Galesia 1 - Kịrịkẹnị Baịbụl

¹ Mịn fịrịfịrịma ḍiri mị Pọl ḅe ḅara ḅomẹ, ọ̀ chịn se ò ḅo okufịrịnwẹngịḅọ sọ mị tomoniḅọ ḅara anị ḅokẹ, pịkị tomoniḅọ ḅụ anị ḅọrọ mịẹkẹ, ọkụma Jizọs Kraịst Ḅe na Tamụnọ Ḍaḅọ Ḅe na ḅara mị anị ḅoye-ẹ, fị ḅụ ọ̀ sịsẹma ḅọ ḅe.

² Mịanga sime mịnapụ mamgba ị̀ ḅụ sọ kereniḅịpị seni Galesia chọchị ma fịrịmamẹ:

³ Ye Tamụnọ mịna Ḍaḅe na pịkị Nyanaḅọ Jizọs Kraịst Ḅe na ḍikiḅụgerere na deinma na seni ọ́ pịrị.

⁴ Mịna Tamụnọ pịkị mịna Ḍaḅe ḅịpịpoki ḅụ, Kraịst Ḅe ọ̀ ḅụ se agba mịẹmẹ mịna sima gose, mịn si tomonikiri mị ḅie mine ḍụaḅọrọmaḅịa ẹrẹchị.

⁵ Boma mị sime Tamụnọ Ḅe pịrị ḅẹsịkị ḅẹsịkị ḅụ! Amẹn.

Anị Iḅiọkwẹịn Mị

⁶ Ómine ị̀ ḅụgbiripumamẹ! Sịkị ma ḅọrọka simeogbo Kraịst Ḅe ḍikiḅụgerere mị ḅụ ḅọrọ ọ́ chịnḅọ ḅe ọ́ nwọ koromaso mun jịn iḅiọkwẹịn ọkịaḅe.

⁷ Anị sime ḅara “jịn iḅiọkwẹịn sọnị ofori-ẹ,” ọkụma à mịn mị nwọ ḍukoaḅẹ anịatịḅị ọ́mịna kuḅie lọkọma àrị apụ omi-ẹ, Kraịst Ḅe iḅiọkwẹịn mị pịkị iḅo ḍọkịarị apụ.

⁸ Ọkụma ḅọrọ nemikase mine-o anịkanịka ḅọrọ soḅie koroḅo enjẹlapụ sọ, wa ḍuko ọ́ pịrị sa iḅiọkwẹịn mị sikima ḅe jịnye ḍukoḅịa ḅọ, ye Tamụnọ worinime sime iniḅọ pịrị!

⁹ Wa tatarị ḍuko ḅọrọsam, à pịkị mịọkụ ḅarị anị ḍukoaḅẹ na nemikase tomoniḅọ wa ḍuko ọ́ pịrị se ómine ọkị sa iḅiọkwẹịn mị sikima, jịnye nwọ ḍuko ọ́ pịrịmẹ ḅẹḅẹ, ye Tamụnọ worinime sime iniḅọ pịrị.

¹⁰ Mịn mị anị fie-ao na à tomoniḅọ tokoni ḅịpị nwọ ḍọkịaḅẹ? Anịkẹ, ngịsị! À ḍọkịarịye Tamụnọ tokoni ḅịpị-ẹ! Tomoniogbo ḅie àrị ẹrẹ paka ḍọkị-ao? Àrị anị mị nwọ mịẹḅịa ẹrẹchị ḍọkịaḅẹ ḅẹḅẹ, ị̀rị̀ ḅarị Kraịst Ḅe fịrịnwẹngịḅọkẹ.

Pọl Ḅe Ḅo Okunwẹngịḅọ Nwọ Sọ Ḅara Mị

¹¹ Ye à ḍuko ọ́ pịrị, ị̀ya mịnapụ, na à ḍukoarị iḅiọkwẹịn mị tomoniḅọ ḅara ḅụ ḅo ị̀ layekẹ.

¹² Àrị anị ọkị gbọrị tomoniḅọ ḅara sọnị ofori-ẹ, pịkị anị seni ị̀ ḍieḅọ sọ ofori-ẹ. Jizọs Kraịst Ḅe mị ḅelema anị seni ị̀ ḍieye-ẹ.

¹³ Ini ḍuko ọ́ pịrịsam à ḅara wẹrịma ḍumo kọnkọn ḅara mị, àrị ị̀ kuḅie se Juapụ Tamụnọ tẹkẹ ḅara mị ḅie chu gbunma sịkị, à ḍikiḅụgerere nyanaka ḅara se tọrụsiọrị se Tamụnọ chọchị mị pịrị ḅara mị, ị̀ya ịnyọ laḅara à nwọ mịẹmẹ anị famaḅịa ẹrẹchị.

¹⁴ Ị̀rị̀ na oguapụ ma ḅụ tọn apụ ḅụ à tọrọkọ damẹ Juapụ Tamụnọ nemi mịẹmịẹaye ḅụ. Àrị opuma olomu-a dapụ ma ḅe ama mịẹmịẹye ḅụ ọfịrị kuḅie nyanamẹ.

¹⁵ Ọkụma, Tamụnọ Ḅe oria ḍikiḅụgerere ḅụ, ma ini ị̀ yika simeogbo ị̀ sẹlẹọkịmẹ, pịkị ị̀ chịnmẹ fịrịnwẹngị ọ̀ pịrịḅịa ẹrẹchị. Se ori anị ḍuko pẹlẹmẹ

¹⁶ na ori oria Tọkụ Ḅe se ḅelema ị̀ ḍieḅịa, mịẹse àrị ò gboloma Iḅi Ḅẹrẹ mị ḍuko Jịnsẹapụma pịrịḅịa ọkụ. À tetema ọkịḅịaye gose ḍọkịma mun gbọrịḅọ sọ ofori-ẹ.

¹⁷ À pịkịna Jerusalẹm ḅie tatarị okunwẹngị sa apụma sọ damamunkẹ ini ọrịḅịa ẹrẹchị. Anịnakaraka à kirikiri so Arebia nwọ mun mẹ, anịsịkị à pịkị vinpịkị Damaskọs mun mẹ.

¹⁸ Tẹrẹ-a kụra ḅọrọ sịkị re mị à so Jerusalẹm munye-ẹ, Pita ḅe ḅịpị ọkwẹịn naaḅịa ẹrẹchị, àrị ori na mama wiki nwọ simemẹ.

¹⁹ À jịn okunwẹngịḅọ ọrịkẹ Jems ḅe sikima ọkụma, Nyanaḅọ Ḅe numbireowu ḅe.

²⁰ À gịẹịnye mị kọkọmaye-ẹ. Tamụnọ Ḅe ò nemi waraḅẹ na àrị iruokọnkẹ!

²¹ Anị mị ḅọrọ sịkị, à Siria na Silisia na nyọma nwọ mun mẹ.

²² Anịsịkị mị ḅụ Judia ḅie sime chọchị ma ḅie sime apụma tọrụ ḅụ ini ị̀ nemikẹ.

²³ Jịn apụ ḍukoarịye ma kẹngẹ mị ini nemiye-ẹ na: “Mịna tọrụsiọrịma-siọrịma ḅọ ḅe, mịọkụ ọ̀ famaḅịa ẹrẹchị ḍọkị ḅereni mị, ḅe ḅẹrẹ ọ̀ nwọ ḍukoaḅẹ!”

²⁴ Anịẹrẹchị ini ị̀ gose boma se Tamụnọ Ḅe pịrịmẹ.