Ḍieḅelema Yema 3 - Kịrịkẹnị Baịbụl

Se Sadis Mị Fịrịma Oku Mị

¹ “Gịẹịn Sadis chọchị mị enjẹlḅọ ḅe sẹịnma: “Mịn anị Tamụnọ Ḅe sọnọma tẹmẹ ma na sọnọma loliama na nyanaḅọ ḅe ḅara ḅo oku mị-ẹ. Ị́ mịẹarịye mamgba à nemimẹ, ị́ ḍumomẹ nwọ ḅẹ ẹrẹ ị́ nwọ fịaḅẹ, ọkụma ị́ fịsam!

² Anịẹrẹchị sịsẹ, se ị́ ḅara simeye mị mịẹkụrọma, ma anị fị koroka simeogbo. Anịatịḅị à ḍọkịḅo ọrịmẹ na ị̀ Tamụnọ Ḅe tọrụkuḅu ḅụ ị́ nwẹngị fịrịma, ma kpaịnkẹ.

³ Mịn mị gose, ini se ị́ ḍiesaye ma na pịkị ị́ naasaye ma na, nwọse ḅiekoroma, anị ḍukoye mị-ẹ, se ị́ya sima ḅụ vinpịkị. Sịsẹ, anịka ọkụma furuḅọ ḅara à nwọse ḅo ị́ laḅịa, ị́ ḅụ nemika simeogbo.

⁴ Ọkụma, ọ́mịna ḅụ kala apụ Sadis ḅie inia ḅụchụayema mịẹfịafịamamẹ. Ómine abalala ḅụchụayema chụa ị̀rị̀ na nwẹngịḅịa, anịatịḅị ị̀rị̀ na nwẹngị mị ọ́ gbẹịnmẹ.

⁵ Mịn gbọrị ḅara mị ḅụ anị ini abalala ḅụchụaye se ọmụ mị ḅaraiḅiapụ ma chụaḅịa ọkụ-ẹ; anịsịkị ḍumo apụma ḍiri mị ḅie àrị inia ẹrẹ ma kọrọrọsin ẹkẹ. Ị̀ Ḍaḅe na oria enjẹlapụma na tọrụkuḅu ḅụ anị à ḅelema ḍukopakụmaḅịaye-ẹ na ini sime ị̀ pịrịmẹ.

⁶ “Ị́ ḅeri nyanamẹ ḅẹḅẹ anịọkụma Tẹmẹ Ḅe kọn chọchị ma pịrịarị ọkwẹịnma poki!

Se Filadẹlfia Mị Fịrịma Oku Mị

⁷ “Gịẹịn ori Filadẹlfia chọchị mị enjẹlḅọ ḅe sẹịnma: “Mịn anị ori fịafịa pịkị kọkọma ḅọ ḅe fịrịma oku mị-ẹ. Devid sambị mị ọ̀ ḅara omi-ẹ, se ò finjisa ḅẹḅẹ gbọrịḅọ sọnị ineda anị palị ẹkẹ, ọ̀ pịkị anị palịsa ḅẹḅẹ gbọrịḅọ sọnị ineda finji ẹkẹ.

⁸ Àrị ọ́ nwẹngịarị fịrịma nemimẹ; à nemimẹ na kụrọ kalaye ọ́ nwọ nyanamẹ, ómine ị̀ya ḍieayema ḍukonwẹngịsam, ọ́ pịkị ị̀ya ẹrẹ mị pikikẹ. Gbọrịḅọ sọ ineda gbẹịn ẹka ḅọkọ ọ́mịna tọrọkọ à nwọ finji koroma waraḅẹ.

⁹ Ó poki! Anị nwọ sime Oru ḅe pịrị apụma, ini iruokọn apụma, nwọse inia ḅụ ọkị na ini Juapụ-ẹ, ọkụma inikẹ. Àrị ini mịẹḅịa ini ị́ tọrọkọ ḅo se kpẹrẹkị ị́ pịrịḅịa. Inimgba ini nemiḅịa na àrị ị́ ḅẹlẹmamẹ.

¹⁰ Ị́ ị̀ya olokoma ọlọ se inema nyanaye gose, ḅo mịn tomonikiri tomoni mamgba laḅịa ḍaḍiki mị ḅụ, àrị ị́ ḍụaḅọrọmaḅịa.

