Ẹfịsọsịapụ 3 - Kịrịkẹnị Baịbụl

Pọl Ḅe Nwẹngị Jịnsẹapụ Ma Pịrị Fịrị

¹ Mịn mị gose, ị̀rị̀, Pọl ḅe, Kraịst Jizọs ikoliḅọ ḅe, ómine Jịnsẹapụma tịḅị gose Tamụnọ Ḅe tẹkẹmẹ.

² Pikipikiye ofori-ẹ na Tamụnọ Ḅe oria ḍikiḅụgerere ḅụ mị fịrị mị nwọse ị̀ pịrịmẹ àrị anị nwẹngị ómine pịrị ọ́mịna iḅi gose.

³ Tamụnọ Ḅe ọ̀ tọn koroma ḅọịye mị nwọ mịẹ ḅelema ị̀ pịrị, se anị seni ị̀ ḍiemẹ. (À kpụlụma mịn mị gbolomaye nwọ gịẹịnsam,

⁴ à gịẹịnye mị ó nemikase nwọ kịẹn ọkụma, ómine ineda Kraịst Ḅe ḅụ à kaịnḅo ḅọịye mị nwọ ḍawọnemiḅịa.)

⁵ Ḅọrọsa sikima ḅụ mị ḅọịye mị ini anị ḍuko tomoni pịrịkẹ, ọkụma mịọkụ Tamụnọ Ḅe ọ̀ Tẹmẹ Ḅe ḅụ ḅọrọ anị mịẹ ḅelema oria fịafịa okunwẹngịapụ ma na ịkịankoroapụma na pịrịsam.

⁶ Mịn ḅọịye mị-ẹ; Iḅi Ḅẹrẹ mị ḅụ Jịnsẹapụma ini Juapụma ḅụ sọ Tamụnọ Ḅe ḅẹlẹma ma nwọ ḍiaọkịsam; ini gbọrị oju apụ nwọsọsam, se Tamụnọ Ḅe Kraịst Jizọs Ḅe ḅụ ḅọrọ ḅereniaye ma nwọ ḍiaọkịsam.

⁷ Tamụnọ Ḅe sosikima ḍiepịrịye nwọse ị̀ pịrịmẹ, ị̀ se iḅi ḅẹrẹ mị fịrịnwẹngịḅọ mịẹ ḅụ.

⁸ Ị̀rị̀ iderimatẹịn Tamụnọ-a tomonima ḅụ bokatẹịnḅọ ḅe nẹngịmẹ, anị sọnị Tamụnọ Ḅe mị kiri mị nwọse ị̀ pịrịmẹ na ị̀rị̀ mun Kraịst Ḅe oria dachịẹma nyanaka pẹrẹ mị ḅe Iḅi Ḅẹrẹ mị nwọ ḍuko Jịnsẹapụma pịrị-ẹ,

⁹ Tamụnọ Ḅe se ḅọị ḅụ wẹrịye mị ọ̀ nwọ mịẹḅịa ọkụ se ḅọḅọ tọrụ finjimẹ, chuku sakị mị ḅụ ngịsị. Tamụnọ Ḅe, anị ye mamgba tẹmẹ ḅọ ḅe, mịn mị se ḅọị wẹrị se ọ̀ ḅụ pịrịmẹ,

¹⁰ mịẹse mị sịkị mị ḅụ, oria pẹkẹrẹ kịrịkịrị nemi mị soḅie sime enjẹlapụ ogbo ma na, ḅẹrẹtọn apụma kụrọ ma na, chọchị mị ḅụ, ḅọrọ nwọ nemiḅịa ọkụ.

¹¹ Tamụnọ Ḅe mịn mị nwọ mịẹmẹ oria kuluma nyanakaye tọn mị wẹrị sime ḅara ḅụ, anị wa Nyanaḅọ Jizọs Kraịst Ḅe ḅụ ọ̀ ḅọrọ mịẹsaye mị.

¹² Wa ori na gbọrịye mịẹ pịkị ọ̀ ḅụ ḅereni nyanaye gose, anị ḅele wa pịrịmẹ na wa Tamụnọ Ḅe tọrọkọ nwọ mun ḅalafa nyanaka ḅara ḅụ.

¹³ Anị-ẹ nwọḅẹ sịkị, àrị ọ́ tẹkẹmẹ, ye ọ́mịna kuḅie lọkọma, anịatịḅị àrị ómine gose tọrụsiọrịarịye gose; arịmgba sọye ḅara ḅụ sime ọ́ pịrịmẹ.

Kraịst Ḅẹlẹma Mị

¹⁴ Mịn mị tịḅị gose, Ḍaḅọ Ḅe tọrọkọ à kpẹrẹkị tẹkẹmẹ,

¹⁵ ọ̀ ḅara ḅụ anị bebe soḅie na sẹkiri ḅie na sime furo goyegoye ḅọrọ mịna karakara ẹrẹ nwọ nyanaḅoye-ẹ.

¹⁶ À Tamụnọ Ḅe ḅara ḅimẹ na ori oria boma mị ḅe pẹrẹ ḅụ, oria Tẹmẹ Ḅe ḅụ ḅọrọ kụrọ se ọ́ pịrị mịẹse ómine ọ́mịna ḅie ḅụ ịnyọ nyanaḅịa ḅara,

¹⁷ se à pịkị ḅimẹ na, ḅereni ḅụ Kraịst Ḅe ori ọ́mịna kuḅiemgbọlụma seni ori anga nyọ mịẹḅịa ḅara. À tẹkẹmẹ na, ḅẹlẹma ḅụ ọ́ wẹrị ọ́mịna kunoma na chukuma na nwọ chụa,

¹⁸ mịẹse ọ́ Tamụnọ-a tomonima na gboloma kụrọ nyana seni Kraịst Ḅe ḅẹlẹma mị finjima la-ọkụ na, nangwọ la-ọkụ na, gele la-ọkụ na, pịkị gbun la-ọkụ na ọ́ nwọ kaịnḅoḅịa ḅara.

¹⁹ Iin, ye ó ḅo oria ḅẹlẹma mị nemi—nweni ineda ḅeinma anị nemi ẹkẹ nwọḅẹ sọnị—se mịẹse Tamụnọ Ḅe sime ḅara mị, ọ́mịna ḅụ ḅein karaḅịa ḅara.

²⁰ Ori Oria kụrọ ḅụ ineda wa ḅi ẹka ḅara, anịkanịka koroma ẹka ḅara nẹngịma ḅara nwọ mịẹḅịa ḅọ ḅe;

²¹ ye boma sime Tamụnọ Ḅe pịrị, chọchị mị ḅie na, pịkị Jizọs Kraịst Ḅe ḅie ḅụ na sịkịmamgba ḅụ, ḅẹsịkị ḅẹsịkị la! Amẹn.