Danịẹl 10 - Kịrịkẹnị Baịbụl

Danịẹl Ḅe Tigirisi Tọrụ Mị Akasịkịḅụ Tẹmẹḅụ Ọrịye

¹ Saịrọs ḅe Pesia mị da tẹrẹ karama kụra mị ḅie, gbọrị oku ini nwọ pufinji Danịẹl ḅe pịrịmẹ, anị ini pịkị Bẹltẹshaza se chịnḅọ ḅe. Oku mị kọkọmaye-ẹ ọkụma anị kaịnḅo mị opuma kụrọmẹ. Tẹmẹ ḅụ mị ini anị pufinji ọ̀ pịrịye-ẹ.

² Anịsịkị ḅụ tẹrẹ-a fẹnị anga à nwọse ngịrị simemẹ.

³ Gbọrị yela fịye sọ à fịkẹ anịkanịka nama sọ à pẹịkẹ, gbọrị iru sọ à ḅukẹ anịkanịka ị̀ tịḅị sọ àrị adalakẹ, ọkịmun tẹrẹ-a fẹnị anga ma ḅọrọ sịkị lamẹ.

⁴ Kụra mị ḅụ tatarị akalụ mị ḅie, si inein-a ḍin fịnjị karama ene mị ḅụ, à chịẹsimemẹ anị opu Tigirisi Tọrụ mị akasịkị ḅụ.

⁵ Àrị ọgọnọju ḍikimẹ se à gbọrịḅọ ọrịmẹ lọkọ ḅụchụaye chụaḅọ, ọ̀ pịkị goli goli ḅiri kunye se ò ḅiri kun waraḅẹ.

⁶ Oria oju yela ḍụparị ḅịa ọkụ ḅịamẹ. Ọ̀ tọrụ so mị wakam ma ḅịa ọkụ se ḅịamẹ, pịkị ọ̀ tọrụmgbọlụma kọrịarị fịnị ḅẹlẹ kịkẹmẹ. Ọ̀ ḅarama na ọ̀ ḅụọma na alapẹlẹka ḅịa ọkụ ḅịamẹ, anịsịkị ọ̀ pụkọ ḅie ḅaka tomoni ogbo pụkọ fie ọkụ fiemẹ.

⁷ Ị̀rị̀ kẹngẹ anị tẹmẹḅụ ọrịye mị ọrịye-ẹ. Ị̀rị̀ na sime apụma gbọrịye sọ ini ọrịkẹ, ọkụma ḅalafa ḅụ ini mangị ḅọịmẹ.

⁸ Ị̀rị̀ ngẹrị anị anị nyọ kpọngọlọma simeye-ẹ se tọrụbuanma tẹmẹḅụ-ọrịye mị ḍiki aḅẹ. Ị̀ ḅụ ịnyọ ḅarị ofori-ẹ, pịkị ị̀ tọrụ ḍinma so ọkụma, gbọrịḅọ sọ ḅarị ị̀ lekiriḅokẹ.

⁹ Àrị ọ̀ pụkọ naa sịkị, à ḅụnemika ḅaraḅụ ḅịkị kirikoro se ị̀ tọrụ se kiri iḅomẹ.

¹⁰ Anịsịkị gbọrị ḅara ị̀ ọlọ sịsẹmamẹ, ị̀ya ojumgba pa geregere aḅẹ.

¹¹ Enjẹlḅọ ḅe nwọse ị̀ ḅẹmẹ, “Danịẹl, Tamụnọ Ḅe ori ị́ ḅẹlẹmamẹ. Sịsