Danịẹl 11 - Kịrịkẹnị Baịbụl

¹ Ori anị sime ḅarachụa ị̀ pịrị, pịkị ị̀ ḍụarịḅọ-ẹ.

² Mịọkụ à mun ḍuko ị́ pịrị-ẹmun-arịye mị karakaraye-ẹ.” Enjẹlḅọ ḅe nwọ ḅẹmẹ, “Jịn tẹrẹ-a amanyanapụ ḅẹrẹtọn Pesia pịrịḅịa, inein karama ḅọ ḅe ngọ kọntẹịn ísíapụ mamgba nẹngịḅịa. Oria kụrọ na pẹrẹ na mị ẹrẹso laḅara ḅụ ò Gris amanyanakiri mị na tụḅụrụḅịa.

Ijipt Na Siria Na Amanyanakiri Ma

³ “Anịsịkị gbọrị ẹrẹso amanyanaḅọ pakaḅoḅịa. Ọ̀ ḅẹrẹtọn opuma finjima sẹ pịrịḅịa, pịkị ò ḅietọnye-tọnye ọ̀ nwọ mịẹḅịa.

⁴ Ọkụma oria kụrọ mị ḅo opuma ẹrẹsoḅịa sịkị, oria sẹ mị kanḅịa se ini anị se inein-a pẹkẹrẹ puḅịa. Ò furoḅie pakaḅoka amanyanapụ anị oria kiri ọkị ama mị daḅịaye-ẹ, ọkụma ọ̀ nyana kụrọ na gbasị kụrọ ini nyana ẹkẹ.

⁵ “Ijipt amanyanaḅọ ḅe ọ̀ kụrọḅịa. Anị-sime-ọkụ-sime-ọkụ, oria owuni tịḅịnịma ḅie gbọrịḅọ pa kụrọtẹịn ọ̀ nẹngịḅịa, se ḍụḅatẹịn amanyanakiri daḅịa.

⁶ Tọn-a kụra ḅọrọ sịkị Ijipt amanyanaḅọ ḅe ò Siria amanyanaḅọ ḅe na ḅịpị ogbosọ nyanaḅịa se oria eremeni tọkụ se ọ̀ pịrị se ori á simeḅịa. Ọkụma inia ḅịpị ogbosọ mị anị ḍin la-ẹkẹ, pịkị árị na dewu ḅe na, árịa tọkụ na, á ḍuko mun fịrịnwẹngịapụma na, inimgba ini ini ḅaaḅịa.

⁷ Ḅọlọka sịkị ḅụ árịa mịnaḅọ gbọrịḅọ amanyanaḅọ sọḅịa. Ori owu se Siria amanyanaḅọ ḅe owunima pakaḅịa, inia owuni kụrọ warị ḅie sọ mun se ini inumaḅịa.

⁸ Ori inia oru ma na, ini se tọnḅụ koroma àrị pịrị goli ma na seleḅa ma na tanso Ijipt munḅịa. Tọn-a kụra dein ḅụ ḅọrọ sịkị

⁹ Siria amanyanaḅọ ḅe ori Ijipt gbẹịnmachịẹḅịa, ọkụma ini ọ̀ dapịkịḅịa kụrọḅaraḅụ.

¹⁰ “Siria amanyanaḅọ ḅe awọma ini ḅụkarakarama owu pịrịḅịa, ini pịkị ḅakama owuni nyanaḅịa. Inia ḅie gbọrịḅọ opu mengi nyọ ọfịn ọkụ nwọse tarakapụma owuni-kụrọ-warị-ḅie sọ ini ọfịnsinḅịa.

¹¹ Ijipt amanyanaḅọ ḅe ye ḅụosọḅụ owu se Siria amanyanaḅọ ḅe pakaḅịa se oria opu owuni kpo mị kun ọkịḅịa.

¹² Oria ọmụḅaraiḅi mị ọ̀ nwọse tịḅị kpokoro nyanaḅịa, ọ̀ pịkị ḅaasa owunima gose, ọkụma anị ọkọ se ḅịrị ọ̀ pịrịma mun-ẹkẹ.

