Danịẹl 6 - Kịrịkẹnị BaịbụlDanịẹl Ḅe Chịrịḅa Ma Pokolo Ḅie Ori Omi-ẹ 1 Darịọs ḅe tọnpẹlẹmẹ na gọvịna-a-sonio-asi ọ̀ nwọse oria sẹ mị ḍikiḍiki kelemaḅịa. 2 Se ọ̀ pịkị Danịẹl na, mamapụ na nwọ sẹlẹmẹ na ini gọvịna apụma datekerema, pịkị tọrụ se amanyanaḅọ ḅe ḅụ iḅi goyegoye ḅụ wẹrị. 3 Danịẹl ḅe ḅọlọka sịkị ḅụ ọ̀ mịẹḅelemamẹ na ori iḅi fịrịnwẹngịtẹịn ísí tịḅịnịma na pịkị gọvịnapụ mamgba na nẹngịmẹ. Ori opuma fịrị mị ḅụ ẹrẹso ẹrẹchị, amanyanaḅọ ḅe koromamẹ na ori ò se bebe sẹ mị ḅe tịḅịnịḅọ mịẹḅịa. 4 Mịn ísí tịḅịnịma na gọvịnapụ ma na sakị Danịẹl ḅe ò ḍikiḍikiarị fịrịkiri mị ḅụ ọ̀ mịẹirimaye nwọ ḍọkịye-ẹ, ọkụma ini inedakẹ, anịatịḅị Danịẹl ḅe anị kuḅie se ḅụgbana gbẹịnḅọ-ẹ, ọ̀ pịkị mịẹirimaye ofori-ẹ, anịkanịka nweni se oḅori chịẹma chịẹmakẹ. 5 Ini nwọse jụmḅọ jụmḅọ ḅẹmẹ, “Wa ineda gbọrịye sọ seni ọ̀ tịḅị gbana ẹkẹ oria Tamụnọ tẹkẹ mị na gbolomaye ḅụ sikima.” 6 Mịn ini amanyanaḅọ ḅe damamun se nwọ ḅẹye-ẹ, “Amanyanaḅọ Darịọs, ye Ị́ya Amanyanaḅọ Opu mị sime gbaso! 7 Mine ị́ya sẹ ḍikiḍikiarị apụ mamgba na tịḅịnị-ẹ, gọvịna apụ na, gọvịna apụ palị apụ na, pịkị jịn fịrị tịḅịnị na ḅịpị-se-ogbo-chụasam na Ị́rị́ Amanyanaḅọ ḅe oloko chụa pịkị anị mịẹkụrọma. Oloko chụa palị se ḅẹ na ḍin soi ḅụ gbọrịḅọsọ tịḅịtu jịn oru tẹkẹma anịkanịka tomoniḅọ sọ tẹkẹma, tịḅịtu ị́ tẹkẹ sikima. Mịn oloko mị kansinḅọ goyegoye, ini nụḅọ se chịrịḅama sime pokolo ḅie gbinḅịa. 8 Anịgose ye Ị́rị́ Amanyanaḅọ ḅe mị kụrọ mị pịrị, pịkị ḅara pụnụ anị pịrị, se anị ḅo tomoni ineda kansin ẹka oloko nwọ sọḅịa, Midi sẹ mị na Pesia sẹ mị na ineda anị ḍinma ẹkẹ.” 9 Anịḅụ Amanyanaḅọ Darịọs ḅe ḅara pụnụ oloko mị pịrịmẹ. 10 Danịẹl ḅe ḅo nemimẹ na ini ḅara pụnụ mị kụrọ mị pịrịsam nwọ ḅe sịkị, ò so warị mun mẹ. Oria ọgọnọ warị ḅie jukuru tọrụ se Jerusalẹm mị da pẹlẹ ḅọkọ omi-ẹ. Anịnyọ, ọ̀ sịkịmamgba mịẹmịẹḅaraḅụ ọ̀ pẹlẹ ḅọkọ ma anga ḅụ kpẹrẹkị se Tamụnọ Ḅe tẹkẹtẹkẹmẹ tẹrẹ-a-sịkị ḅụ eneḅeneḅene. 11 Danịẹl ḅe na tarakapụma, ḍọkịḅo ọrịmẹ na Danịẹl ḅe ọ̀ Tamụnọ tẹkẹaḅẹ nwọ ḅẹ sịkị, 12 inimgba koḅiria amanyanaḅọ ḅe damamunmẹ, mun ḅẹrẹ ḍuko Danịẹl ḅe tịḅị gbanaḅịa ẹrẹchị. Ini nwọ ḅẹmẹ, “Ị́rị́ Amanyanaḅọ ḅe ị́ ḅara pụnụ kụrọ pịrịmẹ na ḍin soi ḅụ, ị́ sikima se jịn oru anịkanịka jịn tomoniḅọ tẹkẹḅọ goyegoye ini nụḅọ se chịrịḅama ḅein pokolo mị ḅie gbinḅịa.” Amanyanaḅọ ḅe pẹkẹrẹmẹ, “Iin kọkọma kụrọ oloko-ẹ, Midiapụ na Pasịapụ na olokoma ḍinmaḅịa ọkụ ofori oloko-ẹ.” 13 Anịsịkị ini nwọse amanyanaḅọ ḅe ḅẹmẹ, “Danịẹl ḅe, ini Juda ḅie sẹịnḅo apụma ḅụ gbọrịḅọ ḅe ori osi se Ị́rị́ Amanyanaḅọ ḅe pịrịkẹ, ọ̀ pịkị ị́ pịrị kụrọ mị se yechịnkẹ. Eneḅeneḅene tẹrẹ-a sịkị ọ̀ nwọse tẹkẹtẹkẹmẹ.” 