Ẹzra 7 - Kịrịkẹnị Baịbụl

Ẹzra Ḅe So Jerusalẹm Ḅomẹ

¹ Tọn-a tọn-a kụra ḅie, Atazakzis ḅe Pesia sẹ mị da àrị sịkị ḅụ, Ẹzra ini nwọse chịnḅọ omi-ẹ. Ori ò furo mị kịẹnmẹ, ḅọrọsapụ ma ḅụ ọkịmun Gele Agbamịẹḅọ Erọn ḅe lamẹ, mịn anị ḅọrọ ọkụ-ẹ: Ẹzra ḅe Sẹraịya ya-ẹ, Sẹraịya ḅe Azaraịya ya-ẹ, Azaraịya ḅe Hilkaya ya-ẹ, Hilkaya ḅe

² Shalọm ya-ẹ, Shalọm ḅe Zadọk ya-ẹ, Zadọk ḅe Ahaịtọb ya-ẹ, Ahaịtọb ḅe

³ Amaraya ya-ẹ, Amaraya ḅe Azaraịya ya-ẹ, Azaraịya ḅe Mẹraịọt ya-ẹ.

⁴ Mẹraịọt ḅe Zẹrahaya ya-ẹ, Zẹrahaya ḅe Ụzaị ya-ẹ, Ụzaị ḅe Bukaị ya-ẹ, Bukaị ḅe

⁵ Abishụa ya-ẹ, Abishụa ḅe Fịnehas ya-ẹ, Fịnehas ḅe Ẹleaza ya-ẹ, Ẹleaza ḅe Gele agbamịẹḅọ Erọn ya-ẹ.

^6-7 Ẹzra ḅe opu-ḍiri-nemi-ḅọ-ẹ, ori opuma Nyanaḅọ Izrẹl Tamụnọ Ḅe se Moziz ḅe pịrị olokoma ḍawọ nemimẹ. Anịatịḅị Ẹzra ḅe, Nyanaḅọ Tamụnọ Ḅe ḅẹlẹma ọ̀ nwọ nyanamẹ, amanyanaḅọ ḅe ḅara ò ḅiye ḅiye ori ọ̀ pịrịpịrịmẹ. Atazakzis ḅe ḅo amanyanaḅọ sọ sọnọmẹ karama kụra mị ḅie, Ẹzra ḅe, Babilọn mị ḅie, ò so Jerusalẹm mun mẹ, Izrẹlapụ ḅụ ḅakapụ kpoḅụ ori na mun mẹ, inia ḅie agbamịẹapụ na, Livaị apụ na, Oputẹkẹwarị ḅie nime chuapụ na Oputẹkẹwarị koruapụ na pịkị fịrịnwẹngịapụ na ọ̀ ḅụ sọ mun mẹ.

^8-9 Tatarị akalụ mị ḅie ngei ene ḅụ ini Babilọn mị wẹrịsomẹ, se Tamụnọ Ḅe ḅarachụa ḅụ sọnọ karama akalụ mị ḅie ngei ene ḅụ ini Jerusalẹm lamẹ.

¹⁰ Ẹzra ḅe ò ḍumo mgba ọ̀ nwọse Nyanaḅọ Ḅe olokoma ḍawọ mị pịrịmẹ, ọ̀ pịkị olokoma na àrị fieaye ma na se Izrẹlapụma ḍiemẹ.

Amanyanaḅọ Atazakzis Ḅe Se Ẹzra Ḅe Pịrị Ḍiri Mị

¹¹ Amanyanaḅọ Atazakzis ḅe ma ḍiri ma se agbamịẹḅọ, ḍiri ḍawọ ḅụ ḍinsa Ẹzra ḅe pịrịmẹ, ori anị gbunma olokoma na pịkị Nyanaḅọ Ḅe tọn Izrẹlapụma pịrị ayema na kaịnḅo ḅọ-ẹ:

¹² “Ma ḍiri ma Amanyanaḅọ Atazakzis ḅe se agbamịẹḅọ Ẹzra iḅiọkụma soḅie sime Tamụnọ Ḅe Olokoma ḍawọ nemiḅọ ḅe pịrịmẹ.

¹³ “À kụrọ pịrịmẹ na, ị̀ chuku ḅie sime sẹ mamgba ḅie sime Izrẹlapụ mamgba ḅụ, anị ḅọrọ agbamịẹḅọ-o, Livaịḅọ-o anịkanịka so ḍọkịḅọ goyegoye, à kụrọ pịrịmẹ nụḅọ ineda ị́ ḅụ sọ ị́rị́ na so Jerusalẹm munḅịa.

¹⁴ Ị̀rị̀ na, ị̀ tetemarị sọnọmapụ ma na, ị́ se fịrịmamẹ na, mun Jerusalẹm ḅie na, Juda ḅie na, ini se ị́ ḅarachụa ọ́mịna Tamụnọ Ḅe Olokoma ḍukoaye ma nwọ koko ọkụ mị ḍọkị nemi.

¹⁵ Ị̀rị̀ na ị̀ tetemarịapụ ma na agbamịẹ ḍiepịrịaye ḅụ seni ḍie Jerusalẹm ḅie sime Oputẹkẹwarị nyana Izrẹl Tamụnọ Ḅe pịrị goli ma na seleḅa ma na se chụa mun.

