Ẹsta 9 - Kịrịkẹnị Baịbụl

Juapụ Ma Ini Na Tarakapụ Ma Famamẹ

¹ Ada akalụ anị oyimaịn akalụ fịnjị karama akalụ mị ḅie, oyitẹrẹ-a ḍin fịnjị karama ene mị ḅụ, anị ene mị ini amanyanaḅọ ḅe oria olokoma nwọse mịẹmịẹye ḅụ chuḅịaye-ẹ, anị ene mị Juapụ-ma-na-tarakapụ ma koroma na ini ye se Juapụma mịẹḅịa ene mị-ẹ. Ọkụma anịnakaraka, Juapụma re ọmụḅaraiḅi nyanamẹ.

² Amanyanakiri mị ḅie opuama goyegoye ḅụ, Juapụ anga nyọ goyegoye ḅụ, Juapụma ini ḅịpị se ogbochụase, owuse ini paka ḅiḅọ goyegoye owuse nwọ pakamẹ.

³ Anị ḅo sime ḅara amanyanakiri mị ḅie fịrịnwẹngịapụ mamgba, gọvịnapụ na, ḅẹrẹtọn apụ na, ḅo pịkị amanyanaḅọ ḅe tọrụ ḍinmapụ mamgba na—ini ḅarachụa Juapụma pịrịmẹ anịatịḅị, inimgba ini Mọdẹkaya ḅe ḍikiḅalafamẹ.

⁴ Bebe amanyanakiri mị mgba vinkelema, ini nemimẹ na Mọdẹkaya ḅe ọ̀ kụrọnịḅọ sọsam amanyanaḅọ warị mị ḅie, na ọ̀ pịkị pa kụrọtẹịnma mun aḅẹ.

⁵ Anị gose Juapụma, ini inia ḅietọn ḅara nwọse inina-tarakapụma na angamẹ. Ini okola-agiji se ini na owusọmẹ, se ini ḅaa saramẹ.

⁶ Susa, anị tịḅịnị opuama mị ḅie na mịnaḅụ na, kịnị ẹndẹ sọnọasi fịnjị, Juapụma ini nwọ ḅaamẹ.

^7-10 Ini ḅaa apụma ḅie, tọn apụ anị Hamẹdata ya, Haman, Juapụ-ma-na-tarakaḅọ ḅe, oria oyi-a owuapụ awọ ma-ẹ. Ma inia ẹrẹ ma-ẹ: Pashandata ḅe na, Dalfọn ḅe na, Aspata ḅe na, Porata ḅe na, Adalịa ḅe na, Arịdata ḅe na, Pamasta ḅe na, Arịsaị ḅe na, Arịdaị ḅe na, pịkị Vaịzata ḅe na. Anịẹḅẹ sọnị, ye ọfọịn simekẹ.

¹¹ Anị gbọrị ene ḅụ, Susa mị ḅie ini ḅaa tomonima kịẹnḅịpị mị ini nwọ ḍuko amanyanaḅọ ḅe pịrịmẹ.

¹² Anị ọ̀ nwọse amanyanaḅọ ta Ẹsta ma ḅẹye-ẹ, “Susa mị ḅie ngẹrị ngẹrị, Juapụma ini kịnị ẹndẹ oyiasi fịnjị nwọ ḅaasam, Haman ḅe oria oyi-a owuapụ awọma na se chụa ḅụ, sẹ goyegoye ḅie, ini ḅọrọ cheye sa tuḅo! Mịọkụ, ị́ che ḅi? Ị́ anị nyanaḅịa. Ḍuko ị̀ pịrị ị́ ḅi jịnye, se ị́ pịkị anị nyanaḅịa.”

