Faịlimọn 1 - Kịrịkẹnị Baịbụl

¹ Mịn fịrịfịrịmaḍiri mị Pọl, Kraịst Jizọs Ḅe tịḅị gose ikoli mun ḅọ ḅe na, pịkị mịna numbireowu Timoti ḅe na ḅara ḅụ anị ḅomẹ— Wa se ị́rị́ mịna ikiaḅọ pịkị mịna juo fịrịnwẹngịḅọ Faịlimọn ḅe sẹịnmaḅẹ,

² pịkị ị́ya warị ḅie koḅiria koḅiria chọchị mị na, pịkị mịna nụmbụrarọ Afịa ma na, pịkị Akịpọs, mịna juo owuniḅọ ḅe na:

³ Ye Tamụnọ, mịna Ḍa Ḅe na pịkị Nyanaḅọ Jizọs Kraịst Ḅe na, ḍikiḅụgerere na deinma na se ọ́ pịrị.

Faịlimọn Ḅe Nyana Ḅẹlẹma Mị Na Ḅereni Mị Na

⁴ À tẹkẹ sịkị goyegoye, ị̀ mbire Faịlimọn, àrị ị́ gose tẹkẹ pịkị mịẹḅaka se ị̀ Tamụnọ Ḅe ḅẹḅẹ mẹ.

⁵ Anịatịḅị Tamụnọ-a tomonima ḅụ ị́ ḍiepakụma sa ḅẹlẹma mị à nwọ naamẹ, pịkị Nyanaḅọ Jizọs Ḅe ḅụ ị́ nyana ḅereni mị na.

⁶ Ị̀ya tẹkẹ anị, na mine na ị́rị́ na mịẹgboloma mị ḅụ, anị ḅereniapụ ḅara ḅụ, anị, mịẹse wa Kraịst Ḅe na gbọrịye mịẹ ḍumo mị ḅụ nyana ḅẹlẹma goyegoye ị́ gbunma nwọ kaịnḅo.

⁷ Ị̀ mbire, ị́ya ḅẹlẹma mị, opu ḅieḅẹlẹ na kụrọkuḅie na nwọ ọkịḅo ị̀ pịrịsam! Ị́ Tamụnọ-a tomoni mamgba kuḅie kụrọmasam.

Onisimọs Ḅe Tịḅị Gose Ḅiye Mị

⁸ Mịn mị gose, Kraịst Ḅe ḅụ à nyana mịnaḅọ ḅara ḅụ, àrị ineda dadama ị́ mịẹ gbẹịnye nwọ tọn ị́ pịrịḅịa.

⁹ Ọkụma re, àrị ị́ ḅẹlẹma ye gose mị àrị anị ḅiḅịaye-ẹ. Ị̀rị̀ Pọl, Kraịst Jizọs Ḅe ẹrẹ se chịẹḅọ ḅe mịọkụ pịkị oria ẹrẹ gose ikoli ḅie sime ḅọ ḅe.

¹⁰ Onisimọs, Kraịst Ḅe ḅụ ị̀ya tọkụ ḅe tịḅị gose à tẹkẹ se ị́ ḅara ḅiaḅẹ, anịatịḅị, àrị ikoli ḅie sime oria tẹmẹ anga ḍaḅọ nwọ sọsam.

¹¹ Gbọrị sịkị ị́ ḅụ ò ye sọkẹ ọkụma mịọkụ ò ye ḅụ sọ ị́rị́ na ị̀rị̀ na pịrịsam.

¹² Mịọkụ à pịkị ò se ị́ fịrịmaḅẹ ori anị à ḅakama kuḅie se ḅụgbana ḅọ-ẹ.

¹³ Anị ị̀ ḅụḅẹlẹmẹ ori ị̀rị̀ na mịanga sime, àrị iḅiọkwẹịn mị gose ikoli ḅie simearị sịkị, mịẹse ori ị́ tịḅị ḍinma ḅarachụa ị̀ pịrịḅịa ḅara.

