọ da apụma ini ịwọma koromaḅo ḍuko ị̀ pịrịye ofori-ẹ.

⁷ Anịnakaraka, ini ọrịmẹ na Tamụnọ Ḅe iḅiọkwẹịn mị ḍuko Jịnsẹapụma pịrị fịrị mị nwọse ị̀ pịrịsam, ò se Pita ḅe pịrị se ori anị ḍuko Juapụma nwọ pịrị ḅara mị.

⁸ Anịatịḅị Tamụnọ kụrọ ḅụ ini ị̀ se okunwẹngịḅọ mịẹ Jịnsẹapụma pịrịmẹ, ini Pita ḅe nwọse okunwẹngịḅọ mịẹ Juapụma pịrị ọkụ mị.

⁹ Jems ḅe na, Pita ḅe na, pịkị Jọn ḅe na tọrọkọ da apụ ọkụ sime apụma nemi ḅomẹ na Tamụnọ Ḅe sosikima mịn fịrị mị se ị̀ pịrịsam; anị ini Banabas ḅe na ị̀rị̀ na ḅara nwọ daye-ẹ. Se ḍiepakụma na mine mgba gbọrị arụapụ-ẹ. Mịna ḅịpịogbosọmẹ na Banabas ḅe na ị̀rị̀ na Jịnsẹapụma ogboku ḅụ fịrịnwẹngị, ini ma pịkị Juapụma ogboku ḅụ sime fịrịnwẹngị-ẹ.

¹⁰ Ini ḅelema ḅiye, anị wa inia ogboku sime mịẹḅịa ọkụ ofori apụma nwọse ḅiekoroma-ẹ, anị gbọrịye mị mịẹ ḅụ ị̀ kuḅie pịkị chịẹ-chịẹ-chịẹmẹ.

Pọl Ḅe Antiọk Ḅie Pita Ḅe Ḍiki Ịganịmẹ

¹¹ Ọkụma Pita ḅe ḅo Antiọk lasịkị, à tomoni ogboku ori na tụḅụrụmẹ, anịatịḅị ò jokoma mịẹirimamẹ.

¹² Jems ḅe se sẹịn owuapụma ḅo anịnyọ lakasịkị, Pita ḅe Jịnsẹapụma ḅie ḅereniapụma na yefịfịmẹ. Ọkụma mịna owuapụma ḅo lasịkị, ori ọ̀ ḅụ jinesinmẹ, se ḅarị Jịnsẹapụma na yefị ḍụkụkẹ, anịatịḅị ori ini ḅụpẹlẹ-ẹ nwọ ḅẹ apụma ḍikiḅalafamẹ, ori inia ḅụ omi-ẹ nwọ ḅẹye gose.

¹³ Ísí Juapụma ḅụ mịnapụma sọnị pịkị Pita ḅe ḍikima ḅalafa apụ nwọ sọmẹ; Banabas ḅe sọnị pịkị sịnịnị mun inia ḅalafa mịẹmịẹye mị ḅie sọmẹ.

¹⁴ À ḅo ọrị na ini gbụkụkụma iḅiọkwẹịn mị ḅe kọkọmaye mị ḍuko nwẹngịkẹ nwọ ḅe sịkị, à nwọse nweni mgba tọrọkọ ḅụ Pita ḅe ḅẹmẹ, “Ị́rị́ Juḅọ-ẹ, anị sọnị Jịnsẹḅọ ḍumokọn ọkụ ị́ nwọse ḍumokọn simemẹ, Juḅọ ḅarakẹ. Nde anịọkụma ị́ ineda kụrọ ḅara se Jịnsẹapụma mịẹse ini Juapụ ḍumo nwọ kọnḅịa ọkụ?”

Juapụ Ma Na Jịnsẹapụ Ma Na Ḅereni Ḅụ Ini Ḍụaḅọrọma Nyanamẹ

¹⁵ Kọkọmaye-ẹ, yi ḅara ḅụ mine Juapụ-ẹ, mine “simịẹ Jịnsẹapụma kẹ,” ini se ini chịn ḅara ḅụ.

¹⁶ Anị sọnị, wa nemimẹ, na Jizọs Kraịst Ḅe ḅụ kẹngẹ mị tomoniḅọ ḅọrọ ḅo Tamụnọ Ḅe na karakaraḅịaye-ẹ, ngịsị Oloko mị ḅiye nwọ mịẹ mị ḅụkẹ.

¹⁷ Anịọkụma Kraịst Ḅe na gbọrịye mịẹ ḅụ wa ḅụkụrọma ḅọrọ ḅo Tamụnọ Ḅe na karakarasam nwọ ḅẹsịkị, mine ma sọ Jịnsẹapụma simịẹ ọkụ mịẹmẹ—anị nwọ fie-ao na Kraịst Ḅe si mị ḅe fịrịnwẹngịḅọ-ẹ? Anị gose ọkọpakaḅịaye ofori-ẹ!

¹⁸ À nemikase sakị pịkị à kansarasa Oloko mịẹye mị nwọ nama chịẹmaḅẹ nwọ ḅẹ ọkụma, anịọkụma àrị ị̀ ḅụ ḍiepakụmaḅẹ na ị̀rị̀ Oloko kan ḅọ-ẹ.

¹⁹ Oloko mị na gbolomaye ḅụ, anị sime la-ọkụ la-ọkụ sọnị, ị̀rị̀ fị sa ḅọ-ẹ—Oloko mị ḅara na ḅaa sa ḅọ-ẹ—mịẹse à ḍumo Tamụnọ Ḅe pịrịḅịa ọkụ. À Kraịst Ḅe na oria mgbẹsẹchịn ọgọnọ fịsam,

²⁰ anịẹrẹchị, ḍumoarị ḅọ ḅe ḅarị ị̀rị̀kẹ, ọkụma Kraịst Ḅe mị ị̀ ḅie ḍumoarịye-ẹ. Mịọkụ à kọn-arị ḍumo mị, à Tamụnọ Tọkụ Ḅe ḅụ nyana ḅereni ḅụ mịn à ḅọrọ se ḍumoarịye-ẹ, ị̀ ḅẹlẹma se oria ḍumo se ị̀ pịrị ḅọ ḅe.

²¹ Tamụnọ Ḅe ḍikiḅụgerere mị àrị anị sịkị ḍụkụkẹ. Ọkụma ini nemikase, Oloko ḅụ ḅọrọ tomoniḅọ mịẹse iniḅọ Tamụnọ Ḅe na karakaramẹ ḅẹḅẹ, anị fiemẹ na Kraịst Ḅe kọn fị mị papa famẹ!