¹³ Ẹsta ma pẹkẹrẹmẹ, “Nemikase anị Ị́rị́ Amanyanaḅọ ḅe ḅụḅẹlẹḅịa ọkụma ḅereni Susa ama mị ḅie sime Juapụma pịrị, ini nwọ mịmgba mịẹye mị, ini pịkị nwọ mịẹ ene ḅa mị ḅụ. Se tọn na ini Haman ḅe oria oyi-a owuapụ awọma ojuma nwọse nweni kpọ ḅaaye mị ḅụ sololo koroma.”

¹⁴ Amanyanaḅọ ḅe, ọ̀ tọnmẹ na mịn mị mịẹ, se olokoma ini nwọse Susa mị ḅie chụamẹ. Haman ḅe oria oyi-a owuapụ awọma ojuma ini nwọse lelema ama ogbo tomoni mamgba ḍiemẹ.

¹⁵ Ada akalụ, anị oyimaịn akalụ fịnjị mị ḅie, oyi inein-a ḍin fịnjị ene mị ḅụ Juapụma, ini pịkị Susa opuama mị ḅie gboloma se kịnị-a jieasi nwọ ḅaamẹ. Mịn sịkị sọnị ini ye ọfọịnkẹ.

¹⁶ Sẹ goyegoye ḅie, Juapụma sọnị ḅịpị se ogbo chụa se inia ḅụma ḍụamẹ. Ini kịnị-a esenia-a poku na kịnị-a sọnọma ẹndẹ na oyiasi fịnjị nwọ ḅaamẹ, ini ini na tarakapụma ḅara ḅie inia ḅụma ḍụarịogbo. Ọkụma ini ye ọfọịnkẹ.

¹⁷ Ada akalụ mị ḅie, oyitẹrẹ-a ḍin fịnjị karama ene ḅụ anị mịn mị pakaye-ẹ. Anị ḍukoma oyi inein-a ḍin fịnjị karama ene mị ḅụ, jịn nweni ḅaa ḅarị mịẹkẹ, se ini anị ene mị seni ḍoroku se alalị fịaye chụọ saramẹ.

¹⁸ Akalụ jie-a ḍin karama ene mị ḅụ mị Susa mị ḅie sime-a Juapụma seni inia ịnyọsara ene nwọ mịẹye-ẹ, anịatịḅị, oyitẹrẹ-a ḍin fịnjị karama ene mị na, oyi inein-a ḍin fịnjị karama ene mị na, mị ini seni inina-tarakapụma ḅaa sara, seni jie-a ḍin karama ene mị ḅụ, mị anị ḅo kulumaye-ẹ.

¹⁹ Mịn mị gose, anị kala amama ḅie anga Juapụma gose Ada akalụ mị ḅie oyi inein-a ḍin fịnjị karama ene mị se ḍoroku ịnyọsara ene nwọ mịẹye-ẹ, anị ene mị, ini alalị fịaye chụọ sara pịkị fịye se ḍie jụmḅọ jụmḅọ pịrịpịrịmẹ.

Purim Alalị Mị

²⁰ Mọdẹkaya ḅe, ọ̀ ma pakaye mamgba nwọ gịẹịnmẹ, se fịrịfịrịma ḍiri seni Pesia Amanyanakiri mị ḅie sime Juapụ mamgba nwọ sẹịnmamẹ.

²¹ Ḍuko ini pịrịaḅẹ na kụra ḅụ ini Ada akalụ mị ḅie oyi inein-a ḍin fịnjị karama ene mị na jie-a ḍin karama ene mị na nwọse ịnyọsara ene nwọ mịẹ.

²² Mà enema ḅụ anị Juapụma inina-tarakapụma ḅara ḅie inia ḅụma ḍụapakụmaye-ẹ; mịn akalụ mị ḅie anị kururu na kuḅie lọkọ sịkị na pịkị ḅo ḅieḅẹlẹ na ḍoroku na nwọ sọ sịkị mị-ẹ. Ini nwọse ini ḅẹmẹ, na ini alalị na ti na koroma enema ḅụ, se pịkị fịye ḍiepịrịaye nwọse ḍie inia ḅụ na igwein apụ na nwọ pịrị.

