Ẹzra 4 - Kịrịkẹnị Baịbụl

Kpoto Oputẹkẹwarị Nama Na Tụḅụrụ Mị

¹ Juda na Bẹnjamin na tarakapụma naamẹ na ini desin se pịkịmaḅoapụ ma, ini pịkị kpoto Nyanaḅọ Izrẹl Tamụnọ Ḅe oria Oputẹkẹwarị mị nama aḅẹ.

² Anị ini so Zẹrubabẹl ḅe na sẹma ḅie tịḅịnịma na damamun se nwọse ini ḅẹye-ẹ. “Ye wa ọ́mịnaḅụ sọ Oputẹkẹwarị mị nama. Ọ́ tẹkẹtẹkẹ gbọrị Tamụnọ Ḅe, mị mine sọ wa tẹkẹtẹkẹye-ẹ, wa pịkị agbamịẹ ọ̀ pịrịpịrịmẹ, Isahadọn, Asiria Amanyanaḅọ ḅe wa se sẹịn se wa ḅo mịanga anga sịkị ngịsị.”

³ Zẹrubabẹl ḅe na Jọsụwa ḅe na pịkị sẹma ḅie tịḅịnịma na nwọse ini ḅẹmẹ, “Ó ḅo mịnaḅụsọ Oputẹkẹwarị nama Nyanaḅọ mịna Tamụnọ Ḅe pịrị ḅarachụa wa nwọ ḅikẹ. Mine ngẹrị wa nama Nyanaḅọ Izrẹl Tamụnọ Ḅe pịrịḅịa, anị Pesia Amanyanaḅọ Saịrọs ḅe kụrọse wa pịrịsa ḅaraḅụ.”

⁴ Anịsịkị ama mị ḅie anga sime apụma Juapụ kuḅie ma lọkọma pịkị inia ḅalafamamẹ, mịẹso sịkị ini Oputẹkẹwarị mị nama ẹka ḅara.

⁵ Ini pịkị Pesia sẹ ḅie fịrị tịḅịnịma na ọḅụfịmẹ, fịrị mị kiki gose. Saịrọs ḅe sẹ mị da sịkị ngịsị ini mịn mị mịẹmẹ ọkịḅo Darịọs ḅe ḅo sẹ mị da sịkị lamẹ.

Kpoto Jerusalẹm Mị Nama Na Tụḅụrụ Mị

⁶ Ahazarọs ḅe tatarị sẹ mị da enema ḅie, Juda ḅie na Jerusalẹm na ḅie anga apụma na tarakapụma na, ḍiri gịẹịn se ḅẹrẹ se inia tịḅị gbanamẹ.

⁷ Atazakzis ḅe Pesia sẹ mị da enema ḅie sọnị, Bishlam ḅe na, Mitrẹdat ḅe na pịkị Tabiẹl ḅe na, inia ḅụ sọ apụma na ḍiri gịẹịn Amanyanaḅọ ḅe sẹịnmamẹ, Aram apụ ọkwẹịn ḅẹlẹ ini nwọ seni ḍiri mị gịẹịnmẹ, se ini anị goḅịa sịkị ini anị pịkị gomẹ mịẹse ísíapụma sọnị anị kaịnḅoḅịa ọkụ.

⁸ Rihọm, gọvịna ḅe na Shimshaị, ḍiri gịẹịn sẹ mị pịrịarịḅọ ḅe na ma ḍiri ma gịẹịn Amanyanaḅọ Atazakzis ḅe sẹịnmamẹ, Jerusalẹm na gbolomaye ḅụ:

⁹ “Mịn ḍiri mị Rihọm gọvịna ḅe na Shimshaị sẹ ḍiri gịẹịnḅọ ḅe na, inina-ḅịpị-ogbosọ ḅẹrẹkọn-apụ ma na, pịkị jịn-a fịrịtịḅịnị na, anị Irẹk na, Babilọn na, Susa na pịkị Ilam na amama ḅie furo awọma ḅaraḅụ ḅomẹ,

¹⁰ pịkị kụrọ-ẹrẹso, opu Ashọbanipal ḅe inia amama ḅie ini depakụma se ḅo Sameria opuamama ḅie na pịkị Yufretis ḅụ Ịrụasọsọ nyọ daọrụ ḅụ sime jịn apụ na gboloma gịẹịnmẹ.”

¹¹ Mịn ḍiri mị fieye-ẹ: “Amanyanaḅọ Atazakzis, mịn ḍiri mị ị́ya fịrịnwẹngịapụ Yufretis ḅụ Ịrụasọsọ nyọ daọrụ ḅụ simeapụma se ị́ sẹịnmamẹ.

