Danịẹl 2 - Kịrịkẹnị Baịbụl

Nebukadneza Ḅe Ọ̀ Ḍawọ Kọn Mẹ

¹ Nebukadneza ḅe ori amanyanaḅọ sọ maịn karama kụra mị ḅie ọ̀ ḍawọ mẹ. Ḍawọ mị ọ̀ ḅụfụkamaso ọkụma, ori ineda mọnọkẹ,

² anị ori oria tọrụtolu apụma na ḅịrị apụma na, oru-koro-apụ ma na ḅụbuanmaye mịẹmịẹapụma na chịnye-ẹ iniḅo ọ̀ kọn ḍawọ mị pufinji ọ̀ pịrị. Iniḅo amanyanaḅọ ḅe tọrọkọ chịẹ sịkị,

³ ọ̀ nwọse ini ḅẹmẹ, “À kọn gbọrị ḍawọ opuma ị̀ ḅụḅalaḅalamamẹ. À ḅimẹ anị fieye à nwọ nemi.”

⁴ Ini amanyanaḅọ ḅe pẹkẹrẹmẹ Aram ọkwẹịn ḅẹlẹ ḅụ, “Ye Ị́ya Amanyanaḅọ opu mị simegbaso! Ị́ya ḍawọ mị ḍuko wa pịrị, se wa anị pufinji ị́ pịrịḅịa.”

⁵ Amanyanaḅọ ḅe ini ḅẹmẹ, “Àrị ị̀ kuḅie ḅụ tọnpẹlẹsam na ómine ḍawọ mị ḍuko ị̀ pịrịḅịa pịkị anị fịaye ḍuko ị̀ pịrịḅịa. Ó nemikase ineda ẹkẹ nwọ ḅẹḅẹ, à mịẹḅịa ọ́mịna ḅara ịkpụkụ na ọ́ ḅụọ ịkpụkụ na ini nwọ woli sinḅịa pịkị ọ́mịna warịma ini nwọ kan tunduruma koroma saraḅịa.

⁶ Ọkụma ó nemikase ineda ḍawọ mị ḍuko pịkị anị fieye ḍukomẹ nwọ ḅẹḅẹ, à ḍiepịrịaye na opu osi na se ọ́ pịrịḅịa. Mịọkụ ọ́ ḍawọ mị ḍuko pịkị anị fieye na nwọ ḍuko.”

⁷ Ini pịkị amanyanaḅọ ḅe pẹkẹrẹmẹ, “Nemikase Ị́ya Amanyanaḅọ opu ḅụ ị́ pa ḍawọ mị ḍuko wa pịrị ọkụma, wa anị fieye pufinjiḅịa.”

⁸ Anịḅụ amanyanaḅọ ḅe ịganị se olokumẹ, “À koroma ḅara ḅụ! Ọ́ papa sịkịfamaḅẹ, anịatịḅị ómine ọrịmẹ àrị ị̀ kuḅie ḅụ tọnpẹlẹsam na

⁹ gbọrị fomuḅara à nwọse óminemgba pịrịḅịa, ó nemikase ḍawọ mị ḍuko ị̀ pịrịkẹ ḅẹḅẹ. Ó gboloma ḅịpị se ogbo chụa se iruokọn ị̀ pịrịaḅẹ, anịatịḅị ó koromamẹ na gbọrị sịkị laḅịa sịkị, sịkị mị ḅo ḅọrọḅịa. Ọ́ ḍawọ mị ḍuko ị̀ pịrị, anịsịkị à nemiḅịa na ómine ineda anị fieye ḍukoḅịa.”

¹⁰ Ye tetema tetema apụma nwọ pẹkẹrẹmẹ, “Kpọkpọ gbọrịḅọ sọ ofori-ẹ mị tomonikiri mị ḅie ineda Ị́ya Amanyanaḅọ opu ḅụ ị́ nemi ḅiarịye mị ḍukoḅịa ḅọ. Amanyanaḅọ, anịkanịka geletẹịn kụrọnịḅọ sọ ofori-ẹ nwọ simeḅara se oria tọrụtoluapụ na ḅịrị apụ na oru-koro-apụ na ḅụbuanmaye mịẹmịẹ apụ na ḅi ḅịaḅọ.

¹¹ Ị́ya Amanyanaḅọ opu ḅụ ị́ ḅiarịye mị kụrọso ọkụma, ineda anị mịẹ ị́ pịrịḅịaḅọ ofori-ẹ, oru ma sikima, àrị pịkị tomoni ogboku angakẹ.”

¹² Mịn mị ḅụ, amanyanaḅọ ḅe ori opuma ịganị so ọkụma, ọ̀ kụrọpịrịmẹ, ini Babilọn ḅie sime amanyanaḅọ tetema tetema apụ mamgba ḅaasin.