²³ Anị ḅụ, Juapụma ini Mọdẹkaya ḅe tọn ini pịrịayema ḍuko nwẹngịmẹ, se alalị fị mị ḅo kụra kụra ḅụ inia ama mịẹmịẹye nwọ sọmẹ.

²⁴ Hamẹdata ya, Heman—Egag ḅe furo ḅie ḅo pịkị Juapụma na tarakaḅọ ḅe—ò Purim ịkịan wakịsam, se ḅo ini Juapụma ḅaafamaḅịa ene mị nwọ ḍọkị nemi ḅimẹ. Ọ̀ tọnsam na ori ini kọrọrọsinḅịa.

²⁵ Ọkụma Ẹsta ma á so amanyanaḅọ ḅe damamun sịkị, amanyanaḅọ ḅe ori oloko gịẹịnmẹ, mịn oloko mị dekiḅoye anị Haman ḅe ọ̀ tọn Juapụma pịrị fa mị—vinpịkị ḅo ọ̀ lamẹ; nweniḅaaye mị ḅụ, ini ori na oria owuapụ awọma na nwọ kpọḅaamẹ.

²⁶ Mịn mị gose, anị ini Purim nwọse ịnyọsara sịkị mị chịnye-ẹ. Mọdẹkaya ḅe gịẹịn fịrịfịrịma ḍiri mị na, pịkị inia ḅụpakaye ma na gose,

²⁷ Juapụma ini oloko chụa se inia ḅụma na, inia ọḅụju pakaḅoḅịapụma na pịkị, ḅo Juḅọ nwọ sọḅịaḅọ goyegoye pịrịmẹ na, kụra mị ḅie, mịn sịkị mị ḅo lasa ḅẹḅẹ, ini sịkịmamgba, mà mama enema ḅụ, Mọdẹkaya ḅe tọn ini pịrịayema nwọ mịẹḅịa.

²⁸ Ini ḍuko pẹlẹmẹ na, ḅụọ ḅụọ ḅụ pakaḅoḅịa Juḅọ furo goyegoye, sẹ goyegoye ḅie, pịkị opuama goyegoye ḅie na, ini sịkịmamgba nwọ ḅoḅịa enema ḅụ, Purim enema se ḅiekoroma se pịkị ini tọn ini pịrịayema na mịẹ.

²⁹ Se Amanyanaḅọ ta Ẹsta, Abihel ḅaama, na Mọdẹkaya, Juḅọ ḅe na fịrịfịrịma ḍiri gịẹịnmẹ, pịkị Purim mị ḅe kụrọ á nwọse fịrịfịrịma ḍiri mị palịmẹ.

³⁰ Fịrịfịrịma ḍiri mị ini nwọse bebe Juapụ mamgba nwọ fịrịmamẹ; anịa ḅụaye ini nwọse Pesia Amanyanakiri mị ḅie sime tẹrẹfa sonioasi oyi fịnjị sẹma nwọ sẹịnmamẹ. Dein na, tịḅịjike ofori na, oloko mị nwọ ḅereni Juapụma pịrịmẹ.

³¹ Ini pịkị tọn ini na inia ọḅụju pakaḅoḅịapụma pịrịmẹ na Purim ene mị ini anị se mịẹmịẹye ḅụ chu ene mị lasa ḅẹḅẹ, anị ini ọkị inia ḅụ pịrị ḅuruseḅụḅaama na kururu sịkị olokoma na ini nwọse mịẹmịẹye ḅụ chu ọkụ mị. Mọdẹkaya ḅe na Amanyanaḅọ ta Ẹsta ma na anị mà olokoma chụaye-ẹ.

³² Purim mị mịẹ kụrọmaḅịa gose Ẹsta ma chụa olokoma ini àrị se fangala-ḍiri ḅie gịẹịnmẹ.