Ẹklisiastis 2 - Kịrịkẹnị Baịbụl

Ḅieḅẹlẹ Mị Kaịnḅo Mị Anị Ḅụḅalaḅalamamẹ

¹ À tọn pẹlẹmẹ na àrị ị̀ ḅụ timaḅịa se ḍọkị nemiḅịa ḅieḅẹlẹ mị cheye. Ọkụma àrị ọrịmẹ na, mịn mị sọ yeḅụ ofori-ẹ.

² À ḍọkịḅo nemimẹ na ḍẹrị mị yenemika mịẹmịẹye-ẹ, ḅụtima mị se ị́ mịẹ iḅi ofori-ẹ.

³ Yenemi gose ị̀ya kuḅie-chịẹ-chịẹ-chịẹ mị ị̀ se mun lanyọ ḅụ, à tọn pẹlẹmẹ na àrị iru se ị̀ ḅụ nwana-nwanamaḅịa, se tọrụ ḅẹlẹ nyanaḅịa. À koromamẹ na mị ḅara iḅitẹịn tomoni pịrịḅịa sẹkiri ḅie, se inia kpụlụ ḍumo ma anga ḅụ.

⁴ Ḅaka-aye à nwọ mịẹfamamẹ, à tọntọn-a warị nama ị̀ ḅụ pịrịmẹ, à pịkịna iru-mịẹmịẹ tụmgbakị elelenda ozu ḍipimẹ.

⁵ Ngwengwe na chịnmgbọlụ na ozu à nwọ ḍipimẹ, árịa ḅie kịrịkịrị chịnmgbọlụ eje omi-ẹ;

⁶ à ḍapa sokumẹ, se mengi mun arịa ikunoma lamẹ.

⁷ À ḅaka omoniapụ fẹmẹ, pịkịna ị̀ya warị kpo ḅie yi omoniapụ omi-ẹ, à ḅakama nama nyanatẹịn jịn sịkị Jerusalẹm ḅie angasaḅọ goyegoye nẹngịmẹ.

⁸ À pịkịna goli na seleḅa na nwọ koḅiri-koḅiri tundurumamẹ, à ḅẹrẹtọn pịrị amama ḅie sime amanyanapụ ngọ koko-a warịma ḅie ḅụ. Owuapụ na eremeni na nime chuchu ị̀ ḅieḅẹlẹma-ḅẹlẹmamẹ, à pịkịna owuḅọ nyana na iḅi eremeni mamgba nwọ nyanamẹ.

⁹ Iin, àrị opuḅọ sọmẹ, àrị opuḅọ sọtẹịn jịn sịkị ḅụ Jerusalẹm ḅie anga saḅọ goyegoye nẹngịmẹ, ị̀ya nemi mị pịkịna ị̀ gbakịkẹ ngịsị.

¹⁰ À nyana ḅiye goyegoye, à nyanamẹ. Mịn mị tọrụḅẹlẹmaḅịa ḅẹye goyegoye à se titikẹ. À nyana se nwẹngị fịrị goyegoye à se opuaye mịẹmịẹmẹ. Mịn mị mgba anị ị̀ya gbẹịnye mị-ẹ.

¹¹ Anịsịkị à mịẹsaye mamgba à nwọ koromamẹ, à kụrọma ịnyọ kpọma árị nwẹngị ḅara mị na, ị̀ ḅụokoromẹ anị fie gbọrịye sọ ofori-ẹ. Anị sime ḅara mangị fọrụ ḍuko ọkụ simemẹ, anị mịẹye nyanakẹ.

Nemi Mị Iḅitẹịn Oḅorisọ Mị Nẹngịmẹ

¹² Anịẹḅẹ sọnị, tatarị amanyanapụma mịẹ ḅọrọsaye, mị amanyanaḅọ ḅe ineda mịẹḅịaye-ẹ. Anịḅụ à sakị anị fieye nwọ koromamẹ, nemi ḅụ, anịkanịka yeseyechịnka, anịkanịka yenemika.

¹³ Yei, à nemimẹ, “Yenemi mị iḅitẹịn yenemika mị nẹngịmẹ, enekaka mị iḅitẹịn kanakana mị nẹngị ọkụ simemẹ.

¹⁴ Yenemi apụma ini ineda ini mun-arị nyọ mị ọrịḅịa, ọkụma yenemika apụma ini ineda ẹkẹ.” Ọkụma à pịkị nemimẹ na mị gbọrị ḅereniḅoye mị sime mine mgba koru aḅẹ.