¹³ “Siria amanyanaḅọ ḅe ọ̀ pịkịma mun ḅakatẹịn owuni koḅiriḅịa, ḅakatẹịn ọ̀ tatarị nyana owunima nẹngịapụ. Sịkị mị ḅo gbasịḅịa sịkị ọ̀ kụrọ owuni kpo na pịkịma ḅoḅịa.

¹⁴ Anịsịkị tọn-a tomoni Ijipt amanyanaḅọ ḅe na tụḅụrụḅịa. Pịkị ị́ya sẹ ḅie, Danịẹl, da ḅẹrẹ ḅerenikapụ kọngọ kụrọmaḅịa ini tẹmẹ ḅụ ọrị gbọrịye gose, ọkụma ini ini inumaḅịa.

¹⁵ Anịḅụ Siria amanyanaḅọ ḅe ọ̀ kụrọ opuama mị ḍẹkịkelema se anị kanḅịa. Ijipt owunima ini ḅarị owusọ ẹkẹ; iniaḅụ kụrọtẹịn apụma sọnị ini ḅarị ịnyọ nyana ẹkẹ.

¹⁶ Siria owu koromaḅọ ḅe ori ò ḅietọn ḅara se ini na mịẹḅịa, ori na tụḅụrụḅịa ḅọ ofori-ẹ. Oria kụrọ ḅụ Tamụnọ Ḅe Yeḅereni pịrị Ama mị ḅie chịẹḅịa se kụrọ ḅụ arịmgba nyana ọkịḅịa.

¹⁷ “Siria amanyanaḅọ ḅe ori oria owunima imbo la-ọkụ nwọse owu paka tọnḅịa. Anịsịkị ori na taraka amanyanakiri mị kanḅịaye gose, ori ori na ḅịpị ogbosọ nyanaḅịa se oria tọkụ ma se ọ̀ pịrịḅịa ori árị na simeḅịaye gose; ọkụma ọ̀ tọnye mị kura ẹkẹ.

¹⁸ Anịeso, ọ̀ tọrụ ḅụ ḅọrọ se sẹma gbẹịnmachịẹḅịa se tọn-a sẹ nwọ inumaḅịa. Ọkụma gbọrị igoni ama ḅie ḅo owuni tịḅịnịḅọ ori inumaḅịa se oria ḅụdekichịẹma mị pẹlẹḅịa; kọkọmaye-ẹ Siria amanyanaḅọ ḅe oria ḅụdekichịẹma mị anị pịkịma ḅo ọḅụ sọḅịa.

¹⁹ Amanyanaḅọ ḅe, ò so oria owuni-kụrọ-warị ma munḅịa, ọkụma ọmụ ọ̀ ḅara siḅịa, anị pịkị oria kuluma nwọ sọḅịa.

²⁰ “Jịn amanyanaḅọ ò ḍukomaḅịa, anị ḅo fịrịnwẹngịḅọ se tomonima sẹịnmaḅịaḅọ, mun nweni ma pụnụma inia ḅara amaocho ḅo oria ala mị mịẹsuma ọ̀ pịrịḅịa ẹrẹchị. Ḅọlọka sịkị ḅụ ori amanyanaḅọ ḅe ini ọ̀ ḅaaḅịa, ọkụma nweni nemika ḅaraḅụ pịkị ọmụ ḅiekẹ.”

Siye Mịẹ Siria Amanyanaḅọ Ḅe

²¹ Enjẹlḅọ ḅe pa ḍuko finjima mun aḅẹ: “Jịn ḅoḅịa Siria amanyanaḅọ ḅe siḅọ-ẹ, anị amanyanaḅọ sọ na iḅikaḅọ-ẹ, ọkụma ḅụnemika ḅaraḅụ, ḅo epele se kụrọ ḅara se kụrọ ọkịḅịa.

²² Ori na tụḅụrụḅọ goyegoye, Gele Tamụnọ Agbamịẹḅọ sọnị, ò nụḅọ ọfịnsinḅịa.

²³ Ḅịpị ogbosọ ḍiri gịẹịn ḅụ, ọ̀ ḅọrọ oḅori se jịn sẹ apụ chịnḅịa, se kụrọ ḅụ tọrọkọ tọrọkọ munḅịa, ò boka sẹ da sọnị.

