Danịẹl 5 - Kịrịkẹnị Baịbụl

Bẹlshaza Ḅe Fị Fịye Alalị

¹ Amanyanaḅọ Bẹlshaza ḅe gbọrị ḍin ḅụ opu alalị koroma kini-a-mẹndẹ-oyiasi-fịnjị tọrụ paka owuapụ pịrịmẹ, se ini iru ḅugbolomamẹ.

² Ini iru ḅuarị sịkị, mị Bẹlshaza ḅe kụrọ pịrịye-ẹ na ini mun ḍawu Nebukadneza ḅe Jerusalẹm Oputẹkẹwarị mị ḅie dekiḅo goli goli kọpụ ma na pịkị seleḅa kọpụ ma na bọlị ma na ọkịḅo. Amanyanaḅọ ḅe àrị fịrịmamẹ mịẹse, ori na, oria tọrụ paka owuapụma na, oria erema na, oria ịgwa erema na, àrị ọkị se iru ḅuḅịa ọkụ.

³ Anị gbọrị kirikiri ini goli goli kọpụ ma na bọlị ma na ọkị ḅomẹ, se inimgba àrị se iru ḅumẹ

⁴ se ini goli na seleḅa na, alapẹlẹka na, ikulele na, chịn na, ḍụparị na se tẹmẹ oru ma tokonimẹ.

⁵ Ḅụnemika ḅụ tomoniḅọ ḅara amanyanaḅọ ḅe warị agbagba ḅụ sakị yegịẹịn-aḅẹ, anị tọnjie ma opuma ḅịa mun sarama nyọ mị ḅụ. Amanyanaḅọ ḅe ḅara mị ọrịmẹ anị yegịẹịn-arị sịkị ḅụ.

⁶ Ọ̀ tọrụ ḅie ḅịamẹ, ḅalafa opuma ọ̀ ḅụ sọmẹ, ọ̀ ḅụọịkpụkụ ma sakị geregeremẹ.

⁷ Ori oloku gbọrịḅọ pịrịmẹ na ò mun tọrụtoluapụ na arịapụ na, lolia ḍawọ nemi apụ na ọkịḅo. Ini sọḅo sịkị, amanyanaḅọ ḅe nwọse ini ḅẹmẹ, “Ọ́mịna ḅụ ineda mị gịẹịnye mị go, pịkị anị fieye mị ḍuko ị̀ pịrịḅọ goyegoye ini pulo pulo lọkọ-ḅịtẹ koro amanyanaḅọ ḅụchụaye se iniḅọ ḅirimaḅịa, se osi nyana goli goli pụkọchụaye se iniḅọ pụkọ chụa kelemaḅịa, iniḅọ ḅo pịkị amanyanakiri mị ḅie tẹrẹ karama ḅẹrẹtọnḅọ sọḅịa.”

⁸ Amanyanaḅọ tetemapụ ma pakaḅomẹ, ọkụma iniaḅụ gbọrịḅọ sọ ofori-ẹ ineda anị go pịkị anị fieye ḍuko amanyanaḅọ ḅe pịrịḅọ.

⁹ Kuḅie si ḅụ Amanyanaḅọ Bẹlshaza ḅe ọ̀ tọrụ opuma ḍinmamẹ, se oria tọrụ paka owuapụma ḅarị ini mịẹḅịa ọkụ nemikẹ.

¹⁰ Amanyanaḅọ ta nyengima, amanyanaḅọ ḅe na, oria tọrụ paka owuapụma na nyọ fiemarị ḅara mị naa sịkị, árị ini alalị fịarị warị mị ḅie sọ mun mẹ. Á nwọ ḅẹmẹ, “Ye Amanyanaḅọ ḍumo gbaso! Sisi ḅerenima ị́ kuḅie si nyana ị́ ḅụ pịrị, se ị́ ḅụ sima.