¹⁵ Ị̀ ḅieḅụ à koromamẹ na, “Yenemika apụma la ḅụfụka ị̀rị̀ sọ ị̀ laḅịa. Anịḅụ che sọye à nwọ nyana opu yenemi mị ḅụ?” “Gbọrịye sọnị ofori-ẹ,” à nwọ pẹkẹrẹmẹ, “kpọkpọ gbọrịye sọnị ofori-ẹ.”

¹⁶ Yenemi apụ se ḅiekoromaḅọ ofori-ẹ, pịkịna yenemika apụ se ḅiekoromaḅọ ofori-ẹ. Tọrọkọju ḅoḅịa enema ḅie, mine mgba ini wa se ḅieḅaramaḅịa. Mine mgba wa fịḅịa, yenemi apụ na yenemika apụ na gbọrị ḅaraḅụ.

Wa Kụrọma Fịrịnwẹngị-a Sịkị Che Iḅi Anị Nwọse Wa Mịẹ Ḅe

¹⁷ Anịḅụ ḍumo ḅarị ị̀ ḅụ gbọrịye sọnị fiekẹ, anịatịḅị anịa ḅie simeye goyegoye ọkịḅo ị̀ pịrị gbọrịye sọ ofori-ẹ, ọkụma ḅụfụka kẹngẹ-ẹ. Arịmgba yeḅụ ofori-ẹ; à mangị fọrụ ḍuko ọkụ simemẹ.

¹⁸ À nwẹngịsa fịrịma na, fịrị ḅụ à nyanasaye ma na ị̀ ḅụ fie gbọrịye ofori-ẹ, anịatịḅị à nemimẹ na à árị wẹrịso ị̀ya kiri ọkịḅịaḅọ pịrịḅịa,

¹⁹ sosi ò yenemiḅịa, anịkanịka ò yenemi-ẹkẹ—tụḅọ ḅọrọ nemiḅe? Ọkọ-ẹ ḅẹ sọnị, à nwẹngịsaye mamgba ori árị nyana ọkịḅịa, ị̀ya yenemi mị nyana mị tomonikiri ḅie ị̀ pịrịye goyegoye. Arịmgba yeḅụ ofori-ẹ.

²⁰ Anịḅụ ị̀ kuḅie ḅo manamatọnmẹ, àrị ịnyọ kpọma fịrịnwẹngị ẹrẹchị.

²¹ Ị́ya yenemi na, yekaịnḅo na, pịkịna fịrịnwẹngị kpaịnma na ị́ nwọse fịrịnwẹngịmẹ, anịsịkị ị́ arịmgba wẹrịso seni arịaḅụ ngịsị gbọrị fịrị sọnị nwẹngịkaḅọ pịrịḅịa. Anị mị yeḅụ ofori-ẹ pịkị karakarakẹ!

²² Ị́ fịrịnwẹngịmẹ pịkị ḍumo ḅụ ị́ ḅụ ḅalaḅalamẹ, ị́ che nyana se anị ḍiepakụmaḅe?

²³ Ị́ ḍumo lasịkị lasịkị ḅụ, ị́ mịẹye goyegoye se ḅo gbọrịye sọnị ofori-ẹ, ọkụma ḅụḅalaḅala na kuḅie kan na-ẹ. Ḍin mị ḅụ sọ ị́ kuḅie warị deinkẹ. Anị ḅụḅalaḅalama ọkụ ḍiki.

²⁴ Iḅitẹịn se tomoniḅọ goyegoye mịẹḅịaye anị ye fị pịkị ḅu, se ọ̀ nyanaye ma ḅụ ḅo tọrụḅẹlẹ nyana. Anị ị̀ ḅụokoromẹ na mị sọnị Tamụnọ Ḅe ḅara ḅomẹ.

²⁵ Anịka ọkụma nde ị́ ye nyana ḅo fị anịkanịka ị́ ḅụtimaḅịa ọkụ?

²⁶ Tamụnọ Ḅe yenemi na, ye kaịnḅo na pịkị ḅieḅẹlẹ na seni ọ̀ ḅụḅẹlẹaye mịẹ apụma pịrịmẹ, ọkụma, ò si apụ mịẹse ini fịrịnwẹngị se igbiki nyana kokomẹ, mịẹso sịkị kuluma mị ini nyana ayema sime nwọ ọ̀ ḅụḅẹlẹaye mịẹapụ ma pịrịḅịa ọkụ. Arịmgba ḅụḅalaḅalamamẹ. Anị sime ḅara mangị fọrụ ḍuko ọkụ simemẹ.