¹² “Wa ḅimẹ ị́rị́ amanyanaḅọ ḅe nemi na ị́ya sẹma ḅie ísí-a pẹkẹrẹ ma ḅụ so mịanga ḅo Juapụma ini ḅo Jerusalẹm ḅie angasam, ini pịkị anị siḅụ-ḅein kụrọ tịḅịḅie nyana opuama mị kpoto nwọ nama aḅẹ. Onu ma ini sakị àrị nama aḅẹ ḅọlọka sịkị ḅụ ini àrị nama soḅịa.

¹³ Amanyanaḅọ, nemikase ini mịn opuama mị nama so se pịkị onu ma nama-fama-somẹ ḅẹḅẹ, tomonima ama ocho igbiki mị ini ḅarị gbẹịn ẹkẹ, pịkị sime Amanyanaḅọ ḅe pịrịḅịa igbiki mị ḅụ ye-iderimaḅịa.

¹⁴ Mịọkụ, Amanyanaḅọ, anịatịḅị wa ị́ chuku ḅie omi-ẹ oloko ḅaraḅụ, wa ḅi ẹkẹ nwọ simeye paka, anịẹrẹchị wa ḍukoaḅẹ

¹⁵ na ḅieju ị́ya olomu-aḍapụma gịẹịn koroma ḍiri ma ḅie ḍọkị. Ị́ ḍọkị ọkụma ị́ ọrịḅịa na mịn opuama mị, anị sịkịmamgba oloko-kanye-mịẹmịẹ ama-ẹ, pịkị ḅọrọsa kụra ma ḅie ngịsị ḅụfụka se amanyanapụ na sẹma ḅie ḅẹrẹtọn apụ na pịrị anị anịa mịẹmịẹye-ẹ. Mịn mị gose ini opuama mị kanmẹ.

¹⁶ Anịẹrẹchị anị mịnaḅụ-okoromẹ na mị opuama mị ini pịkị kpoto nwọ namaso, se onu ma pịkị nwọ nama somẹ ḅẹḅẹ, Amanyanaḅọ, ị́ ḅarị ineda Yufretis ḅụ Ịrụasọsọ nyọ da sẹma ḍikiḍiki ẹkẹ.”

¹⁷ Amanyanaḅọ ḅe mị pẹkẹrẹ ḅịpị mị se: “Gọvịnaḅọ Rihọm ḅe na, sẹ ḍiri gịẹịnḅọ Shimshaị ḅe na pịkị inina-ḅịpị-ogbosọ Sameria ḅie na Yufretis ḅụ Ịrụasọsọ nyọ ḅụ ísí-a nyọma ḅie angapụma sẹịnmẹ, àrị ó kerenimẹ.

¹⁸ “Ó se ị̀ sẹịnma ḍiri mị, ini anị pịkị se ị̀ya ama ọkwẹịn ḅie go ị̀ pịrịsam.

¹⁹ À kụrọ pịrịmẹ na ini ḅẹrẹ mị chuku ḍọkị, ini kọkọma ḍọkịḅomẹ na ḅọrọsa kụra ma ḅie ngịsị Jerusalẹm mị, anị amanyanapụ kụrọ na tụḅụrụ-tụḅụrụ ama-ẹ, oloko kan apụ na, pịkị ḅụfụka pịrị apụ na anịa ḅie ḅeinmẹ.

²⁰ Kụrọnyana amanyanapụ arịa nyọma ḅụ sime sẹ pịkị ḅẹrẹtọn bebe Yufretis ḅụ Ịrụasọsọ nyọ sime sẹma pịrị pịkị inia ḅara ama ocho igbiki na pịkị jịn igbiki na daọkịkịsam.

²¹ Anịẹrẹchị ị́ kụrọ pịrịḅịa na iniapụ ma ini ḅarị opuama mị namama ọkịmun à jịn kụrọ pịrị sịkị la.

²² Mịn mị mịẹ kirikiri, mịẹso sịkị anị ị̀ ḅụḅẹlẹ se à mịẹḅịaye si ẹka ḅara.”

²³ Amanyanaḅọ Atazakzis ḍiri mị inia ḅarala kirikiri ini anị go Rihọm ḅe na, Shimshaị ḅe na pịkị inina-ḅịpị-ogbosọapụ ma na pịrị se ini ḅụọ sarama Jerusalẹm mun se kụrọḅaraḅụ Juapụma dachịẹmamẹ na ini ḅarị kpoto opuama mị namama.

Oputẹkẹwarị Fịrị Mị Pịkị Sakịmẹ

²⁴ Oputẹkẹwarị nama fịrị mị dachịẹmẹ, ọkịḅo Amanyanaḅọ Darịọs ḅe ḅo Pesia mị da maịn-karama kụra mị lamẹ.