¹³ Anị ḅaraḅụ ini kụrọ pịrịmẹ na ini inimgba ḅaa, Danịẹl ḅe na oria ikiapụ ma na se chụa.

Tamụnọ Ḅe Ḍawọ Mị Fieye Se Danịẹl Ḅe Ḍiemẹ

¹⁴ Anị Danịẹl ḅe amanyanaḅọ koruapụma ḅụ tịḅịnịḅọ, Arịọk ḅe damamunye-ẹ anị nweniḅaa kụrọ mị nyanaḅọ ḅe. Kpaịn ọkwẹịn ḅẹlẹ ḅụ,

¹⁵ ori Arịọk ḅe gbelamẹ, cheye gose amanyanaḅọ ḅe nwọ sime ọfịrị ḅara se kụrọ pịrị. Anị Arịọk ḅe pakaye mị ḍuko Danịẹl ḅe pịrịye-ẹ.

¹⁶ Danịẹl ḅe anịkirikiri mun amanyanaḅọ ḅe ḅara kụrọ ḅimẹ na ini kele sịkị kalaye se ọ̀ pịrị, mịẹse ori ineda amanyanaḅọ ḅe kọn ḍawọ mị fiearịye mị ḍukoḅịa ḅara.

¹⁷ Anịeso Danịẹl ḅe pịkịma so warị mun mẹ se pakaye ma ḍuko oria ikiapụ Hananaya ḅe na Mishaẹl ḅe na Azaraịya ḅe na pịrịmẹ.

¹⁸ Ori ini ḅẹmẹ ini soḅie sime Tamụnọ Ḅe tẹkẹ se ọ̀ ḅara ḍikiḅụgerere ḅi, pịkị ọ̀ tẹkẹ se ọ̀ mị tomoni-chukunemikaye mị mịẹḅelema ini pịrị mịẹso sịkị ini ini se ísí amanyanaḅọ tetema tetema apụma na chụa ḅaa ẹka ḅara Babilọn mị ḅie.

¹⁹ Anịsịkị anị gbọrị ḍin ḅụ mị tomoni-chukunemikaye mị ini nwọ mịẹḅelema Danịẹl ḅe pịrịmẹ tẹmẹ ḅie ḅụ, se ò soḅie Tamụnọ Ḅe bomamẹ:

²⁰ “Tamụnọ Ḅe ò nemi nyanamẹ, ọ̀ pịkị kụrọmẹ! Ómine ò boma gbaso.

²¹ Ọ̀ ḅẹrẹtọn se sịkị mị na pakarị yema pịrịmẹ; ori amanyanapụ tọnmẹ ọ̀ pịkị amanyanapụ sin koromamẹ; nemi na yekaịnḅo na pịrịarịḅọ ḅe ori-ẹ. 12

²² Ò gbun aye na ḅọị aye na mịẹḅelema ḅelemamẹ; kanakana ḅie ḅọị ayema ori àrị nemimẹ, ori na mịnaḅụ na enekaka ò kelemamẹ.

²³ Àrị ị́ tokonimẹ, pịkị osi se ị́ pịrịmẹ, ị̀ya opu-aḍapụma Tamụnọ. Ị́ nemi na ịnyọ na se ị̀ pịrịsam; ị́ ị̀ya tẹkẹ mị naasam pịkị wa ḍuko amanyanaḅọ ḅe pịrịḅịaye se wa ḍiesam.”

Danịẹl Ḅe Ò Ḍawọ Mị Ḍuko Pịkị Anị Fieye Pufinji Amanyanaḅọ Ḅe Pịrịmẹ

²⁴ Anịḅụ Danịẹl ḅe Arịọk, anị amanyanaḅọ ḅe tọn na ò tetema tetema apụma ḅaa-ẹ nwọḅẹ kụrọ mị se pịrịḅọ ḅe damamunye-ẹ. Ọ̀ nwọse ọ̀ ḅẹmẹ, “Ma ini ḅaama. Ị̀ se amanyanaḅọ ḅe damamun, se àrị ọ̀ kọn ḍawọ mị fiearị ye ḍuko ọ̀ pịrịḅịa.”

²⁵ Anị kirikiri Arịọk ḅe ọ̀ Danịẹl ḅe ọkị amanyanaḅọ Nebukadneza ḅe tọrọkọ mun mẹ se ḍuko amanyanaḅọ ḅe pịrịmẹ, “Wa kunḅo Juapụma ḅie gbọrịḅọ à nwọ ḍọkịḅosam ineda Ị́ya Amanyanaḅọ opu ḅụ ị́ kọn ḍawọ mị fiearịye ḍukoḅịa ḅọ.”

