Ẹklisiastis 12 - Kịrịkẹnị Baịbụl

Tamụnọ Ḅe Se Ḅiekoroma Enema Ma Fakasịkị

¹ Anịẹrẹchị ị́ tẹmẹḅọ ḅe seni ḅiekoroma ị́ nwọ pa asẹ ḅụ simearị sịkị, árị ngịrị enema na, kụra ma na ma ḅoka simeogbo, anịsịkị ị́ ḅẹḅịa, “Ḍumo ḅụ à tọrụḅẹlẹ nyanakẹ.”

² Anịsịkị anị ịrụa mị ḅe ḅịa mị na, akalụ na, lolia ma na ị́ ḅụ kanakana sọḅịa sịkị mị-ẹ, ene koroma soḅuno ma pịkịna ngịsị ḅọrọso-ẹkẹ.

³ Anịsịkị ị́ seni ị́ ḅụ ḍụaḍụa ḅarama geregereḅịa, ị́ ḅụọma, mịọkụ nwọ kụrọ ḅụọma árị lọkọḅịa. Ị́ya aka ma ị́ seni ị́ya fịye mị tokuruḅịaye ma ḅarị ḅaka ẹkẹ, ị́ tọrụmgbọlụma opuma giniginiḅịa se iḅiọkụma nyọ ọrị ḅụ.

⁴ Ị́ ḅeri ma ateli ogbo fiearịye ḅụ inikimẹ. Ịpịamgba gbẹịnye mị yegbẹịn àrị sịkị ị́ pa ineda kelekele naaḅịa, anịkanịka ini nime chuarị sịkị sọnị, feni chuarị nime ineda mọnọkiri ị́ wo sịsẹmaḅịa.

⁵ Gololo-a nyọ ị́ ḅalafamaḅịa, ḅụọ-se-nwẹngị sọnị ị́ ḅalafaḅịa. Ị́ tịḅị inime ma ḅo iḅulu chụaḅịa; ị́ ineda ngịsị ị́ ḅụ fọnọ ị́ munḅịa nyọ mun-ẹkẹ, ị́ ḅietọn seni ị́ mịẹḅịaye mamgba faḅịa. Wa mịna kuluma ịnyọ sara-nyọ mị mun aḅẹ, anịsịkị ḅụ ateli ma ḅie ḍụẹịn ḍin simeḅịa.

⁶ Seleḅa ikoli mị pẹlẹḅịa, goli-goli tọnjie mị sokoro puḅịa; tiḅe mị ḅụ sime ḍiki mị pẹlẹḅịa; se mengi ojongo mị kọsịḅịa.

⁷ Mịna ojuma pịkịma mun kiri mị ḅụ fọn sọḅịa; seni ḍumo pịrị ịnyọ mị pịkịna vinpịkị so mun anị seni wa pịrị Tamụnọ Ḅe damamunḅịa.

⁸ Anị ḅụḅalaḅalamamẹ, Yeḍieḅọ ḅe ọkọ ḅẹmẹ, anị iḅiọkụma ḅụḅalaḅalamamẹ; ḍumo mị ḅie sime ayema mgba kaịnḅo.

Mịn Anị Yemamgba Ḅe Kuluma Mịẹ

⁹ Anịatịḅị opuma ye ḍawọ nemiḅọ ḅe, ò ye nemimẹ, sịkịmamgba ò nemiye mị ọ̀ nwọse tomonima telima aḅẹ. Ọ̀ kaḅo ma ḍawọ nemimẹ pịkịna kuḅie la ḅaraḅụ arịa karakara mị ḍọkịḍikimẹ.

¹⁰ Opuma yenemiḅọ ḅe, ọ̀ ḅụkụrọma kuḅie kụrọma ọkwẹịn ḍọkịmẹ, ọkụma ọ̀ gịẹịn ọkwẹịn ma kuḅie-se-ḅụgbana gbẹịn aye-ẹ.

¹¹ Yenemiapụ ọkwẹịn ma, anana ḍikiḍiki apụ seni anana ḍikiḍiki ḅịpị mịọmịọ chịnma simeọkụ simemẹ, kaḅo koḅirima koroma mị, ini se yeḅụ ḅakụ chu churu sime ḅene-ḅene la-ọkụ simemẹ. Tamụnọ Ḅe árị seni wa pịrịmẹ, anị anana ḍikiḍikiḅọ anana ḍikiḍiki ḅara nwọse minemgba ḍikiḍiki árị gbọrịḅọ ḅe-ẹ.

¹² Ị̀ya owutọkụ, ọbịḅịa jịnye omi-ẹ. Ḍiri gịẹịn mị kuluma nyanakẹ, opuma yeḍawọ pịkịna ị́ ḅụ ịnyọ famaḅịa.

¹³ Anị mị sikima, ḍukoḅịa gbọrịye kẹngẹ omi-ẹ: Tamụnọ Ḅe osi, pịkịna ọ̀ tọn ayema mịẹ, anịatịḅị ini gose mbuḅọ tẹmẹye mamgba ḅụ, mịn mị anị yetịḅị mị-ẹ.

¹⁴ Wa mịẹye goyegoye Tamụnọ Ḅe ọ̀ ḅẹrẹkọn anị pịrịḅịa, iḅiye-o anịkanịka siye sọnị, ḅọịma ḅụ mịẹ aye sọnị.