Filipaị 4 - Kịrịkẹnị Baịbụl

Yeḍie Ḍukoaye Ma Sime Ḅara

¹ Anịẹrẹchị, ị̀ya mịnapụ, ómine ị̀ ḅụ yela ọkụ ḍiki, à pịkị ómine na irima ọkụ ḍiki! Ómine ị̀ mịẹse à ḅieḅẹlẹ ọkụ ḍiki, à pịkị ó seni opuaye mịẹarị ọkụ ḍiki! Anịọkụma, ị̀ya mịnapụ, mịn ḅara mị ọ́ nwọse gagama chịẹ ọ́mịna ḍumo ḅụ Nyanaḅọ Ḅe ḅie.

² Yuodia na Sintiki na, pasisi àrị ọ́ tẹkẹmẹ, ọ́ ḅụkụrọma mịẹse ọ́mịna ḅịpịogbosọ eremeni mịnapụ ḅara ḅụ Nyanaḅọ Ḅe ḅie.

³ Ị́rị́ sọnị, ị̀ya arụḅọ, kuḅie se ḅụgbana gbẹịnḅọ; à ḅiaḅẹ ị́ ḅarachụa mịna eremeni ma nwọ pịrị; anịatịḅị ini kụrọma ị́rị́ na fịrịnwẹngịsam, iḅiọkwẹịn mị nwọ wasama ḅụ, Klẹmẹnt ḅe na pịkị ị̀ pembe fịrịnwẹngịapụ mamgba na, inia ẹrẹma Tamụnọ ḍumo ḍiri mị ḅie gịẹịn sa apụma.

⁴ Ye ọ́ sịkịmamgba ḅieḅẹlẹ nyana ómine Nyanaḅọ Ḅe ḅie, à pịkịna ḅẹaḅẹ ó ḍoroku!

⁵ Ómine iḅiyemịẹḅara nyana ḅẹḅọ ḅẹḅọ pịrị. Nyanaḅọ Ḅe ọ́ ḅọlọka ḅoaḅẹ.

⁶ Ọ́ gbọrịye sọnị gose anịkanịka ḅẹ ma; ọkụma ọ́mịna tẹkẹma ḅie mgba ọ́ Tamụnọ Ḅe ḅara ọ́mịna ḅụpalịmaye nwọ ḅi, sịkịmamgba mịẹḅaka ḅẹ kuḅie nwọse ọ̀ ḅara ye ḅi.

⁷ Se Tamụnọ deinma mị iḅi ḅara nwọse tomoniḅọ yekaịnḅo nẹngịye mị, ọ́mịna kuḅiemgbọlụma na koromama na nwọ kokoḅịa ye ọ́ laka ḅụ Kraịst Jizọs Ḅe na gbọrịye mịẹ ḅụ.

⁸ Anịḅe kuluma, ị̀ya mịnapụ, ómine iḅiaye na, tokoni gbẹịn-aye na, nwọse ọ́mịna kuḅiema ḅie chụa ḅeinma, kọkọmaye, mangịma nyanaye, karakaraye na, ḍukoyeḅụoforiaye na, ḅẹlẹma na gbẹịn-aye; pịkị osi nyanaye na.

⁹ Ómine ị̀ ḅara ḍawọsaye ma na pịkị nyanaḅosaye ma ọ́ nwọse mịẹmịẹye ḅụ chu, ị̀ya ọkwẹịnma ḅụ na pịkị ị̀ya mịẹmịẹaye ḅụ na ọ́ nyanaḅoye ma. Anịsịkị deinma se wa pịrịpịrị Tamụnọ Ḅe ómine na simeḅịa.

Ọ́ Mịẹsam Ḍiepịrịye Mị Gose

¹⁰ Mịọkụ, àrị opu ḅieḅẹlẹ nwọ nyanasam Nyanaḅọ Ḅe ḅie ḅụ, anịatịḅị ọ́ na sịsẹsam ị̀rị̀ na gbakịmaye ḅụ, kọkọmaye na ị̀rị̀ na gbakịmaye ọ́ ḅụ ye lamẹ, ọkụma ómine ẹmbẹ nyanakẹ anị mịẹpakụma.

