Emọs 1 - Kịrịkẹnị Baịbụl

Tamụnọ Ḅe Izrẹl Mị Na Gbakịmaye Nwọ Finji Emọs Ḅe Pịrịmẹ

¹ Mịn anị Emọs ḅe se ḅo oku mị-ẹ, Tẹkoa ama ḅie gbọrị anana ḍikiḍikiḅọ-ẹ. Tamụnọ Ḅe Izrẹl ḅụ maye mamgba finji Emọs ḅe pịrịmẹ mama kụra ḅụ amakiri mị mà gịẹịn puka sịkị ḅụ, anị Ọzaya ḅe Juda amanyanaḅọ sọ sịkị, pịkị Jeroboam, Jẹhoash tọkụ ḅe, Izrẹl amanyanaḅọ sọ sịkị.

² Emọs ḅe ọkọ ḅẹmẹ, “Nyanaḅọ Ḅe Zaịyọn ḅie wẹrị ekereamẹ; ọ̀ pụkọ Jerusalẹm ḅie so alagba fieọkụ fiemẹ. Nama ma yefịfị kiri ma samịnaḅịa, pịkị Kamẹl Tụndụ ọgọnọ osueinma samịna kpatụḅịa.”

Tamụnọ Ḅe Ò Fomuḅara Se Izrẹl Mị Na Palịanga Sẹ Ma Pịrịḅịa Siria

³ Nyanaḅọ Ḅe ọkọ ḅẹmẹ, “Damaskọs apụma ini mbikia-mbikiama simịẹsam mịn mị gose à fomuḅara se ini pịrịḅịa gbarịmaka ḅaraḅụ. Ini ḅụgbẹịnka-siḅara nwọse Giledị apụma mịẹmẹ.

⁴ Anịẹrẹchị à fịnị se Amanyanaḅọ Hazaẹl ḅe nama amanyanaḅọ nụngọ mị sẹịnmaḅịa, à pịkị Amanyanaḅọ Bẹnhadad ḅe owuni-a warịma dọkịma saraḅịa.

⁵ À Damaskọs opuama mị onu ḅọkọ ma kọsịmaḅịa se à pịkị Evẹn Pẹsịkiri ḅie sime apụma sinḅịa, pịkị Bẹt-Idẹn ḅie ḅẹrẹtọnḅọ ḅe na. Siria apụma ini ikoliapụ ḅaraḅụ ini ọkịso Kị ama mị munḅịa.”

Filistia

⁶ Nyanaḅọ Ḅe ọkọ ḅẹmẹ, “Gaza apụma ini mbikia-mbikiama simịẹsam, mịn mị gose à fomuḅara se ini pịrịḅịa gbarịmaka ḅaraḅụ. Ini bebe gbọrị sẹ ọkị so mun Idọm apụma dẹrịmẹ omoniapụ ḅaraḅụ.

⁷ Anịẹrẹchị à fịnị se Gaza opuama mị onu ma sẹịnmaḅịa, pịkị anịa owuni-a warịma dọkịma saraḅịa.

⁸ À Ashdọd na Ashkẹlọn na opuamama ḍikiḍikiarị tịḅịnịma sinḅịa. À fomuḅara se Ẹkrọn opuama mị pịrịḅịa, se kọn Filistia apụ mamgba ini fịḅịa.”

Taya

⁹ Nyanaḅọ Ḅe ọkọ ḅẹmẹ, “Taya-a tomonima ini mbikia-mbikiama simịẹsam, mịn mị gose à fomuḅara se ini pịrịḅịa, gbarịmaka ḅaraḅụ. Ini bebe gbọrị sẹ dekiso mun ḅụfụka ḅie chumẹ Idọm ama ḅie, se ḅarị inia ikia-ḅịpị-ogbo-sọ mị kokoka ẹrẹchị.

¹⁰ Anịẹrẹchị à fịnị se Taya opuama mị onu ma sẹịnmaḅịa, pịkị anịa owuni-a warịma dọkịma saraḅịa.”

Idọm

¹¹ Nyanaḅọ Ḅe ọkọ ḅẹmẹ, “Idọm-a tomonima ini mbikia-mbikiama simịẹsam, mịn mị gose à fomuḅara se ini pịrịḅịa gbarịmaka ḅaraḅụ. Ini inia mịnapụ, Izrẹlapụma, ḍuko se okola agiji se ini ḅaaḅịa ẹrẹchị, pịkị ini ḍikiḅụgererekẹ. Inia si-kuḅie mị eke nyanakẹ, ini pịkị ḅerenikẹ anị fị.

¹² Anịẹrẹchị à fịnị se Timan opuama mị sẹịnmaḅịa, pịkị Bozra owuni-a warịma dọkịma saraḅịa.”

Amọn

¹³ Nyanaḅọ Ḅe ọkọ ḅẹmẹ, “Amọn apụma ini mbikia-mbikiama simịẹsam, mịn mị gose à fomuḅara se ini pịrịḅịa gbarịmaka ḅaraḅụ. Owu ḅụ ini jịn eke nyanaḅịaye gose, ini simekọn-eremeni ma ḅụlọma pupufinjimẹ Giledị ḅie.

¹⁴ Anịẹrẹchị à fịnị se Raba opuama mị onu ma sẹịnmaḅịa, pịkị anịa owuni-a warịma dọkịma saraḅịa. Anịsịkị owu ene ḅụ oloku-a tịḅịḅie nyọnyọ ma ḅụ fieḅịa, se owu mị irisi fie ọkụ fieḅịa.

¹⁵ Inia amanyanaḅọ ḅe na oria fịrịnwẹngịapụma na ini nwọ desinḅịa.”