¹⁶ Ị́ pịkị Babilọn sẹ ḅie, ọkị seleḅa ma na, goli mamgba na, pịkị Izrẹlapụma na inia agbamịẹapụma na se Jerusalẹm ḅie Oputẹkẹwarị mị gose inia Tamụnọ Ḅe pịrịaye mamgba se chụa soḅịa.

¹⁷ “Ị́ kịẹnma ma igbiki ma se fịrịnwẹngịḅịa, ị́ se nambulo na ajirima na, anana awọ na, warawara fịayemgbọlụ na, pịkị iru na fẹ se Jerusalẹm Oputẹkẹwarị ḅie agbamịẹ ẹbẹ ọgọnọ ḍiepịrịaye agbamịẹ.

¹⁸ Ị́rị́ na ị́ya ama apụma na, kọn seleḅa ma na goli ma na ómine ineda ọ́mịna Tamụnọ Ḅe ḅi ḅaraḅụ se jịn-a fịrịnwẹngịḅịa.

¹⁹ Se Oputẹkẹwarị ḅie fịrịnwẹngịḅịa fịrịnwẹngịaye ma, ini se ị́ pịrịaye mamgba na ị́ àrị se Jerusalẹm ḅie Tamụnọ Ḅe pịrịḅịa.

²⁰ Ị́ pịkị Oputẹkẹwarị gose nyana ḍọkị jịn aye omi-ẹ ḅẹḅẹ ị́ ineda amanyanaḅọ ngọ koko warị ḅie àrị nyanaḅịa.

²¹ “À kụrọ pịrịmẹ na ómine Yufretis ḅụ Ịrụasọsọ nyọ daọrụ ḅụ amanyanaḅọ ngọ koko warịma ḍikiḍikiarịapụ mamgba, Izrẹl agbamịẹḅọ, pịkị Soḅie sime Tamụnọ Ḅe Olokoma ḍawọ nemiḅọ ḅe ḅiye goyegoye ó se ọ̀ pịrị sịkị famaka ḅaraḅụ,

²² seleḅa ḅụ ó seni ọ̀ pịrịḅịaye, iderima okpokpo nine ẹndẹ oyiasi fịnjị nẹngịma fịturu mịẹ ịpịamgba ini gbẹịn dẹkịdẹkị masaye loko gbọrị poku na sọnọ ẹndẹ, ere iru, kongo ololo sọnọ ẹndẹ; pịkị oliv pulo kongo ololo sọnọ ẹndẹ, pịkịna yechụọ fụn ḅụ ini ḅi ḅara la-ọkụ la-ọkụ lọkọlọkọma ó seni ọ̀ pịrị.

²³ Soḅie sime Tamụnọ Ḅe oria Oputẹkẹwarị mị gose ọ́mịna ḅara ò ḅiye goyegoye ọrụtọn ḅaraḅụ ó se ọ̀ pịrị, mịẹso sịkị ori ịganị ị̀rị̀ na pịkị ọḅụju ḅo sẹ mị daḅịapụ ma na ọgọnọ gbana ẹka ọkụ.

²⁴ Àrị ó kikimẹ na ama ocho igbiki mị, agbamịẹapụma na, Livaị apụma na, nime chuapụ ma na, nyọ koruapụma na, fịrịnwẹngịapụma na, pịkị mị Oputẹkẹwarị mịẹmịẹye mị na gbolomaḅọ goyegoye ḅara ómine ochoma.

²⁵ “Ị́rị́ Ẹzra, ị́ Tamụnọ Ḅe se ị́ pịrị nemi mị ḅụ, Yufretis ḅụ Ịrụasọsọ nyọ daọrụ simeapụma ḅie ị́ nweni tọnḅịa, ḅẹrẹtọn apụ na pịkị ḅẹrẹkọn apụ na, anị ọ́mịna Tamụnọ Ḅe Olokoma sime ḅara ḍiki angarịapụ ma. Oloko mị nemikaḅọ goyegoye ị́ se nụḅọ telimaḅịa.

²⁶ Ọ́mịna Tamụnọ Ḅe oria olokoma na pịkị sẹ mị ḅe olokoma na kokokaḅọ goyegoye nụḅọ fomuḅara daḅịa; ini nụḅọ ḅaaḅịa anịkanịka sẹ mị ḅie nụḅọ desin anịkanịka nụḅọ ngọ goyegoye kọrị ọkị, anịkanịka nụḅọ ikoli munḅịa.”

Ẹzra Ḅe Tamụnọ Ḅe Bomamẹ

²⁷ Ẹzra ḅe nwọḅẹmẹ, “Ọ́ Nyanaḅọ Ḅe boma, mịna ḅieju-aḍapụma Tamụnọ Ḅe! Ọ̀ mịẹmẹ amanyanaḅọ ḅe, ḅie lokoloko ḅaraḅụ osi se Jerusalẹm ḅie Nyanaḅọ Ḅe Oputẹkẹwarị mị pịrịmẹ.

²⁸ Tamụnọ ḍikiḅụgerere ḅụ ị̀ya mịẹmịẹye amanyanaḅọ ḅe na, ò tetema-tetemapụ ma na, pịkị oria fịrịnwẹngịapụma ḅie koruapụma na ḅụḅẹlẹsam; ị̀ Nyana Tamụnọ Ḅe ọ̀ kụrọ kuḅie se ị̀ pịrịmẹ, à pịkị ḅụkụrọma mịẹmẹ Izrẹl sẹma ḅie tịḅịnịma ị̀ ḅụ sọ ị̀rị̀ na pịkịmasomẹ.”