Emọs 4 - Kịrịkẹnị Baịbụl

Izrẹl Mị Anịa Sima Ḅụ Pịkị Ḍụkụkẹ

¹ Ọ́ mịn mị poki, ómine Sameria eremeni, iḅiọkụma yefị Bashan nambulo ḍụḅa ọkụ ḍụḅapụ ma, anị ịnyọḅụ oforiapụ ma mịẹsimapụ ma, igwein apụma pụnda, pịkị ḍọkị na ọ́mịna deapụ ma iru se ọ́ pịrịpịrị nwọḅẹ apụma!

² Kụrọmamgba Nyanaḅọ Ḅe nwọ osiḅụ-sime wara sịkị, ò yeḅerenisam, “Ini inji kun arị se ómine kpọrọrọsoḅịa ene ḅoaḅẹ se ọ́mịna ḅie gbọrịḅọ gbọrịḅọ arị-ḅịpị-sụka-inji kịkẹḅịa.

³ Ini ọ́ fọnọ kpekitẹịn ḅịkị-arị-warị agbagba ḅie toluma gbin pakụmaḅịa.”

Izrẹl Mị Ḅọrọsa Fomuḅara Ma Ḅie Yeḍawọ Ḍụkụkẹ

⁴ Kụrọmamgba Nyanaḅọ Ḅe ọkọ ḅẹmẹ, “Izrẹlapụ, ọ́ Bẹtẹl ḅie osiḅụ-sime nyọ mị mun se simịẹ, ó si mịẹḅịa ḅẹḅẹ! Ó Gilgalị mun se ọ́mịna ịnyọ mgba se simịẹ! Ọ́ tatarị mun nama ọkịḅo ini se dede goyegoye agbamịẹ, ọ́ pịkị ọ́mịna oyi-a kiri ḅe gbọrị kirima, ọkịḅo tẹrẹ karama jịn ene goyegoye ḅụ.

⁵ Ó mun se ọ́mịna fịturu ọ́ nwọse mịẹḅaka agbamịẹ Tamụnọ Ḅe pịrị, se ómine ọkịḅo agbamịẹ aye mamgba na gbana ayema na ọ́ nwọse ḅụ boma! Mị ḅara simeye anị ọ́ ḅẹlẹma mịẹmịẹye-ẹ.

⁶ “Ị̀rị̀ anị ḅuruḅaa se ọ́mịna opuama mamgba ḅoye-ẹ, anịẹḅẹsọ ọ́ pịkịma ị̀ damaḅokẹ.

⁷ Ị̀rị̀ ene mị kikimẹ ó ḍipi fịayemgbọlụ ma opuma ene mị ḍọkị sịkị ḅụ. Ị̀rị̀ anị ene se gbọrị opuama sẹịnma se ísí amama sẹịnmakaḅọ ḅe-ẹ. Ene gbọrị ele ḅụ koroḅịa ọkụma ísí ele samịnaḅịa.

⁸ Mengi pụkọtarị se ḅụlọkọ, tọn-a opuama ḅie-a tomoni, inia amama wẹrịso jịn ama mun mengi ḍọkịmẹ ọkụma ini tụkụma mengi ọrị ḅukẹ. Ọ́ pa pịkịma ị̀ damaḅokẹ.

⁹ “Ó ḍipi fịayemgbọlụ ma samịnamaḅịa fọrụ à nwọse ọ́ sẹịnmamẹ igurube ma ọ́mịna ozuma na, irumịẹ chịnmgbọlụ ozuma na, figi ejema na, oliv ejema na, fị ḅaamẹ anịsọ ọ́ pa pịkịma ị̀ damaḅokẹ.

¹⁰ “À se Ijipt sẹịnma obi kịkẹma obi à nwọse ọ́ sẹịnmamẹ. Àrị ọmụ ḅie ọ́mịna asẹmẹnịma ḅaamẹ pịkị ọ́mịna asụnma ọkịsomẹ. Ómine ikowarịma pike nyọma ḅie, à ḍụẹịn onuma se ọ́mịna nini apangama ḅie chukomẹ. Anịsọ ọ́ pa pịkịma ị̀ damaḅokẹ.

¹¹ “Àrị ọ́mịna ḅụ dapụ sima ọkụ mị anị à Sọdọm na Gomọra na sima ọkụ-ẹ. Ómine mịọkụ ḍumo apụma sọnị kalaye kẹngẹ kọnmẹ ọ́ fịsam, anị ini kọrịarị fịnị pẹkẹrẹ anị ini nụnụpakụmaḅo se ḅịpịḅọkọ mị bimaye sime ọkụ simemẹ. Anịsọ ọ́ pa pịkịma ị̀ damaḅokẹ,” Nyanaḅọ Ḅe ọkọ ḅẹmẹ.

¹² “Anịọkụma Izrẹlapụ à fomuḅara se ọ́ pịrịḅịa. Pịkịna à mịn mị mịẹḅịa ẹrẹchị, ọ́ ḅụkarakarama ị̀ya ḅẹrẹkọn mị koru!”

¹³ Tamụnọ Ḅe anị tụndụma mịẹye-ẹ pịkị fọrụ ma tẹmẹmẹ. Ori oria koroma ma mịẹpakụma tomoniḅọ ḅe pịrịmẹ; ori anị enekaka mị pịkịḅo ḍin mịẹye-ẹ. Ò tomonikiri mị ḅie gele-a nyọma ọgọnọ nwẹngịmẹ. Mị anị oria ẹrẹ-ẹ: Tamụnọ Kụrọmamgba Nyanaḅọ!