²⁶ Amanyanaḅọ ḅe Danịẹl (anị ini pịkị Bẹltẹshaza se chịnḅọ ḅe) ḅẹye-ẹ, “Ị́ ineda à kọn ḍawọ mị ḍuko pịkị anị fieye ḍuko ị̀ pịrịḅe?”

²⁷ Danịẹl ḅe pẹkẹrẹmẹ, “Amanyanaḅọ, gbọrị ḅịrịḅọ sọnị, anịkanịka tọrụtolu ḅọ sọ, anịkanịka lolia ma ḍikise àrị fiearịye nemiḅọ sọ ineda anị ḍuko ị́ pịrịḅịaḅọ ofori-ẹ.

²⁸ Ọkụma gbọrị Tamụnọ omi-ẹ soḅie, gbun aye pufinji finjiḅọ, Amanyanaḅọ, ò ḍuko ị́ pịrịsam tọrọkọju pakaḅịaye. Mịọkụ à ḍawọ mị ḍuko ị́ pịrịḅịa, ị́ mọnọ àrị sịkị, ị́ tẹmẹḅụ ọrị ḅọịye mị.

²⁹ “Amanyanaḅọ, ị́ mọnọ àrị sịkị, ị́ tọrọkọju pakaḅịaye gboloma ḍawọ ị́ nwọ kọnmẹ, se Tamụnọ Ḅe tomoni-chukunemikaye ma mịẹḅelema ḅelema ḅọ ḅe, tọrọkọju pakaḅịayema nwọse ị́ ḍiemẹ.

³⁰ Mịọkụ, mịn gbunye mị ori anị mịẹḅelema ị̀ pịrịmẹ; ị̀rị̀ nwenimgba ḅụ yenemitẹịn ẹrẹchịkẹ, ọkụma mịẹso sịkị Ị́rị́ Amanyanaḅọ ḅe ị́ya ḍawọ mị fiearịye mị nemi se ḅo ị́ la àrị koromama nwọ kaịnḅoḅịa ọkụ.

³¹ “Amanyanaḅọ, tẹmẹ ḅụ gbọrị opu gele agbambuḅọ ị́ nwọ ọrịmẹ, ị́ tọrọkọ chịẹmẹ. Anị ḅịaḅịa, pịkị nwananị-nwananịmẹ, pịkị ḅalafamamẹ tọrụ se anị ḍiki ọkụma.

³² Iḅitẹịn goli ini nwọse anịa tịḅị tẹmẹmẹ; seleḅa ini nwọse anịa ekpe na ḅarama na tẹmẹmẹ; anịa konju na igo mị na alapẹlẹka ikulele-ẹ,

³³ anịa ḅụọma ikulele-ẹ, anịsịkị ḅụọ ịkpalịkpama danyọ ikulele-ẹ, danyọ aḅaịn-ẹ.

³⁴ Ị́ anị ḍikiarịogbo gbọrị opu ḍụparị, ḅarasọ lakaḅụ sokoro se ini ikulele na aḅaịn na se mịẹ agbambuḅọ ḅe ḅụọma kọsịmamẹ.

³⁵ Anị gbọrị kirikiri, ikulele mị na, aḅaịn mị na, alapẹlẹka ikulele mị na, seleḅa mị na, goli mị na, kọsịma sara se fọn sọmẹ, anịḅo ikiringa sịkị ini wasama ozu kiri sime ọkụ simemẹ. Fọrụ mị anịmgba dekisinmẹ, anịaḅụ elekima sọ kọnkẹ. Ọkụma ḍụparị mị sẹnị ḅo tụndụ nwọ sọ se kiri mị mgba gbẹịnmẹ.

³⁶ “Mịn anị ḍawọ mị-ẹ. Mịọkụ à ḍuko Ị́rị́ Amanyanaḅọ ḅe pịrịḅịa, ḍawọ mị fiearịye.

³⁷ Amanyanaḅọ, ị́rị́ anị geletẹịnḅọ ḅe-ẹ amanyanapụ mamgba ḅụ. Soḅie Tamụnọ Ḅe, ori ị́ se sẹtịḅịnịḅọ mịẹsam, pịkị ịnyọ na, kụrọ na, osi na se ị́ pịrịsam.

³⁸ Ori ị́ se ḅẹrẹtọn sẹkiri tomoni anga nyọ mamgba na, nama mamgba na, fenima na, pịrịḅọ mịẹsam. Ị́rị́ anị goli tịḅị mịẹ.

³⁹ Ị́ ḅụọ ḅọrọso jịn sẹ pakaḅoḅịa, ị́ya sẹ mị ḍụḅa ọkụ ḍụḅa ẹkẹ, pịkị anị ḅọrọso tẹrẹ karamaḅịa sẹ mị, anị alapẹlẹka ikulele sẹ mịẹ, anị ḅo ḅẹrẹtọn tomonikiri mị mgba pịrịḅịa.

