Ẹsta 5 - Kịrịkẹnị Baịbụl

Ẹsta Ma Alalị Fịaye Chụọ Sara Se Amanyanaḅọ Ḅe Na Haman Ḅe Na Pịrịmẹ

¹ Á ḅuru se á ḅụḅama tẹrẹ-a ḍin karama ene mị ḅụ, Ẹsta ma, árị árịa amanyanaḅọ ta ḅiriaye ma nwọ chụa se paka so amanyanaḅọ ḅe warị ịnyọsara nyọ mị ḅie mun se chịẹsimeye-ẹ, árị á tọrụ mị seni amanyanaḅọ ngada mị sime jukuru mị damẹ. Amanyanaḅọ ḅe, ò jukuru mị ḅie amanyanaḅọ ngada mị ọgọnọ sime waraḅẹ, ọ̀ tọrụ mị jukuru ḅọkọ mị damẹ.

² Amanyanaḅọ ḅe, ori amanyanaḅọ ta Ẹsta ma ọrịmẹ ịnyọsara nyọ mị ḅie á chịẹsime waraḅẹ nwọḅẹ sịkị, árị ọ̀ ḅụḅẹlẹḅọ nwọ sọsam, se ori oria goli goli amanyanaḅọ amgbara mị seni á damẹ. Árị anịsịkị ḅụọ sụma ọ̀ damamun se ḅara seni anị lamamẹ.

³ Amanyanaḅọ ḅe nwọse á gbelamẹ, “Amanyanaḅọ ta Ẹsta, ị́ chịẹ ḅi? Ị́ ḅiye mị ḍuko ị̀ pịrị, seni ị́ pịkị anị nyanaḅịa—anị ḅọrọ ị̀ya amanyanakiri mị seni mama kiri ḍie nwọḅẹ sọnị.”

⁴ Ẹsta ma pẹkẹrẹmẹ, “Nemikase anị amanyanaḅọ ḅe ḅụḅẹlẹḅịa ọkụma, à ḅimẹ ị́rị́ na Haman ḅe na, ó ḅo mị ḍin à chụọḅịa alalị fịayema gose igoniapụ nwọ sọ.”

⁵ Anị amanyanaḅọ ḅe tọn Haman ḅe pịrịye-ẹ na ọ̀ fịkịrị ḅo mịẹse ini Ẹsta ma árịa igoniapụ sọḅịa ḅara. Anị amanyanaḅọ ḅe na Haman ḅe na so Ẹsta ma chụọ fịayema gose mun ye-ẹ.

⁶ Ini iru ḅuarị sịkịḅụ, anị amanyanaḅọ ḅe Ẹsta ma gbelaye-ẹ, “Ị́ ḅiye mị ḍuko ị̀ pịrị, se ị́ pịkị anị nyanaḅịa—anị ḅọrọ ị̀ya amanyanakiri mị seni mama kiri ḍiama sọnị.”

⁷ Ẹsta ma pẹkẹrẹmẹ,

⁸ “Nemikase amanyanaḅọ ḅe sịkị nyana à ḅiḅịaye mị pịrịḅịa nwọḅẹ ọkụma, à ḅiḅịa, ị́rị́ na Haman ḅe na, ó ḅo ḅa ḅụ igoniapụ sọ ị̀ pịrị à pịkị chụọ ọ́ pịrịḅịa alalị fịayema ḅụ, anịsịkị mị à ḅiye mị à nwọ ḍukoḅịaye-ẹ.”

Haman Ḅe Ọ̀ Tọnmẹ Ọ̀ Mọdẹkaya Ḅe Ḅa

⁹ Haman ḅe ori alalị fịayema wẹrịso sịkị, ò ḅieḅẹlẹmẹ; ò kuḅie na, oria koroma na pịkị iḅi ḅara ḅụ simemẹ. Ọkụma amanyanaḅọ warị onu ḅọkọ mị angasịkị ḅụ, ọ̀ Mọdẹkaya ḅe ọrịmẹ, se Mọdẹkaya ḅe ngịsị ọ̀ sịsẹkẹ, anịkanịka osi seni ọ̀ pịrị mị sọnị ọ̀ nwọ ḍiepakụmakaye gose, Haman ḅe ori opu ịganị nyana ọ̀ pịrịmẹ.

¹⁰ Ọkụma ori ọ̀ ḅụ ọlọchịẹma se so warị mun mẹ. Anị ori oria ikiapụ ma chịn oria warị mun ye-ẹ, tarọ Zirẹsh ma sọnị árị inia ḅụ sọmẹ ọ̀ wẹrịye tọn ḅara ḅụ.

¹¹ Oria pẹrẹ mị la ḅara na, ọ̀ nyana sara tọn-a owuapụ awọ na, amanyanaḅọ ḅe fịrịkiri ḅụ ori iwoma mun gele kiri la-ọkụ, pịkị ori geletẹịn amanyanaḅọ ḅe fịrịnwẹngịapụ mamgba nẹngịmẹ nwọḅẹ aye ọ̀ nwọse ọ̀ ḅụ boma ini pịrịmẹ.

¹² Anịtẹịn anga, Haman ḅe pịkị nwọ ḅẹmẹ, “Amanyanaḅọ ta Ẹsta ma, á fịaye chụọ sara jịn-apụ pịrịkẹ, ị̀rị̀ na amanyanaḅọ ḅe na sikima ọkụma, eneḅa á pịkị wa chịn waraḅẹ.

¹³ Ọkụma anị sọnị, maye mamgba àrị ị̀ ḅụ ye sọkẹ, Mọdẹkaya Juḅọ ḅe, à nwọ ọrịmẹ, ori amanyanaḅọ warị onu ḅọkọ mị angasịkị sime se tịḅịtu ị̀ pịrịkaye mị sikima ọkụma.”

¹⁴ Se anị tarọ ma na, oria ikiapụ ma na koroma se ò ḅiechuye-ẹ, “Nde ị́ ḅarị sọnọfa ḅụọ-a iniasi fịnjị chịẹ laḅịa nweni kpọḅaaye nwọ ḅakụkaye? Ị́ ineda ḅa dede ḅie amanyanaḅọ ḅe ḅẹḅịa na ori anịa ọgọnọ Mọdẹkaya ḅe kpọ ḅaa, anịsịkị re ị́ ineda ḅieḅẹlẹ na so mun alalị fịayema fịḅịaka.” Haman ḅe ò koromamẹ na mịn tetema mị iḅimẹ nwọḅẹye gose, nweni kpọḅaaye mị ọ̀ nwọ ḅakụ chịẹmamẹ.