¹⁴ Anị simeọkụ simeọkụ sọnị, à ḅikẹ à kụrọ ḅara se ị̀ya ḅarachụa nwọ nyana, anịnakaraka, ị́rị́ ngẹrị ị́ya iḅi kuḅie nwọse anị mịẹ. Anị gose à gbọrịye sọnị mịẹ ẹkẹ ị́ ḅerenika simeogbo.

¹⁵ Sosi, Onisimọs ḅe ò kele kpụlụ sịkị ḅụ ị́ ḅụ sikimamẹ mịẹse ị́ ori ọkịḅịa sịkị ị́ ori ọkị gbasoḅịa ḅara.

¹⁶ Mịọkụ ọ̀ ḅarị papa omoniḅọ nwọ sọkẹ, ọkụma ọ̀ ḅakama omoniḅọ nẹngịmẹ: ori Kraịst Ḅe ḅie yela mịnaḅọ-ẹ. Ori ị̀ ḅụ yela ọkụ ḍiki! Ọ̀ pịkị ị́ ḅụ yelatẹịnḅịa, omoniḅọ ḅara ḅụ na pịkị Nyanaḅọ Ḅe ḅie mịnaḅọ ḅara ḅụ na!

¹⁷ Anịẹrẹchị, ị́ ḅọrọ nemikase ị̀ se ị́ juo ḅereniḅọ nwọ kịẹnmamẹ ḅẹḅẹ, ị́ ị̀ ọkị ḅara nwọse ori ọkị.

¹⁸ Ò nemikase ị́ mịẹirimamẹ ḅẹḅẹ, anịkanịka ị́ ḅara sa fịmẹ ḅẹḅẹ, anị kịẹn ị̀ pịrị.

¹⁹ Ị̀rị̀, ḅarana mịn mị gịẹịnḅịa: Ị̀rị̀, Pọl ḅe ḅarana se ị́ gbẹịnḅịa. (Ị̀rị̀ anị se ị́ ḅiekoroma gbẹịnkẹ, ye sime ḅara ḅụ na ị́ ị́ḅụ se gbẹịnḅịa sa ị̀ ḅara ị́ nwọ fịmẹ.)

²⁰ Anịẹrẹchị, ị̀ mbire, pasisi mị iḅi mị se ị̀ mịẹ, Nyanaḅọ Ḅe tịḅị gose, ị̀ kuḅie kụrọma, Kraịst Ḅe ḅie mịnaḅọ ḅara ḅụ.

²¹ À nemi kpaịnmamẹ na, à nwọ mịn mị gịẹịn sa sịkị, à ḅiye mị ị́ nwọ mịẹḅịa—kọkọmaye-ẹ, à nemimẹ na ị́ pịkị mịẹ à ḅi ḅara mị nwọ nẹngịmaḅịa.

²² Mịn gbọrị sịkị mị ḅụ, ị́ya warị ḅie gbọrị ḅie karakarama ị̀ pịrị, anịatịḅị à tọrụseḍikiaḅẹ na Tamụnọ Ḅe ọ́mịna tẹkẹma nwọ pẹkẹrẹḅịa pịkịna ị̀ se ọ́ pịrịḅịa.

Kuluma Kereniḅịpị

²³ Ẹpafras, Kraịst Jizọs Ḅe tịḅị gose ị̀rị̀ na ikoli ḅie sime ḅọ ḅe, oria kereniḅịpị se ọ́ sẹịnmamẹ,

²⁴ anị gbọrị ḅara ḅụ ị̀ juo fịrịnwẹngịapụ, Mak ḅe na, Arịstakọs ḅe na, Dimas ḅe na, Luk ḅe na, inia kereniḅịpị se ọ́ sẹịnmamẹ.

²⁵ Ye, Nyanaḅọ Jizọs Kraịst Ḅe ḍikiḅụgerere mị ómine mgba na sime.