Ẹklisiastis 4 - Kịrịkẹnị Baịbụl

Tomoniḅọ Ḅe Ori Opuma Ḅụḅalaḅala Nyanamẹ Ḍumo Ḅie

¹ Anịsịkị à pịkị simịẹmịẹaye mamgba nwọ ḍikimẹ, mị tomonikiri ḅie mịẹarịye ma. Ini pụnụma apụma ini owuaḅẹ, ḅarachụa ini pịrịḅịa gbọrịḅọ sọnị ofori-ẹ. Iniaḅụ sime seni ḅarachụa ini pịrịḅịa gbọrịḅọ sọnị ofori-ẹ, anịatịḅị ini pụnụma apụma ḅụ sime kụrọ omi-ẹ.

² Fịse-sosa-apụ ma àrị ini sọlịmẹ, ini ma iḅitẹịn pa mịọkụ ḍumoarị apụma nẹngịmẹ.

³ Ọkụma maịn ma ḅụ iḅitẹịnye anị ngịsị ma ini yika apụ ma-ẹ, mị tomonikiri ḅie mịẹarị siaye ma ngịsị nwọ ọrịẹka apụma.

⁴ Tomoni gose gagama fịrịnwẹngị se mịẹye ḅarasọ mị à pịkị nwọ ḍawọsam; anịatịḅị ini ini na kpekima anga apụma nyana aye sọlịmẹ. Ọkụma anị ḅụḅalaḅalamamẹ anị kaịnḅo. Mangị fọrụ ḍuko ọkụ simemẹ.

⁵ Ini nwọ ḅẹmẹ na mịnaḅụ ḅereni, se ọ̀ ḅarama kpo-sara-sime ḅuruḅaa pịrị se fịḅọ ḅe yenemikaḅọ-ẹ.

⁶ Sosi ọkọ-ẹ ḅẹsọnị, pa kuḅie deinḅụ kalaye nyana mị iḅitẹịn fọrụ kunḅịa ẹrẹchị mama ḅarama se sịkịmamgba fịrịnwẹngị mị nẹngịmẹ.

⁷ Ḍumo mị ḅie à ḍọkịḅoye mị anị ḅụḅalaḅalamamẹ anị kaịnḅo.

⁸ Ngẹrị anga gbọrịḅọ omi-ẹ. Ori owutọkụ nyanakẹ, mịnaḅọ sọnị ofori-ẹ, anịẹḅẹsọ sịkịmamgba ọ̀ fịrịnwẹngịaḅẹ, ọ̀ nyanasa ngọ ngịsị ori na deinkẹ. Ọ̀ gagama fịrịnwẹngị tụḅọ pịrị-ao se ngịsị ọ̀ ḅụtima ḍụkụkẹ gbọrị sịkị sọnị? Mịn mị sọnị anị ḅụḅalaḅalamamẹ anị kaịnḅo, anị mị ngịsị ḅieḅẹlẹmaka ḍumo ḅara-ẹ.

Anị Opuma Iḅimẹ Mama Apụ Nwẹngịgboloma

⁹ Mama apụ iḅitẹịn gbọrịḅọ nẹngịmẹ, anịatịḅị gboloma ḅụ ini ḅakama fịrịnwẹngịtẹịnḅịa.

¹⁰ Iniaḅụ gbọrịḅọ ḅịkị koromẹ ḅẹḅẹ, ísíḅọ ḅe ineda ḅarachụa ọ̀ pịrị se ọ̀ sịsẹḅịa. Ọkụma gbọrịḅọ kẹngẹ-ẹ se ọ̀ ḅịkịmẹ ḅẹḅẹ, opuma si mẹ, anịatịḅị ḅarachụa ọ̀ pịrịḅịa gbọrịḅọ sọnị ofori-ẹ.

¹¹ Oḅoku omi-ẹ ḅẹḅẹ, mama apụ ineda gboloma mọnọ iniaḅụ ọfịrịmaḅịa, ọkụma nde ị́rị́ ngẹrị ị́ ḅụ mịẹse anị ọfịrịḅịa ọkụ.

¹² Mama apụ ineda gbọrịḅọ nẹngịmaḅịa owu dachịẹmaḅịa. Tẹrẹ-a ḍiki ini nwọ parị seni gbọrị ḍiki mịẹ ḍiki pẹlẹ mị kụrọmẹ.

Ị́ Olomu La-ọkụ La-ọkụ Ị́ Nemi Nyanakẹ Ḅẹḅẹ Sọye Ofori-ẹ

^13-14 Tomoniḅọ ineda igwein ḅụ sẹnịḅo oria sẹ amanyanaḅọ sọḅịa, anịkanịka ikoliḅọ ḅụ mun emine mị kpọlịḅịa ọkụma oria olomu-a kụra ma ḅie ori opuma yenemika se tetema naanaakẹ ḅẹḅẹ, ori iḅitẹịn igwein ọkụma ọbịrị yenemi owutọkụ ḅe nẹngịkẹ.

¹⁵ Mị tomonikiri mị ḅie sime tomoni mamgba à nwọse koroma ḅụ chumẹ, se à ḍọkịḅo ọrịmẹ na, gbọrị anga ḅụ, asẹmẹnị ma ḅie gbọrị owutọkụ omi-ẹ amanyanaḅọ kiri ọkịḅịaḅọ.

¹⁶ Amanyanaḅọ ḅẹrẹtọn pịrịḅịa apụ kịẹnḅịpị kulumakẹ; ò sosa ḅẹḅẹ, ò tokoniḅịa gbọrịḅọ sọnị ofori-ẹ ọ̀ mịẹsaye ma ḅụ. Anị ḅụḅalaḅalamamẹ anị kaịnḅo anị gose ọkọ pakaye. Mangị fọrụ ḍuko ọkụ simemẹ.