Emọs 2 - Kịrịkẹnị Baịbụl

Moab

¹ Nyanaḅọ Ḅe ọkọ ḅẹmẹ, “Moab apụma ini mbikia-mbikiama simịẹsam, mịn mị gose à fomuḅara se ini pịrịḅịa gbarịmaka ḅaraḅụ. Ini osi se Idọm amanyanaḅọ ḅe ịmgbema pịrịkẹ, ini nwọ àrị dọkịma fọnsọ sịkị.

² À fịnị se Moab ama mị sẹịnmaḅịa, pịkị Kerịọt owuni-a warịma dọkịma saraḅịa. Owuni oloku-a tịḅị ma ḅie anị Moab apụma fịḅịaye-ẹ, anịsịkị owunima ini olokuaḅẹ pịkịna oḍu ma àrị fieaḅẹ.

³ Moab ḍikiḍikiarịḅọ ḅe na ama mị ḅie tịḅịnị mamgba na àrị ini ḅaaḅịa.”

Juda

⁴ Nyanaḅọ Ḅe ọkọ ḅẹmẹ, “Juda apụma ini mbikia-mbikiama simịẹsam, mịn mị gose à fomuḅara se ini pịrịḅịa gbarịmaka ḅaraḅụ. Ini à se ini ḍieaye ma ḍikisimasam, pịkị à tọn ayema kokokẹ. Inia ḅieju-aḍapụma tẹkẹtẹkẹ gbọrị iruo-a oru ma ini dairimasam.

⁵ Anịẹrẹchị à fịnị se Juda sẹịnmaḅịa, pịkị Jerusalẹm owuni-a warịma dọkịma saraḅịa.”

Tamụnọ Ḅe Ò Fomuḅara Se Izrẹl Mị Pịrịḅịa

⁶ Nyanaḅọ Ḅe ọkọ ḅẹmẹ, “Izrẹlapụma ini mbikia-mbikiama simịẹsam, mịn mị gose à fomuḅara se ini pịrịḅịa gbarịmaka ḅaraḅụ. Ineda mịna tịḅị sa gbẹịnka, furuka igwein apụma ini nwọ ọkị omoniapụ ḅaraḅụ ḍẹrịmẹ, igwein owuapụma anị ḅarị ineda gbẹịn ḅọrọsa chụa mengi biri akpaka ma igbiki gbẹịn ẹka apụma.

⁷ Ini ịnyọ nyanakapụma na, mịẹḅịa-ọkụ oforikapụma na, pịkị igwein apụma ḍikisimamẹ pịkị ini lalamaye sọnị se ini pịrịkẹ pịkị ini pụndamẹ. Gbọrị owutọkụ na ḍawu na, gbọrị omoni eremeni tọkụ na mịẹgboloma nyanaḅịa se pa ị̀ya fịafịa ẹrẹ mị mịẹsimaḅịa ẹrẹchị.

⁸ Tẹkẹ nyọ goyegoye, owuapụma, inia-ḅara-safị-igwein-apụ se onyechịẹma ḅịtẹma ini nwọse anya mọnọmọnọmẹ. Inia Tamụnọ Ḅe tẹkẹwarị ḅie mị ini inia ḅara safịapụ ma ḅara ọkịḅo iru ḅuḅuye-ẹ.

⁹ “Anịsọ, ị̀ya tomoni, ọ́mịna tịḅị gose mị àrị okorona okorona Amọraị apụma famaye-ẹ, anị awụ chịn nangwọ ọkụ nangwọ apụma, pịkị kuru kụrọ ọkụ kụrọ apụma.

¹⁰ Ị̀rị̀ Ijipt ḅie ómine ọkịḅo mẹ, kụra mesi se onwun ele ḅie ọ́ ḅọrọmaḅo mẹ, se Amọraị apụma inia ama mị se ọ́ pịrị ómine anị nyana ọkịmẹ.

¹¹ Àrị ọ́mịna owuapụ awọma ḅụ dapụ se osiḅụ-sime ịkịankoroapụ mịẹ, pịkị ómine asẹmẹnị ma ḅie dapụ se osiḅụ wẹrị Ị̀rị Tamụnọ Ḅe pịrịapụ mịẹmẹ. Mịn mị kọkọmayeka, Ómine Izrẹlapụ? Mị anị Ị̀rị̀, Nyanaḅọ Ḅe, ḍukosaye-ẹ.

¹² Ọkụma ómine ini se osiḅụ koroma Ị̀rị̀ Tamụnọ Ḅe pịrịapụma pụlama se ini ḅo iru ḅumẹ. Pịkị tọn ịkịankoroapụma pịrịmẹ ini ị̀ya oku mị ḍukoma.

¹³ Mịọkụ àrị ọ́ kọsịma dẹkịdẹkịma kiri pịrịḅịa se iku fịayemgbọlụ deki kporokporo ḅie de-ọkụ ọ́ nwọ deḅịa.

¹⁴ Ọbịrị mangị-ḍin-apụ sọnị pịọrụso ẹkẹ; kụrọ apụma ḅụ ịnyọ faḅịa, pịkị owuni ineda inia ḍumo ḍụaẹkẹ.

¹⁵ Lubu owuni ineda mịna kiri chịẹ ẹkẹ, ọbịrị mangị kọn ḍin apụ sọ ḅọrọso ẹkẹ, pịkị asụn ọgọnọ sime owuapụ ineda inia ḍumo ḍụa ẹkẹ.

¹⁶ Anị ene, kuḅie kụrọtẹịn owunima pembe, inia owuni ayema sarakoroma se mangịḅịa.” Nyanaḅọ Ḅe ori ọkwẹịnsam.