¹¹ Ị́ya amanyanakiri mị ḅie gbọrịḅọ omi-ẹ anị sikima se tomoni na kpekika oru ma kịrị kụrọ ḅie ḅụḅeinḅọ. Ị́ ḍa ḅe amanyana sịkị, ḅẹḅọ ḅe anị oru ma nyana nemi kịkẹ nemi na iḅikoroma na, yekaịnḅo na, nemi na ḍiepakụmaḅọ-ẹ. Anịgose ị́ ḍa amanyana Nebukadneza ḅe ò se ịkịankoro apụ na, tọrụtoluapụ na, ḅiri apụ na, lolia ḍawọ nemi apụ mamgba na ḅụ tịḅịnịḅọ nwọ mịẹmẹ.

¹² Ḍukoḅịa ọkụ ofori ịnyọ ọ̀ nwọ nyanamẹ, ọ̀ pịkịna yenemimẹ, se nemi ḅụ ḍawọ pufinji finjimẹ, gbun ọkwẹịn fieye ḍuko, pịkị tomoni chukunemikaye ḍuko finji finjimẹ, anịgose Danịẹl ḅe fịrịmaḅo, anị Nebukadneza ḅe Bẹltẹshaza nwọse chịnḅọ ḅe, se ma aye mamgba fiearịye ọ̀ nwọ ḍuko ị́ pịrịḅịa.”

Danịẹl Ḅe Gịẹịnye Mị Ḍukofinjimẹ

¹³ Anị gbọrị kirikiri ini Danịẹl ḅe chịn amanyanaḅọ ḅe tọrọkọ ḅomẹ, se amanyanaḅọ ḅe nwọse ọ̀ ḅẹmẹ, “Danịẹl ḅe ị́rị́, anị ị̀ ḍa amanyanaḅọ ḅe Juda ḅie sẹịnḅo Juapụma ḅụḅọ ḅe?

¹⁴ À naasam na sikima se tomoni na kpekika oru ma kịrị kụrọ ị́ ḅie omi-ẹ, ị́ pịkị iḅiọkụma yekaịnḅo na nemi na nyanamẹ.

¹⁵ Ye nemi apụma na, tọrụtolu apụma na ini nwọ ọkị ḅomẹ, ḅo mị gịẹịnye mị go, se anị fieye mị ḍuko ị̀ pịrịḅịa ọkụ, ọkụma ini ineda anị fieye ọrị ḅokẹ.

¹⁶ Mịọkụ à naasam na ị́ ineda ḅọịye fiearịye ḍọkịpakụmaḅoḅịa pịkị tomoni chukunemikaye ḍuko finji ḅịa. Ị́ nemikase ineda mị gịẹịnye mị go, se anị fieye ḍuko ị̀ pịrịmẹ ḅẹḅẹ, pulo pulo opu koro amanyanaḅọ ḅụchụaye ini nwọse ị́ ḅirimaḅịa pịkị osi nyana goli goli pụkọchụaye se ị́ pụkọ chụa kelemaḅịa se ị́ se tẹrẹ karama kiri ḅụ koromaḅịa amanyanakiri mị ḅie.”

¹⁷ Danịẹl ḅe nwọ pẹkẹrẹmẹ, “Ị́ya ḍiepịrịayema àrị sime ị́ pịrị anịkanịka àrị se jụmḅọ pịrị. À gịẹịnye mị go Ị́rị́ Amanyanaḅọ ḅe pịrịḅịa pịkị anị fiearịye ḍuko ị́ pịrịḅịa.

¹⁸ “Geletẹịn Tamụnọ Ḅe ị́ ḍa Nebukadneza ḅe se opu amanyanaḅọ mịẹmẹ se osi na amanyana opu na nwọse ọ̀ pịrịmẹ.

¹⁹ Ori opu sọ so ọkụma, sẹ mamgba ḅie simeapụ na, ama ama ḅie na, ọkwẹịn ḅẹlẹ kịrịkịrị apụma na, ò ḍikiḅalafamẹ, pịkị ḅụgeregeremẹ. Ò nemikase nweniḅọ ḅaa ḍọkịmẹ ḅẹḅẹ, ọ̀ ḅaamẹ, ò nemikase ḅimẹ na tomoniḅọ ḍumo-ẹ nwọ ḅẹḅẹ, ọ̀ pịkị mịẹḅịa. Ọ̀ ḅụḅẹlẹḅọ mị ori osi se pịrị anịkanịka ḍikisimaḅịaye-ẹ.