²⁴ Ọ̀ gbọrị ngọ nyana sẹ gbẹịnmachịẹḅịa, tatarị inia ḅerijineka ḅụ, se oria ḅieju-aḍapụma ḅụ gbọrịḅọ sọ ma mịẹkaye ọ̀ nwọ mịẹḅịa. Anịsịkị ò ḅo owu ḅie ini kọrịḅo ayema nwọ ḍiema ò ḍukonwẹngịapụma pịrịḅịa. Ori owuni-kụrọ-warị ma kanḅịa ḅara tọnḅịa, ọkụma ḅọlọ ẹkẹ oria sịkị ḅọrọḅịa.

²⁵ “Ò kuḅie kụrọma opu owuni ogbo pakụmaḅo owu se Ijipt amanyanaḅọ ḅe pakaḅịa, anị ḅụ karakarama opu kụrọ owuni kpo se ori na sọḅịa ḅọ ḅe-ẹ. Ọkụma Ijipt amanyanaḅọ ḅe, ini oḅori se ọ̀ chịnḅịa, anị pịkị ḅịrị ọ̀ pịrị ẹkẹ.

²⁶ Ori na kpekitẹịn se ò tetema tetemapụ ma pịkị ọ̀ ḅịkịmaḅịa. Oria owunima ḅie tọn apụ ḅaaḅụ sọḅịa, pịkị oria owuni kpo mị kansinḅịa.

²⁷ Anịsịkị mama amanyanapụma ini sime se gbọrị dẹbụl ọgọnọ fịye fịḅịa, ọkụma inia kuḅie ma siḅịa, ini pịkị iruo kọn jụmḅọ jụmḅọ pịrịḅịa. Ini ḅiye inia ḅara la-ẹkẹ anịatịḅị anịa sịkị mị ma lakẹ.

²⁸ Siria amanyanaḅọ ḅe ori ọfọịnḅo aye mamgba ò se pịkịma oria ama munḅịa, pa kuḅie kụrọma Tamụnọ-a tomonima tẹkẹ-a mịẹmịẹyema kan mị ḍọkị ḅụ. Ò ḅietọn ḅara ọ̀ nwọ mịẹso sịkị re mị ò so oria ama munḅịaye-ẹ.

²⁹ “Ọḅụkọ so ọ̀ pịkị Ijipt gbẹịnmachịẹḅịa, ọkụma mị sịkị ye kịrị ḅara simeḅịa.

³⁰ Rom apụma onwoin arụ se ḅo ori na tụḅụrụḅịa, ọ̀ ḅala pịkị faḅịa. “Anịsịkị ori ịganị ḅụ vinpịkịḅịa se ḅụkụrọma Tamụnọ-a tomonima tẹkẹ-a mịẹmịẹyema kan ḍọkịḅịa. Tẹkẹ-a mịẹmịẹye mị ḅụ ḅarasinsapụ ma ḅe tetema ọ̀ nwọ ḍukonwẹngịḅịa.

³¹ Oria owunima ḅụ tọn apụ Oputẹkẹwarị mị pụlamaḅịa. Ini eneḅeneḅene mịẹmịẹ agbama kikiḅịa se Ḅalafama Siye mị mịẹ chịẹmaḅịa.

³² Oḅori-se-nweni-chịẹma ḅụ, amanyanaḅọ ḅe ori ineda inia tẹkẹ-a mịẹmịẹyema ḅụ ḅarasinsa apụma ọkị ọḅụ pịrịḅịa, ọkụma Tamụnọ Ḅe ḍukonwẹngịapụma ọ̀ da paka owusọḅịa.

³³ Tomonima ḅụ tọrọkọda-yenemiapụ ma inia nemi se ísíapụma na ḍiaḅịa. Ọkụma kala sịkị ḅụ ini inia ḅụ tọn apụ ḅaaḅịa owu ḅie, anịkanịka ini ini dọkịma ḅaaḅịa, pịkị tọn apụ kun se ikoliapụ mịẹḅịa.

³⁴ Nweni ḅaa mị kiri ọkị àrị sịkị, Tamụnọ-a tomonima ini ḅarachụa kalaye nwọ nyanaḅịa, inia ḅie tọn apụ inia ḅụ iḅi kẹngẹ gose iniaḅie sọmẹ nwọḅẹ sọnị.

