Emọs 7 - Kịrịkẹnị Baịbụl

Ịkịankoro Emọs Ḅe Tẹmẹḅụ Iguruḅe Ọrịmẹ

¹ Kụrọmamgba Nyanaḅọ Ḅe tẹmẹ anga ye se ị̀ ḍiemẹ. Anịsịkị mị ḅụ à pịkị tẹmẹḅụ ọrịmẹ Nyanaḅọ Ḅe igurube kpo ọ̀ nwọ tẹmẹ pakụmamẹ, anị ini amanyanaḅọ ḅe osuein mị pẹlẹso ananga ọkụma, jịn osuein pịkị sakị sẹnị aḅẹ.

² Tẹmẹḅụ àrị ọrịye àrị igurube ma ọrịmẹ àrị bebe ama ḅie kiri ḅie sopakaye goyegoye fịfamamẹ, anị à ḅẹye-ẹ, “Kụrọmamgba Nyanaḅọ, ḅarasin ị́ya tomoni, Izrẹlapụma pịrị! Nde ini ineda ḍumoḅịa ọkụ? Ini ngịsị ḅakakẹ, ini pịkị ịnyọ nyanakẹ!”

³ Nyanaḅọ Ḅe ò kuḅie ḍinma se nwọ ḅẹmẹ, “Ị́ ọrịye mị kiri-ọkị-ẹkẹ.”

Ịkịankoro Emọs Ḅe Tẹmẹḅụ Fịnị Ọrịmẹ Gbọrị

⁴ Kụrọmamgba Nyanaḅọ Ḅe pịkịna tẹmẹḅụ jịnye se ị̀ ḍiemẹ. Anịa ḅie àrị ọrịmẹ ọ̀ ḅụkarakaramaḅẹ fịnị se ini dọkịma sin ḅịa fomuḅara se oria tomonima pịrịḅịaye gose. Fịnị mị anị tomonikiri sime opu-abaji mị dọkịmamẹ, se pịkị sakị kiri mị dọkịmamẹ.

⁵ Mị à ḅẹye-ẹ, “Dachịẹma, Yei Kụrọmamgba Nyanaḅọ, nde ị́ya tomoni Izrẹlapụma ineda ḍumoḅịa ọkụ? Ini ngịsị ḅakakẹ, ini pịkị ịnyọ nyanakẹ!”

⁶ Nyanaḅọ Ḅe pịkị ò kuḅie ḍinma se nwọ ḅẹmẹ, “Mị sọ kiri-ọkị-ẹkẹ.”

Ịkịankoro Emọs Ḅe Tẹmẹḅụ Ọrị Gbọrị Nyọ Tọn Ḍiki

⁷ Nyanaḅọ Ḅe pịkị jịnye se ị̀ ḍiemẹ tẹmẹḅụ. Anịa ḅie àrị ọrịmẹ ọ̀ chịẹ waraḅẹ ini nyọ tọn ḍiki se tọn àrị warị agbagba angasịkị, pịkịna nyọ tọn ḍiki ọ̀ ḅara omi-ẹ.

⁸ Ori ị̀ gbelamẹ, “Emọs, ị́ che ọrị?” “Gbọrị nyọ tọn ḍiki-ẹ,” à nwọ pẹkẹrẹmẹ. Mị ọ̀ ḅẹye-ẹ, “À mịn mị se ḍiepakụmaḅẹ na ị̀ya tomonima ini ọrụḅụ-chịẹka warị agbagba kịkẹmẹ. À ḅarị ị̀ kuḅie ḍinma ẹkẹ, fomuḅara se ini pịrị ḅụ.

⁹ Aịzịk ḅe ḅụ koroḅo apụma ini tẹkẹtẹkẹ nyọma à kanḅịa. Izrẹl ḅie osiḅụ-sime-anyọ ma à kansara koromaḅịa. Jeroboam furoḅieḅọ ḅo amanyana mị anị kulumaḅịa.”

Amazaya Ḅe Ịkịankoro Emọs Ḅe Dapakamẹ

¹⁰ Bẹtẹl ḅie Amazaya nwọ chịn gbọrị agbamịẹḅọ omi-ẹ, ori oku seni Izrẹl amanyanaḅọ Jeroboam ḅe sẹịnmamẹ: “Emọs ḅe, tomonima ogboku ori ị́ se ḅaa-tọn-aḅẹ. Oria ọkwẹịn ma àrị sẹ mị kanḅịa.

¹¹ Mị ò ḍukoye-ẹ na ‘Jeroboam ḅe owu ḅie ọ̀ fịḅịa, pịkịna Izrẹl-a tomonima ini kụrọḅara se ini desinḅịa inia ama ḅie.’”

¹² Anị Amazaya ḅe Emọs ḅe ḅẹye-ẹ, “Iḅisam, ị́rị́ ḅe ịkịankoroḅọ! Pịkịmaso Juda mun, se anịju ị́ya Tamụnọ ḅẹrẹ mị ḍuko. Ye ini gbẹịnye se ị́ pịrị anị gose.

¹³ Ḅarị mị ju Bẹtẹl ḅie ịkịankoroma. Mịọ anị amanyanaḅọ ḅe oria tẹkẹ nyọ-ẹ, mị anị bebe sẹ Oputẹkẹwarị mị-ẹ.”

¹⁴ Emọs ḅe nwọ pẹkẹrẹmẹ, “Gbẹịnye gose ịkịankoroarị apụma na ị̀rị̀na-gbọrịḅarakẹ. Ị̀rị̀ ananaḍikiḍikiḅọ-ẹ, à pịkị figi chịnmgbọlụ fịrịnwẹngị-nwẹngịmẹ.

¹⁵ Ọkụma Nyanaḅọ Ḅe ị̀ya ananaḍikiḍiki fịrị ḅie ị̀ ọkịpakụmaḅo se ị̀ ḅẹmẹ à ḅo ịkịankoro oria tomoni, Izrẹlapụma pịrị.

¹⁶ Anịḅụ, mịọkụ Nyanaḅọ Ḅe ḅẹye poki. Ị́rị́ ḍuko ị̀ pịrịmẹ na àrị ịkịankoro mị dachịẹma à ḅarị ọrịḅara-ọrịḅara se ọkwẹịn Izrẹlapụma pịrịma ḅọrọma.

¹⁷ Anịḅụ, Amazaya, Nyanaḅọ Ḅe ị́ ḅẹ aḅẹ, ‘Ị́ tama á ḅo amanwẹngịḅọ sọḅịa opuama mị ḅie, pịkịna ị́ya awọma ọmụ ḅie ini ini ḅaaḅịa. Ị́ya kiri mị ini ḍie jịn apụ pịrịḅịa, se ị́rị́ na mịnaḅụ na oru ḅerenika sẹ ḅie ị́ fịḅịa. Pịkịna Izrẹl-a tomonima gbarịmaka ḅaraḅụ ini inia ḅarakuḅu ama ḅie ini desinḅịa.’”