Ẹzra 3 - Kịrịkẹnị Baịbụl

Tamụnọ Tẹkẹ Mị Pịkị Sakịsam

¹ Sọnọma akalụ mị ḅie Izrẹlapụ mamgba deinma inia amama ḅie angasam. Anịeso inimgba Jerusalẹm mị ḅie koḅirimamẹ,

² Jẹhozadak ya Jọsụwa ḅe na, ò juo agbamịẹapụma na pịkị Shealtịẹl ya Zẹrubabẹl ḅe na, oria mịnapụma na kpoto Izrẹl Tamụnọ Ḅe, agbamịẹ ẹbẹ mị nama chịẹmamẹ mịẹso sịkị ini anịa ọgọnọ dọkịma agba mịẹḅịa ọkụ, anị Tamụnọ tomoniḅọ Moziz ḅe olokoma ḅie gịẹịn koromasa ḅaraḅụ.

³ Desin ḅụ pịkịmaḅoapụ ma ini ama mị ḅie angapụma ḍiki ḅalafamẹ nwọḅẹsọ, agbamịẹ ẹbẹ mị anị tatarị chịẹ kiri mị ọgọnọ mị ini pịkị kpoto anị namaye-ẹ. Se ini pịkị anịa ọgọnọ dede na saso na ḅụ sakị dọkịma agbama mịẹmẹ.

⁴ Olokoma ḍuko ḅaraḅụ, anị ene mị ḅe ḍiepịrịaye agba ini nwọ mịẹ ene mịẹ ene ini Oguruguru Alalị mị fịfịmẹ;

⁵ pịkịna ini bebema dọkịma-dọkịma ḍiepịrịaye agbama na, Ịwọ Akalụ Alalị fịsịkị ḅe ḍiepịrịaye agbama na, pịkị ini sịkịmamgba koḅirima Nyanaḅọ Ḅe tẹkẹtẹkẹ sịkị ḍiepịrịaye agbama na, pịkị ḅie lokoloko ḅụ ini se Nyanaḅọ Ḅe pịrịpịrị ḍiepịrịaye agba mamgba na.

⁶ Tomonima, ma ini sakị kpoto Oputẹkẹwarị mị namakẹ nwọḅẹ sọnị, sọnọma akalụ mị ḅie ngei ene mị ḅụ ini sakị dọkịma agba mịẹ Nyanaḅọ Ḅe pịrịmẹ.

Kpoto Oputẹkẹwarị Nama Mị Sakịsam

⁷ Tomonima ini igbiki se ḍụparị pu apụ na akanịapụ na gbẹịnmẹ, ini pịkị fịaye na, iru na, oliv pulo na nwọse Taya na Saịdọn na ḅie opuamama sẹịnmamẹ, àrị se fẹḍia ḅaraḅụ Lẹbanọn awụ chịnma na ḍinmamẹ, ini àrị seni tọrụ ḅụ ḅọrọḅo Jọpa laḅịa. Ma mamgba gose mịẹye anị, Saịrọs, Pesia Amanyanaḅọ ḅe kụrọ pịrị ẹrẹchị-ẹ.

⁸ Anịẹrẹchị ini ḅo Jerusalẹm ḅie Oputẹkẹwarị mị sime nyọ la kụra mị ḅie maịn karama akalụ mị ḅie ini fịrị sakịmẹ. Zẹrubabẹl ḅe na Jọsụwa ḅe na pịkị inia amapụ ma ḅụ ísíapụma na, agbamịẹapụma na Livaị apụma na pịkị bebe ini desin se pịkịmaḅo Jerusalẹm lapụ mamgba ḅarachụa fịrị mị nwẹngịmẹ. Livaị apụ ḅụ si kụra la se pịkị ḅọrọsapụ mamgba, kpoto Oputẹkẹwarị nama fịrị mị se inia ḅarachụamẹ.

⁹ Livaịḅọ, Jẹsụwa ḅe na oria awọma na oria mịnapụ na, pịkị Họdavaya sẹ ḅie Kadmịẹl ḅe na oria owuapụ awọma na, ḅo gboloma se ḅarachụa kpoto Oputẹkẹwarị nama fịrị mị se mịẹmịẹye mịẹ kụrọmamẹ, (Hẹnadad sẹ ḅie Livaị apụma ḅarachụa ini pịrịmẹ.)

¹⁰ Tomonima Oputẹkẹwarị mị namaḅịa ẹrẹchị chukusẹkẹ ḍụparịma ise sịkị, Agbamịẹapụma inia opu-a ḅụchụayema chụa se inia kiri ḅụ chịẹ waraḅẹ oḍu ma inia ḅara ḅie omi-ẹ, anịsịkị Esaf sẹ ḅie Livaị apụma inia ḅarafarịaye ma na anịnyọ chịẹ waraḅẹ. Amanyanaḅọ Devid ḅe oria sịkị ḅụ tọnkoroma ini chu Nyanaḅọ Ḅe boma-ẹ nwọḅẹ ḅara mị, anị ini chu ò boma ọkụ-ẹ.

¹¹ Nyanaḅọ Ḅe boma nime ini nwọ chumẹ, ini chu chu ḅarịmẹ: “Nyanaḅọ Ḅe ori iḅimẹ, ọ̀ pịkị nyana Izrẹl mị pịrị ḅẹlẹma mị kuluma nyanakẹ.” Ọrụḅọḅọ mịna ịnyọ laḅara nwọse oloku se boma se Nyanaḅọ Ḅe pịrịmẹ, anịatịḅị Oputẹkẹwarị nama fịrị mị ḅe chuku sẹkẹ ḍụparịma ini sakị àrị isesam.

¹² Olomu Oputẹkẹwarị mị kankasịkị ḅụ anị nemi, sẹnịsa agbamịẹapụma na, sẹnịsa Livaị apụma na pịkị sẹ sẹma ḅie sẹnịsa tịḅịnịma na, ini oloku se owumẹ ini ịwọ Oputẹkẹwarị chuku sẹkẹ ḍụparịma ise se ini anị ọrị sịkị. Ọkụma anịju ḅụ sime ísíapụma ini ḅieḅẹlẹ oloku kọnmẹ.

¹³ Ḅieḅẹlẹ tịḅịḅie ma na, owu-a tịḅịḅie ma na nemi sikimaḅịaḅọ ofori-ẹ anịatịḅị tọn tọn-a sonju ḅụ simeḅọ ineda oloku tịḅịḅie ma naaḅịa.