⁴⁰ Anịsịkị, inein karama sẹ ḅoḅịa, ikulele kụrọ ọkụ kụrọḅịa sẹ, ineda yemamgba kankọsịmaḅịa sẹ. Se ikulele yegoyegoye kankọsịma ọkụ anị anị sẹ sẹ mamgba kankọsịmaḅịa ọkụ-ẹ.

⁴¹ Ị́ pịkị ọrịmẹ na ḅụọma na ḅụọtụmgbalị ma na, danyọ ikulele-ẹ pịkị danyọ aḅaịn-ẹ. Mịn mị fieaḅẹ na sẹ mị anị puaḅịa. Ikulele kụrọ anịa ḅụ simeḅịa anịatịḅị ikulele na aḅaịn na gwamẹ.

⁴² Ḅụọtụmgbalị ma, gbọrị pẹkẹrẹ nwọ ikulele, gbọrị pẹkẹrẹ nwọ aḅaịn sịkị, anị fieaḅẹ na sẹ mị ḅụ gbọrị pẹkẹrẹ kụrọḅịa, gbọrị pẹkẹrẹ lọkọḅịa.

⁴³ Ị́ pịkị ọrịmẹ na ikulele mị na aḅaịn mị na gwamẹ. Mịn mị fiemẹ na, anị sẹ ḅie ḅẹrẹtọn apụma ini ḍọkịḅo ọrịḅịa na ini ḅụkụrọma furoma ọkịḅo gbolomaḅịa ere-sime-gboloma ḅụ, ọkụma ini ineda ẹkẹ, ikulele na aḅaịn na ineda gwama ẹka ḅaraḅụ.

⁴⁴ Anịapụ ma sẹma da àrị sịkị, soḅie sime Tamụnọ Ḅe ò kuluma nyanaka sẹ nwọ mịẹ pakụmaḅoḅịa. Ini ineda anị kan ẹkẹ, ọkụma anị ísí-a sẹ mamgba kansinḅịa se ḅo sime gbasoḅịa.

⁴⁵ Ị́ ọrịmẹ gbọrị ḍụparị, ḅarasọ laka ḅụ baịn koroḅo ini ikulele na, alapẹlẹka ikulele na, seleḅa na, goli na nwọse tẹmẹ agbambuḅọ mị kọsịma ọkụ. Opu Tamụnọ Ḅe, tọrọkọju pakaḅịaye nwọ ḍuko Ị́rị́ Amanyanaḅọ ḅe pịrịaḅẹ. À gaịnma ị́ kọn ḍawọ mị ḍukosam, pịkị anị jokoma fiearịye ḍuko ị́ pịrịsam.”

Amanyanaḅọ Ḅe Ò Ye Se Danịẹl Ḅe Gbẹịnmẹ

⁴⁶ Anịsịkị Amanyanaḅọ Nebukadneza ḅe ọ̀ tịḅịtu mun kiri la se kụrọ pịrịmẹ na ini agbamịẹ, pịkị ḍiepịrịaye pakụmaḅo se Danịẹl ḅe pịrị.

⁴⁷ Amanyanaḅọ ḅe nwọ ḅẹmẹ, “Ị́ Tamụnọ Ḅe anị oru mamgba ḅụ geletẹịn Tamụnọ Ḅe-ẹ, amanyanapụ mamgba ḅụ Tịḅịnịḅọ-ẹ, pịkịna gbun aye pufinji finjiḅọ-ẹ. Àrị ọkọse anị nemimẹ anịatịḅị ị́ ineda mị gbunye mị nwọ ḍuko ḅelemasam.”

⁴⁸ Anịsịkị ò ḅo Danịẹl ḅe deki iwomamẹ oria fịrịkiriḅụ, se tọntọn-a ḍiepịrịaye se Danịẹl ḅe pịrịmẹ se ó se Babilọn sẹ ḅie gbọrị sẹ ḅụ ḅẹrẹtọnḅọ mịẹmẹ pịkị ó se amanyanaḅọ tetemapụ ma ḅụ tịḅịnịḅọ mịẹmẹ.

⁴⁹ Danịẹl ḅe ḅiḅaraḅụ, amanyanaḅọ ḅe ò Shedrak ḅe na, Mishak ḅe na, Abẹdnego ḅe na ọkị se Babilọn sẹ ḅie gbọrị pẹkẹrẹ ḅụ ḅẹrẹtọn apụ mịẹmẹ; Danịẹl ḅe anịẹḅẹsọ ọ̀ pa amanyanaḅọ odo mị ḅie anga simemẹ.