²⁰ Ọkụma ò ḅo opuayemịẹ, ininachịn, pịkị akụ kuḅie nyana ẹrẹchị, ini oria amanyanaḅọ emine mị ọgọnọ ò sin koromamẹ se oria osi kiri mị famamẹ.

²¹ Tomoni ogbo ḅie ini ò desinmẹ se ò ḅo nama kuḅie chụamẹ. Ò piriḅie yepụra asụnma na angamẹ, nambulo osuein fị ọkụ ọ̀ nwọse osuein fịmẹ, se papa eleogbo ḅụ mọnọmẹ, ijiriji oria ọgọnọ saramẹ oju kikimaye oforika ḅụ. Kuluma ḅụ ò ḅo ḅerenimẹ na Geletẹịn Tamụnọ Ḅe anị tomonikiri mị mgba nyanaye-ẹ, pịkị ineda àrị se ọ̀ ḅụḅẹlẹḅọ pịrịḅịaye-ẹ.

²² “Ọkụma ị́rị́, oria tọkụ ḅe, ma ị́ ị́ḅụ iderimakẹ ị́ ma yemamgba nemimẹ nwọ ḅẹ sọ.

²³ Ị́ Soḅie Nyanaḅọ Ḅe na tụḅụrụmẹ, se oria Oputẹkẹwarị mị ḅie ini deki so-a bọlị ma na kọpụ ma na ọkịḅomẹ. Ị́rị́ na ị́ya ḅịpịḅẹrẹla apụma na, ị́ya erema na, pịkị ị́ya ịgwa erema na, ma ayema se iru ḅumẹ, se ini goli na, seleḅa na, alapẹlẹka na, ikulele na, chịn na, ḍụparị na, nwọse tẹmẹ-a oru ma tokonimẹ, anị ineda nyọ ọrịka anịkanịka yenaaka, pịkị yenemika oru ma. Ọkụma ị́ osi se ị́ ḍumoḅịa na, ị́ fịḅịa na nemi pịkị ị́ya mịẹmịẹaye mamgba ḍikiḍiki Tamụnọ Ḅe pịrịkẹ.

²⁴ Anịẹrẹchị Tamụnọ Ḅe ḅara mị se sẹịnmẹ, ḅo ma ọkwẹịn ma gịẹịn.

²⁵ “Mịn anị gịẹịnye mị-ẹ: ‘Mẹnẹ, Mẹnẹ, Tẹkẹl, na Parsin.’

²⁶ Mị anị fiearịye-ẹ: Mẹnẹ, Tamụnọ Ḅe, ị́ya amanyanakiri mị laḅịa ḍin ma, ọ̀ kịẹnso se ori àrị se ḅo kuluma lasam;

²⁷ Tẹkẹl, ini yetọnye ọgọnọ ị́ tọn ḍikisosam, se ḍọkịḅo ọrịmẹ na ị́ opuma sarasaramẹ;

²⁸ Parẹs, ị́ya amanyanakiri mị ini anị ḍiama Midi sẹ mị na Pesia sẹ mị na pịrịsam.”

²⁹ Anị gbọrị kirikiri mị Bẹlshaza ḅe kụrọ se oria fịrịnwẹngịapụma pịrịye-ẹ na ini amanyanaḅọ ḅụchụaye se ò ḅirima, se osi pịrị goli goli pụkọchụaye se ọ̀ kọngọ chụa kelema. Se ori ò se tẹrẹ karama kụrọ nyanaḅọ mịẹmẹ amanyanakiri mị ḅie.

³⁰ Anị gbọrị ḍin ḅie ḅụ ini Bẹlshaza Babilọn amanyanaḅọ ḅe ḅaamẹ;

³¹ se Darịọs, Midi ḅọ ḅe anịsịkị kụra tesi ma kụra fịnjị laḅọ ḅe, amanyana kụrọ mị ọkịmẹ.