Danịẹl 12 - Kịrịkẹnị BaịbụlKuluma Sịkị Mị 1 Lọkọ ḅịtẹ ḅiriaye ma ḅiri enjẹlḅọ ḅe nwọ ḅẹmẹ, “Kuluma sịkị ḅụ opu enjẹlḅọ Maịkịẹl, ị́ya tomonima ḍikiḍikiarịḅọ ḅe, ọ̀ pakaḅoḅịa. Anịsịkị ḅụfụka simeḅịa, sitẹịn ḅụfụka, sẹsẹ ma paka sịkị ngịsị ma pakaka ḅụfụka. Anịsịkị mị ḅo laḅịa sịkị, ị́ya sẹ mị ḅie apụ mamgba ẹrẹ Tamụnọ ḍiri ḅie gịẹịn apụ ini ḍụaḅọrọma nyanaḅịa. 2 Fị ḅọrọsa apụma ḅụ tọn apụ pịkị fị ḅụ sịsẹḅịa; dapụ ḅene-ḅene ḍumo nwọ nyanaḅịa, pịkị dapụ ḅene-ḅene ḅụgerere tọrụsiọrị nwọ nyanaḅịa. 3 Yenemi tịḅịnịma, ini so mị ḅịa ọkụ ḅịa ḅịa. Se karakaraye se tomoni ḍie apụma ini lolia ma ḅịa ọkụ ḅịa gbasoḅịa.” 4 Ọ̀ nwọse ị̀ ḅẹmẹ, “Mịọkụ, Danịẹl, ḍiri mị gbẹịn se ye oḅoloye se ḍiri mị oḅolo pịanị ọkịmun sẹkiri mị ḅe kuluma mị la. Tọn apụ nwẹngị na koronaḅịa anịsịkị nemi mị ḅakaḅịa.” Danịẹl Ḅe Mama Enjẹlapụ Ọrị Mẹ Mengi Aka Ḅụ 5 Anịsịkị, gbọrị tọrụ aka ḅụ chịẹ mama owuapụ à nwọ ọrịmẹ, gbọrịḅọ gbọrị aka gbọrị aka ḅụ. 6 Inia ḅie gbọrịḅọ nwọse tọrụ mị ọgọnọju chịẹ enjẹlḅọ ḅe gbelamẹ, “Anị ọkịmun nde sịkị lase, ma ḅalafamaye ma ḅo kulumaḅe?” 7 Enjẹlḅọ ḅe oria mama ḅarama deki so da se, Ḍumogbaso Tamụnọ Ḅe ẹrẹ ḅụ kuḅie laḅaraḅụ yeḅerenimẹ. Àrị ọ̀ naamẹ, ọ̀ nwọ ḅẹmẹ na, “Anị tẹrẹ-a kụra na pẹkẹrẹ laḅịa. Ḅụọchụa Tamụnọ-a tomonima pịrịarịye ma kulumaḅịa sịkị maye mamgba pakaḅọrọsam.” 8 Ò ḍuko ye mị à naamẹ, ọkụma, àrị ineda anị kaịnḅokẹ. Anị à ḅo gbelaye-ẹ, “Ọkụma, ị̀ nyanaḅọ, nde arịmgba ḅo kulumaḅịa ọkụ?” 9 Ọ̀ nwọ pẹkẹrẹmẹ, “Mịọkụ ị́ soḅịa, Danịẹl, anịatịḅị ma ọkwẹịn ma ini àrị ḅọị koromaḅịa ọkịmun kuluma mị ḅoḅịa sịkị la. 10 Tọn apụ ini nwọ mịẹfịafịamaḅịa, sitịḅịnyanapụma ini kaịnḅo ẹkẹ, ọkụma ini pa sitịḅị nyanama munḅịa; yenemi apụma kẹngẹ anị kaịnḅoḅịaye-ẹ. 11 “Ini ḅarị eneḅeneḅene agbama mịẹka sịkị, anị anị Ḅalafama Siye mị sịkị mị-ẹ, ḍin-a tẹrẹ ẹndẹ iniasi oyi fịnjị ḅọrọḅịa. 12 Ḅieḅẹlẹ sime kụrọ ḅereni nyana ḅụ sime mun ḍin-a tẹrẹ ẹndẹ sonio asi fịnjị na sọnọ-a ḍin ḅọrọ apụma pịrịmẹ! 13 “Se ị́rị́, Danịẹl ḅe, kụrọ ḅereni nyana ḅụ sime mun kuluma mị la. Anịsịkị ị́ fịḅịa se ị́ pịkị sịsẹ ị́ya gbẹịnye nwọ ọkịḅịa kuluma mị lasịkị.” |
The Bible Society of Nigeria
Bible Society of Nigeria