³⁵ Tọrọkọda-yenemiapụ ma ḅụ da apụ ḅaa ḅụ sọḅịa, ọkụma mịn mị ẹrẹchị, tomonima ini ini mịẹfịafịamaḅịa. Mị mịẹmịẹye mị simeḅịa ọkịmun kuluma mị ḅoḅịa sịkị mị laḅịa, anị Tamụnọ Ḅe tọn koroma sịkị mị.

³⁶ “Siria amanyanaḅọ ḅe ò ḅietọn ḅara ọ̀ nwọ mịẹḅịa. Ori ọḅụ bomaḅịa na ọ̀ oru goyegoye nẹngịmẹ, Geletẹịn Tamụnọ Ḅe sọ. Ori ineda mị ḅara se yemịẹḅịa ọkịmun Tamụnọ Ḅe fomuḅara se ọ̀ pịrịḅịa sịkị laḅịa. Tamụnọ Ḅe ọ̀ tọn gbasịma ọkụ mị ọ̀ mịẹḅịaye-ẹ.

³⁷ Amanyanaḅọ ḅe ori oria ḅieju-aḍapụma tẹkẹtẹkẹ oru ḅe na, eremeni ma ḅẹlẹma oru ḅe na, se yechịn ẹkẹ. Ò jokoma oru mamgba se yechịn ẹkẹ, anịatịḅị ori ọkịmẹ na ori arịmgba nẹngịmẹ.

³⁸ Anịnakaraka ori osi se owuni-kụrọ-warị oru ḅe pịrịḅịa. Ò goli na seleḅa na yela ḍụparị na jịn yela ḍiepịrịaye na se oria ḅieju-aḍapụma na jenejene tẹkẹka oru ma pịrịḅịa.

³⁹ Oria owuni-a kụrọ warịma mịẹkụrọma ḅụ, jịn sẹ ḅe oru tẹkẹ apụ ọ̀ nwọse fịrị ḅụ chuḅịa. Ori inia tịḅị daḅọ-ẹ ḅara se ori ọkị apụma, ori opu osi se ini pịrịḅịa, pịkị ini se gele kiri ḅụ koromaḅịa, ọ̀ pịkị kiri se ḍie ini pịrịḅịa gbẹịnye ḅaraḅụ.

⁴⁰ “Siria amanyanaḅọ ḅe oria kuluma mị ḅo ọrụtọn sịkị, Ijipt amanyanaḅọ ḅe owu se ọ̀ pakaḅịa, Siria amanyanaḅọ ḅe pịkị oria ịnyọ mgba se ori na bịamaḅịa, oria kporokporoma na, asụnma na, pịkị tọn-a onwoin arụ na. Ori opu mengi seri ḅara se tọn ama gbẹịnmachịẹḅịa.

⁴¹ Ọ̀ pịkị Tamụnọ Ḅe Ḅereni ini pịrị ama mị ḅoju gbẹịnmachịẹḅịa se kịnị ẹndẹ oyiasi fịnjị fịnjị ḅe oyi-a kiri nwọ ḅaa sinḅịa, ọkụma Idọm na, Moab na Amọn ḅụ kọn apụma, ini mangị soḅịa.

⁴² Ọ̀ ma ama mamgba gbẹịnmachịẹso sịkị, Ijipt ḅụ sọ ọ̀ ḅarasin ẹkẹ.

⁴³ Ijipt ḅie ḅọị ngọma, anị goli na seleḅa na yela ngọma na, arịmgba ori ọkị soḅịa. Ò Libya na Sudan na inumaḅịa.

⁴⁴ Anịsịkị ịrụapakapaka anga na ọgọnọju na ḅo-a ḅẹrẹ ọ̀ ḅalafamaḅịa, se ò ḅo siḅara se owusọ lamaḅịa se tọntọn-apụ ḅaaḅịa.

⁴⁵ Ori oria opu amanyanapụ ikowarịma pike-chịẹmaḅịa tọrụ aka na tụndụma na ogboku anị Oputẹkẹwarị mị chịẹ nyọ mị. Ọkụma ọ̀ fịḅịa anị nyọ ḅarachụa ọ̀ pịrịḅọ ofori ḅụ.”