¹¹ À pịkị ọkọ ḅẹkẹ na ómine ị̀ ḍikitọrụsinmẹ ḅẹ ḅara ị̀ ḅụ anị nwọ simemẹ, anịatịḅị à nyanaye ị̀ ḅụ na deinkoro ḍumo à nwọ ḍawọ nemimẹ.

¹² Àye ḅụ kụrọ nwọ nemimẹ pịkị ye nyana saḅama nwọ nemi waraḅẹ, à pịkị mịn ḅọịye mị nwọ ḍawọ nemisam anị gose, ḅẹnyọ ḅẹnyọ pịkị ḅẹsịkị ḅẹsịkị ḅụ, ye ị̀rị̀ na deinkoromẹ, ị̀ ḅụlọ ḅein-o anịkanịka ḅuru ị̀ tarị sọnị, à nyana ḅakama-o, à pịkị bokaye nwọ nyana sọnị.

¹³ Ye wẹrị simeọkụ simeọkụ sọnị, se anị daḅịa ịnyọ à nwọ nyanamẹ Kraịst Ḅe se ị̀ pịrị kụrọ mị ḅụ.

¹⁴ Ị̀ya ḅụfụka kiri ḅụ ọ́ ḅarachụa ị̀ pịrịye mị ómine opu iḅi mịẹmẹ.

¹⁵ Ómine Filipaị apụma iḅiọkụ nemimẹ na à Masidonia koroma so se Iḅi Ḅẹrẹ mị nwọ ḍukoarị tatarị enema ḅie, ómine ngẹrị mị chọchị ḅara ḅụ ḅarachụa ị̀ pịrịye-ẹ, ómine ngẹrị mị ị̀rị̀ na ị̀ya sọyema na fama na nwọ ḍiaọkịye-ẹ.

¹⁶ Gbọrị sịkị kẹngẹkẹ, à Tẹsalonaịka ḅie sime ḅarachụa ḅisịkị ḅisịkị ómine anị se ị̀ fịrịma fịrịmamẹ.

¹⁷ Anị mị ḅẹkẹ na à papa ḍiepịrịaye nwọ ḅimẹ, anịnakaraka à ḅimẹ sọye sọ ọ́ pịrị.

¹⁸ Ó seni ị̀ pịrịye mamgba ị̀ ḅara lakaramamẹ—pịkị gbanamẹ; ị̀ ḅụlọ ḅeinmẹ, Ipafroditọs ḅe ḅara ḅụ ọ́ sẹịn ḍiepịrịayema à nwọ daọkị sịkị, kụnụ ḍiepịrịaye agba, Tamụnọ Ḅe ọkịgbẹịn pịkị ọ̀ ḅụḅẹlẹ agba ọkụ simemẹ.

¹⁹ Se ị̀ Tamụnọ Ḅe oria pẹrẹ ori na laḅara ḅụ, oria boma mị ḅie, ọ̀ Kraịst Jizọs Ḅe ḅụ ḅọrọ ọ́ ḅụpalịmaye mamgba se ọ́ pịrịḅịa.

²⁰ Boma sime mịna Tamụnọ Ḅe pịrị ḅẹsịkị ḅẹsịkị! Amẹn.

Kuluma Kereniḅịpị Ọkwẹịn

²¹ Tamụnọ-a tomoni mamgba à nwọ kerenimẹ, sime Kraịst Jizọs Ḅe nwọ pịrị apụma. Mịọ ị̀rị̀ na sime mịnapụma inia kereniḅịpị se ọ́ sẹịnmamẹ.

²² Mịọ sime Tamụnọ-a tomoni mamgba kereniḅịpị se ọ́ sẹịnmamẹ, anịtẹịn anga Amanyanaḅọ warị apụma.

²³ Ye Nyanaḅọ Jizọs Kraịst Ḅe ḍikiḅụgerere mị ómine mgba na sime.