Emọs 6 - Kịrịkẹnị Baịbụl

Izrẹl Mị Anị Kansaraḅịa

¹ Anị ḅalafaye sọ ọ́ pịrịḅịa ómine Zaịyọn ḅie sarasara ḍumo kọn apụma na pịkị ómine Sameria ḅie, chịn na ó dein nyanamẹ nwọḅẹ apụma pịrịḅe, ómine opu apụma mị Izrẹl opu sẹ ḅie sime apụma, anị tomonima ọ́ damamun se ọ́mịna ḅarachụa ḅiḅi apụma!

² Ó mun Kalne opuama mị ḍiki. Se ḅọrọ mun Hamat opuama mị na Filistia opuama Gat mị na ḍiki. Àrị iḅitẹịn Juda na Izrẹl na amanyanakiri ma nẹngị? Inia pẹkẹrẹ mị ḍụḅatẹịn ọ́mịna ye mị nẹngị?

³ Ó ḅereni ọkị ḍụkụkẹ na gbọrị ḅụfụka ene ḅoaḅẹ, ọkụma ọ́ mịẹarịye ngẹrị anị ene mị jine kpekima aḅẹ.

⁴ Anị ḅalafamaye sọ ọ́ pịrịḅịa ómine opu ngada ma ḅie ọ́ ḅarama na ọ́ ḅụọma na ịsụn se kala-nambulo-mịnị ma na anana mịnị ma na pẹịarịapụ ma.

⁵ Ó nime pakụma ḍinmẹ se anị se ọbọ ḅie chu, Devid ḅe ye ọkụ mị.

⁶ Opu-a bọlị ma se iru chụa ḅu pịkị iḅiọkụ kụnụ sẹntị ma ọmbị, mị ó nemiye-ẹ, ọkụma Izrẹl mị kankọsịḅịa nwọḅẹ kururu sọ ọ́ kọnkẹ.

⁷ Anịgose ómine anị ini tatarị kụrọ ḅaraḅụ desinḅịaye-ẹ. Ọ́mịna fịye alalị ma na opu alalị ma na àrị ḅo kulumaḅịa.

⁸ Kụrọmamgba Nyanaḅọ Ḅe mị ḍinma-ẹka-ḅara nwọse ọ́mịna ḅeri ma jineḅẹ. “Izrẹlapụma inia ḅụdekichịẹma mị, ị̀ ḅụnwọnwọmamẹ. Àrị ini opuma ḅirima warịma ḍikisimamẹ. Àrị inia tịḅịnị opuama mị na anịa ḅie sime aye mamgba na se tarakaḅọ ḅe pịrịḅịa.”

⁹ Nemikase oyi-a owuapụ gbọrị furo ḅie kọnmẹ nwọ ḅẹḅẹ, ini fịḅịa.

¹⁰ Fịḅọ ḅe mịnaḅọ ḅe, anị ḍụẹịn tịḅịdaḅọ ḅe, anị oju mị dekipakụmaḅịaye-ẹ warị ḅie. Mịnaḅọ ḅe anị warị ḅie kọnḅọ chịnḅịaye-ẹ, “Anịnyọ nweni ị́rị́ na omi?” Pụkọ pẹkẹrẹḅịa, “Ẹn-ẹn!” Anịsịkị mịnaḅọ ḅe ḅẹḅịa, “Ó deinma sime! Wa mịnaḅụ ọbị se ḍọkịḅo ọrị na Nyanaḅọ Ḅe ẹrẹ sọ wa go ẹkẹ.”

¹¹ Nyanaḅọ Ḅe kụrọ mị pịrịsa ḅẹḅẹ, opu-a warị na kala warị na arịmgba kan kọsịḅịa.

¹² Asụn ḍụparị ọgọnọ ḍosi-ḍosi nọ? Owuapụ jịn ene po-nambulo se tọrụ ogbo ozu ḍipi fịrịnwẹngịsa? Ọkụma ómine ọ́ karakaraye mị pịkị nweniḅaa ḍiri mịẹsam, pịkịna karakara mị pịkị karakarakaye mịẹsam.

¹³ Ọ́ ḅịpịkọnma ḅọrọaḅẹ na ó Lodiba mị kun ọkịsam. Ó bomaḅẹ, “Wa kụrọlamamẹ, se Kaneim mị ọkịmẹ.”

¹⁴ Ọkụma Kụrọmamgba Nyana Tamụnọ Ḅe na mịnaḅụ na ọkọ ḅẹmẹ, “Izrẹlapụ, à jịn sẹ owuni se ọ́mịna sẹ sẹịn se ama ḅie angaḅịa. Ini ọ́ pụnda mun Hamat Ḅọrọ Nyọ mị ḅe ọgọnọju ḅụ koroḅo Araba ideri mengi mị ḅe chukuju laḅịa.”