Ẹklisiastis 1 - Kịrịkẹnị Baịbụl

Ḍumo Mị Yeḅụ Ofori-ẹ

¹ Ma mị Yeḍieḅọ ḅe ḍukoaye ma-ẹ, Devid owutọkụ, Jerusalẹm amanyanaḅọ sọ ḅọrọsaḅọ ḅe.

² Anị ḅụḅalaḅalamamẹ, Yeḍieḅọ ḅe ọkọ ḅẹmẹ, anị iḅiọkụma ḅụḅalaḅalamamẹ; ḍumo mị ḅie sime ayema mgba kaịnḅo.

³ Ị́ya ḍumo ị́ nwọ fama fịrịnwẹngịaḅẹ, ịnyọ ị́ nwọse fịrịnwẹngịaḅẹ, anị mị ḅụ cheye ị́ nwọ nyana se ḍiepakụmaḅe?

⁴ Ḅụọ-ḅụọ ḅomẹ ḅụọ-ḅụọ pịkịna somẹ, ọkụma tomonikiri mị anị sime gbọrị ḅara anị anị pa omi-ẹ.

⁵ Ịrụa mị pa pakaḅoaḅẹ, anị pa pịkịna tukoroaḅẹ, ịnyọ fa ḅara ḅụ anị pịkịma mun anị pịkị sakịḅịa nyọ mị lamẹ.

⁶ Fọrụ mị fie chuku damẹ, fọrụ mị fie ọgọnọ damẹ, kelema kelema koro se pịkịma ḅomẹ.

⁷ Ideri ḅu-mengi goyegoye ideri mun ala-mengi tọrụ ḅie koromẹ, ọkụma ala-mengi tọrụ mị ma ḅeinkẹ. Mengi mị anị vinpịkị ideri mengi mị sakị nyọ mị ḅomẹ, se anị sakị anị gbọrị ḅara mị mịẹmẹ. Yegoyegoye kuluma nyanaka ḅara nwọse pịkị sakịmẹ.

⁸ Yegoyegoye tọrụ se ịnyọfa damẹ, ọkwẹịn ineda ḍuko-ẹka opu ịnyọfa. Mịna tọrụmgbọlụma ye ḍiki ḅụ ịnyọ arịaḅụ fakẹ, mịna ḅeri ma sọnị ịnyọ arịaḅụ fakẹ. Ye ma kuluma nyanaka ḅara mị àrị se pakarịye; tomoniḅọ ineda ḅịpị se ḍuko ẹka ḅara.

⁹ Tatarị paka ḅọrọsaye mị pịkịna pakaḅịaye-ẹ. Tatarị mịẹ ḅọrọsaye mị pịkịna mịẹḅịa. Bebe tomonikiri ḅie mgba ịwọye ofori-ẹ.

¹⁰ “Ḍiki,” ini nwọḅẹmẹ, “mịanga mị ịwọye-ẹ!” Ọkụma ẹn-ẹn, anịmgba mịẹ ḅọrọsam, ma ini wa yika sịkị ngịsị.

¹¹ Ḅọrọsa sịkị ḅụ mịẹye seḅiekoroma gbọrịḅọ sọ ofori-ẹ, pịkị ḅoḅịa enema ḅie na mịọkụ na, anịsịkị na mịẹḅịaye seḅiekoromaḅịa gbọrịḅọ sọ ofori-ẹ.

Yeḍieḅọ Ḅe Ḍawọ Mị Kaịnḅoḅịa Ọkụ Ḍọkịmẹ

¹² Ị̀rị̀, Yema Ḍawọ Nemiḅọ ḅe Izrẹl sẹ mị ḅie àrị amanyanaḅọ sọsam Jerusalẹm ḅie.

¹³ À ḍuko pẹlẹmẹ na à ye sọkịrị ḍiki se mị tomonikiri mị ḅie mịẹaye goyegoye nwọ ḍawọḅịa. Tamụnọ Ḅe ngịsị tomoni-a ḅieḅẹlẹmaka ḅereniḅoye ọ̀ nwọse mịna ọgọnọ gbanasam.

¹⁴ Mị tomonikiri ḅie mịẹye goyegoye àrị ọrịsam, se à ḍuko ị́ pịrịaḅẹ na, arịmgba ḅụḅalaḅalamamẹ. Mangị fọrụ ḍuko ọkụ simemẹ.

¹⁵ Ị́ ineda pịkịma-pịkịmaye mịẹ gbụkụkụma-ẹkẹ, ị́ ineda oforika aye kịẹn-ẹkẹ.

¹⁶ À nwọse ị̀ ḅụ ḅẹmẹ, “à ḅo opuḅọ sọsam, à yenemitẹịn ị̀ tọrọkọda tatarị Jerusalẹm ḅie ḅẹrẹtọnḅọ goyegoye nẹngịmẹ. Nemi mị na yekaịnḅo mị na; à jokoma árị sime ọkụ nwọ nemimẹ.”

¹⁷ À ḍuko pẹlẹmẹ na yekaịnḅo mị na yenemika-mịẹmịẹaye mị na ogboku kịrịye à nwọ ḍawọḅịa, nemi mị na, nọmụ-a mịẹmịẹaye na. Ọkụma à ḍọkịḅo ọrịmẹ na à pa mangị fọrụ mị ḍuko aḅẹ.

¹⁸ Ị́ yenemitẹịn àrị sịkịḅụ, ị́ ḅụḅalaḅala nyanatẹịnmẹ; ị́ yenemitẹịn sịkịḅụ, ị́ yeḅụosọ nyanatẹịnmẹ.