14 Amanyanaḅọ ḅe mịn mị naa sịkị anị ọ̀ ḅụlọkọmamẹ ọ̀ pịkị achọ ḍọkịmẹ ọ̀ wẹrị Danịẹl ḅe ḍụaḅịa ọkụ. Ori anịa fịrịnwẹngị mun ịrụa mị tuma sịkị lamẹ. 15 Anịsịkị tomonima pịkịna amanyanaḅọ ḅe damaḅo se nwọ ḅẹmẹ, “Ị́rị́ Amanyanaḅọ ḅe nemimẹ mịna olokoma sime ḅara, anị Midi na Pesia na oloko mị, amanyanaḅọ ḅe pịrịsa kụrọ ineda ḍinma ẹkẹ.” 16 Mịn amanyanaḅọ ḅe kụrọ pịrịye-ẹ na ini Danịẹl ḅe ọkị chịrịḅama ḅein pokolo mị ḅie gbin. Ọ̀ nwọse Danịẹl ḅe ḅẹmẹ, “Ye ị́ya Tamụnọ Ḅe ị́ nyana ḅereni ḅaraḅụ fịrịnwẹngị pịrịarị ḅọ ḅe ị́ ḍụa!” 17 Gbọrị ḍụparị ini nwọ ọkị pokolo mị ḅịpị gbẹịnmẹ se amanyanaḅọ ḅe na orina ḅẹrẹtọn àrị apụma na kụrọ elekima ḍiri se ḍụparị mị ḅụ oḅolomẹ mịẹso sịkị gbọrịḅọsọ Danịẹl ḅe ḍụaẹka ḅara. 18 Anịsịkị amanyanaḅọ ḅe pịkị so oria warị mun mẹ, amanyanaḅọ odo mị ḅie. Bebe ḍin mị mgba ori ineda mọnọkẹ, yefịka na tọrụḅẹlẹ nyanaka ḅụ na. 19 Ene ḅa sịkị, amanyanaḅọ ḅe be ḅụ pokolo mị sime nyọ mun mẹ. 20 Ò mun lasịkị, kuḅie chịẹ-chịẹ-chịẹ ḅaraḅụ ori ọ̀ chịn olokumẹ, “Danịẹl, ḍumo Tamụnọ Ḅe fịrịnwẹngịḅọ! Ị́ nyana ḅereni-pịrị-Tamụnọ Ḅe, ori ineda chịrịḅama ḅara ḅie ị́ ḍụapakụmaḅo?” 21 Danịẹl ḅe ọ̀ pẹkẹrẹmẹ, “Yei Amanyanaḅọ, ḍumo gbaso! 22 Tamụnọ Ḅe oria enjẹlḅọ ḅe fịrịmamẹ ò ḅo chịrịḅama ḅịpị gbẹịnmẹ mịẹso sịkị àrị ye se ị̀ lama-ẹka-ọkụ. Ọ̀ mị mịẹmẹ anịatịḅị à ḅẹrẹ ḅarasi nyanakẹ, pịkị ma àrị ị́ mịẹirimakẹ, Amanyanaḅọ.” 23 Amanyanaḅọ ḅe ori opuma ḅieḅẹlẹmẹ, se ọ̀ kụrọ pịrịmẹ na ini Danịẹl ḅe sinpakụmaḅo pokolo mị ḅie. Mịn ini ò sinpakụmaḅoye-ẹ, gbọrịye sọ ọ̀ laka ḅaraḅụ, anịatịḅị ò kuḅie se Tamụnọ Ḅe ḅụgbanamẹ. 24 Anịsịkị amanyanaḅọ ḅe kụrọ pịrịmẹ na ini Danịẹl ḅe se iruokọn apụ mamgba kunḅo se ini se pokolo mị ḅie gbin, inia erema na, awọma na se chụa gbin. Ma ini mun pokolo mị chuku laka simeogbo chịrịḅama fuku ini tanjịmẹ se inia imgbe mamgba kọsịmamẹ. 25 Anịsịkị mị Amanyanaḅọ Darịọs ḅe ḍiri se sẹkiri mị ḅie sime sẹma na ama ama na ọkwẹịn ḅẹlẹ kịrịkịrị apụ mamgba na sẹịn maye-ẹ: “Àrị ó kerenimẹ!” 26 À kụrọ pịrịsam ị̀ya opu sẹ mị ḅie mgba, na tomoni mamgba Danịẹl Tamụnọ Ḅe ḍikiḅalafa se ori osi. “Anịatịḅị ori anị ḍumo àrị Tamụnọ Ḅe-ẹ, ọ̀ pịkị ḅẹrẹtọn gbasoḅịa. Oria amanyanakiri mị ngịsị kan ẹkẹ, oria kụrọ mị pịkị kuluma nyana ẹkẹ. 27 Ò kokomẹ pịkị ḍụamẹ; soḅie na sẹkiri mị ḅie na ọ̀ ḅụgbiripumaye na ḅụbuanmaye na nwọ mịẹmịẹmẹ. Ọ̀ Danịẹl ḅe ḍụamẹ chịrịḅama ḅaraḅie.” 28 Danịẹl ḅe mịẹye ọ̀ ḅarasọmẹ, Darịọs ḅe ama da kụra ma ḅie ọkịmun Saịrọs, Pasịaḅọ ḅe ḅo amada sịkị la. |
The Bible Society of Nigeria
Bible Society of Nigeria