¹¹ Ḅọlọka sịkị ḅụ à ḅoaḅẹ. Kụrọma ị́ nyanaye mị nwọ ọlọ, mịẹse gbọrịḅọ sọnị ị́ya ọmụḅaraiḅi amanyanachu mị nwọ pọkọ ọkị ẹka ọkụ.

¹² Ọmụḅaraiḅiḅọ ḅe àrị ò seni ị̀ Tamụnọ Ḅe Oputẹkẹwarị ḅie ogbochịn nwọ mịẹḅịa, ori ngịsị anịa ḅụ sikima ẹkẹ. Oria ọgọnọ mị àrị ị̀ Tamụnọ Ḅe ẹrẹ mị gịẹịnḅịaye-ẹ, pịkị Tamụnọ Ḅe opuama mị ẹrẹ na, anị ịwọ Jerusalẹm mị; anị Tamụnọ Ḅe ḅara soḅie koroḅoḅịaye mị, à pịkị oria ọgọnọ ị̀ya ịwọ ẹrẹ mị gịẹịnḅịa.

¹³ “Ị́ ḅeri nyanamẹ ḅẹḅẹ anịọkụma Tẹmẹ Ḅe kọn chọchị ma pịrịarị ọkwẹịn ma poki!

Se Laodisia Mị Fịrịma Oku Mị

¹⁴ “Gịẹịn ori Laodisia chọchị mị enjẹlḅọ ḅe sẹịnma: “Mịn anị ori Amẹn, kuḅie se ḅụgbana gbẹịn pịkị kọkọma onyechịẹḅọ ḅe, anị Tamụnọ Ḅe tẹmẹaye mamgba ḅụ chukusakịḅọ ḅe, anị mịn oku mị fịrịmaye-ẹ.

¹⁵ Ị́ya fịrịma à nemimẹ. À nemimẹ na ị́ oḅokukẹ, ị́ pịkị ọfịrịkẹ. À ḅiḅịa ị́ mayema ḅụ gbọrịye ḅụ sime!

¹⁶ Ị́ nwọ mẹmẹmẹ nwọ ḅẹ sịkị, na oḅoku sọnị ị́ oḅokukẹ, pịkị ọfịrị sọnị ị́ ọfịrịka sịkị, ị̀ ḅịpị ḅie àrị ị́ osiro pakụmaḅịa!

¹⁷ Ị́ nwọ ḅẹmẹ, ‘Àrị alakọnmẹ ye pịkị ị̀rị̀ na lọkọlọkọmẹ, à pịkị à ḅiye goyegoye nwọ nyanamẹ!’ Ọkụma ị́ gulugulu pịkị tịḅịfoinmamẹ nwọ ḅẹye mị ị́ nemikẹ! Ị́ igweinmẹ, ị́ papaḅụsinmẹ, ị́ tọrụmgbọlụma pịkị pụnmẹ.

¹⁸ Anịgose, ị́ alakọn ḍọkịmẹ nwọ ḅẹḅẹ, àrị ị́ tetemaḅẹ na ḅo ị̀ ḅara ini se fịnị ḅie fọị kpaịnma sa goli mị nwọ fẹ; mịẹse ị́ alakọnḅịa ọkụ. Pịkị ị̀ ḅara abalala ḅụchụaye fẹ se ị́ya ḅụgererema papaḅụsin mị kikima. Pịkị ḍiri fẹ se ị́ tọrụmgbọlụma tan, mịẹse ị́ nyọrịḅịa ọkụ.

¹⁹ À nwọ ḅẹlẹma apụma anị àrị ịganị pịkị ḅụfụka se pịrịarị apụ ma-ẹ. Anịgose ị́ya sima ḅụ vinpịkị.

²⁰ Poki! À ḅọkọ mị ḅụ chịẹ se gboloaḅẹ; ị̀ pụkọ naa se finji ḅọ omi-ẹ ḅẹḅẹ, àrị oria warị sọ se ori na yefịḅịa, ori pịkị ị̀rị̀ na yefịḅịa.

²¹ Ọmụḅaraiḅi ḅụ, à nwọ ị̀ Ḍaḅe na oria amanyana ngada mị ọgọnọ simeọkụ mị, anị gbọrị ḅara ḅụ, anị à kụrọ se ọmụḅaraiḅi apụma pịrị se ini ị̀rị̀ na ị̀ya amanyana ngada mị ọgọnọ simeḅịa ọkụ-ẹ.

²² “Ị́ ḅeri nyanamẹ ḅẹḅẹ, anịọkụma, Tẹmẹ Ḅe kọn chọchị ma pịrị ọkwẹịnma poki!”