Ẹklisiastis 9 - Kịrịkẹnị Baịbụl

Kuluma Mị Gbọrịye-ẹ

¹ À ḅọlọ sịkị seni kụrọma koroma se mamgba ọrịmẹ na Tamụnọ Ḅe anị ḅẹrẹtọn yenemi apụ na, karakara apụ na mịẹmịẹaye ma pịrịarịye-ẹ, pịkị ini na ḅẹlẹma apụ na ini na taraka apụ na. Tọrọkọju sime nụḅọ pịrịye nemiḅịa gbọrịḅọ sọnị ofori-ẹ.

² Anịaḅụ kịrịye ofori-ẹ. Ḅereniḅo gbọrịye mị ḅo karakara apụ na sitịḅịnyana apụ na, iḅiapụ na, siapụ na lamẹ, pịkịna Tamụnọ ḅereni apụ na, ini Tamụnọ ḅerenika apụ na, ḍiepịrịaye agbamịẹ apụ na, pịkịna ḍiepịrịaye agbamịẹka apụma na sọnị. Iḅiḅọ ḅe iḅitẹịn simịẹḅọ ḅe nẹngịkẹ; yekarịfịḅọ ḅe iḅitẹịn karịfịkaḅọ ḅe nẹngịkẹ. Tọrọkọju paka wa pịrịḅịaye ma ḅụ kịrịye ofori-ẹ.

³ Gbọrị ḅereniḅoye mị sime minemgba pịrịmẹ, mịn mị anị mị tomonikiri mị ḅie pakapaka se karakarakaye ma karakaraka ọkụ karakaraka gbọrịye-ẹ. Tomoni nwọ ḍumo àrị sịkị layelaye inia kuḅie simịẹmịẹaye na nọmụaye na ḅụ ḅeinmẹ, se ini ḅụnemika ḅụ fịmẹ.

⁴ Ọkụma ḍumo apụ tomonikiri mị ḅie fịkaḅụ simeḅọ goyegoye tọrọkọju mịẹḅịaye se kuḅie chụaḅịa. Fịka obiri ḅe iḅitẹịn fịsa chịrịḅa ḅe nẹngịmẹ.

⁵ Iin, ḍumo apụma ini nemimẹ na ini fịḅịa, ọkụ fịsapụma ini gbọrịye sọnị nemikẹ, ini ḅarị jịn gbẹịnye nyanakẹ; ini gbọtụma ini se ḅieḅaramasam.

⁶ Ini nyana ḅẹlẹma na taraka na, siaye na iḅi mịẹmịẹaye na, arịmgba ini na fịmẹ. Mị tomonikiri ḅie ini nyana mịẹḅịaye gbọrịye ngịsị ḅarị ofori-ẹ.

⁷ Mịẹma mun—ị́ya fịye mị fị se ḅieḅẹlẹ; ị́ya iruḅu se ị́ ḅụ nwana-nwanama. Anịmgba Tamụnọ Ḅe ori na deinmẹ.

⁸ Sịkịmamgba ḅieḅẹlẹ ḅụ sime se ị́ ḅụ nwana-nwanama.

⁹ Ị́ ḅẹlẹma nyana pịrị eremeniḅọ ma na tọrụḅẹlẹ nyana, Tamụnọ Ḅe seni mị tomonikiri ḅie ị́ pịrị kaịnḅo ḅịa ọkụ ofori ḍumo ḅie ị́ la ḍin goyegoye ḅụ. Ene goyegoye tọrụḅẹlẹ nyana, anịatịḅị ị́ya ḅụfụka mamgba ḅụ anị mị kẹngẹ anị ị́ nyanaḅịaye-ẹ, mị kaịnḅo ḅịa ọkụ oforika ḍumo mị ḅie.

¹⁰ Ị́ nwẹngị fịrị goyegoye kụrọma nwẹngị anịatịḅị fịsapụ tomonikiri ḅie, mịẹaye ofori-ẹ, yekoroma ofori-ẹ, yenemi pịkịna ofori-ẹ, anịnyọ anị ị́ mun-arịye-ẹ.

¹¹ À gbọrịye nemiḅomẹ, mị tomonikiri ḅie mangịtẹịn apụma sịkịmamgba arụḍụa ọmụḅaraiḅi nyana nyanakẹ, kụrọ kuḅie nyana apụ pịkịna sịkịmamgba ọmụ mị inuma-inumakẹ. Yenemi apụma sịkịmamgba ye-fẹ-fị igbiki nyana-nyanakẹ, obiri apụma sịkịmamgba alakọn-kọnkẹ, yemịẹḍin apụ pịkịna iwo mun opukiri lalakẹ. Sifụḅara tomoniḅọ goyegoye lalamẹ.

¹² Ị́ya sịkị laḅịa sịkị ngịsị ị́ nemikẹ. Feni ma ḅụ-nemika mun ḍẹịn ḅie koro ọkụ simemẹ, inji ịgbọ ḅie koro ọkụ simemẹ, wa siaye ḅie sọsọmẹ mịna kuḅie ngịsị ọkọtọnka sịkịḅụ.

Yenemi Mị Iḅitẹịn Yenemika Mị Nẹngịmẹ

¹³ Àrị ọrị jịnye omi-ẹ, yenemi mị sime ọkụ seni otomaḅịa iḅiye, anị yenemi mị mị tomonikiri ḅie ini nwọ ọrị ọkụ.

¹⁴ Tomoni opuma ḅie ofori gbọrị kala ama omi-ẹ. Gbọrị kụrọ amanyanaḅọ owu seni anị pakamẹ. Ori anị ḍẹkị kelema se onu ma kantoluḅịa ẹrẹchị ḅụkarakaramamẹ.

¹⁵ Gbọrị igweinḅọ anịnyọ angamẹ, ọkụma ori opuma nemi nyanamẹ se ori ineda ama mị ḍụaḅịa. Ọkụma oria koroma kọn gbọrịḅọ sọnị ofori-ẹ.

¹⁶ Sịkịmamgba à ḍukosam na yenemi mị iḅitẹịn ịnyọ nẹngịmẹ, ọkụma gbọrịḅọ sọnị igwein apụ yenemimẹ ḅe koroma kọnkẹ pịkịna sịkị nyana ini kọn ọkwẹịn pịrịkẹ.

¹⁷ Yenemiḅọ ḅe kọn dein ọkwẹịn ma poki mị iḅitẹịn yenemika apụ koḅiria ḅie oloku àrị ḅẹrẹtọnḅọ ḅe poki mị nẹngịmẹ.

¹⁸ Yenemi mị iḅiye mịẹtẹịn owusọaye nẹngịmẹ, ọkụma simịẹmịẹ gbọrịḅọ ineda tọn-a iḅiaye simaḅịa.