Ẹklisiastis 11 - Kịrịkẹnị Baịbụl

Kụrọma Fịrịnwẹngị Mị Anị Iḅi Gbẹịnye Nyanamẹ

¹ Ị́ya igbiki seni jịn sẹ apụ na sọye nyanaḅịa tuḅo ḅie chu; ị́ pịkị sọye nyanaḅịa ma enema ḅe gbọrị ene ḅụ.

² Ị́ya igbiki mị seni tọntọn-a nyọ ḅụ chu, tọntọn-a nyọ ḅụ, jokoma, anịatịḅị mị tomonikiri ḅie ị́ nyanaḅịa sifụḅara mị simeḅịa ọkụ ị́ nemikẹ.

³ Anị simeọkụ simeọkụ sọnị, eje nwọ tịḅịtu da seni ḅịkị nyọ mị ḅụ, anị ḅọlọlọ simeḅịa. Soḅuno ḅakasa ḅẹḅẹ, ene koroḅịa.

⁴ Fọrụ mị na, sịkị mị na pa ḅo karakara ị́ nwọ korumẹ ḅẹḅẹ, ngịsị gbọrịye sọnị ị́ ḍipi ẹkẹ ị́ pịkịna gbọrịye sọnị soku-ẹkẹ.

⁵ Tamụnọ Ḅe yegoyegoye mịẹmẹ, ị́ pịkịna ineda ọ̀ mịẹarịye kaịnḅo-ẹkẹ ngịsị, anị ị́ pịkịna ineda fura eremeniḅọ ḅụlọ ḅie ịwọ-ḍumo mị sakị ọkụ nemi-ẹka ọkụ-ẹ.

⁶ Dede ḅie ị́ ḍipiḅịaye ḍipi pịkịna saso ḅiri na. Ngịsị ị́ nemikẹ arịmgba iḅiọkụma pakaḅịa-etuḅo, anịkanịka ḍipiye mị ḅụ gbọrịye iḅiye mịẹtẹịn ísíye mị nẹngịḅịa.

⁷ Ḅasa iḅi ene mị ḅụ tọrụḅẹlẹ nyana mị iḅimẹ.

⁸ Ị́ lakụra-lakụra ḅụ ḅieḅẹlẹ nyana. Anị ḅẹrẹ nyanakẹ, ị́ ḍumo la-ḍin-la-ḍin, se ḅiekoroma na ị́ fịḅịa, anị mị ḍin latẹịnmẹ. Ngịsị tọrọkọ ḍikiḅịa gbọrịye ofori-ẹ.

Se Ayamburamapụ Pịrị Tetema

⁹ Ayamburamapụ, ómine ọ́mịna sịkị mị ḅụ ḅụtima. Ó ḅieḅẹlẹ ọ́ nwọ pa ịwọ ḅụ sime warasịkị. Ọ́ mịẹ ḍọkịye ọ́ mịẹ se ọ́mịna kuḅie tọnye mị ḍuko nwẹngị. Ọkụma se ḅiekoroma na ị́ mịẹye goyegoye ḅụ Tamụnọ Ḅe ọ̀ ḅẹrẹkọn ị́ pịrịḅịa.

¹⁰ Ḅerenima ye ị́ ḅụḅalaḅalama anịkanịka ị́ ḅụ ọyịmaḅịaye ị́ la. Ị́ ịwọ ḅụ sime ḅọlọ sịkị la-ẹkẹ.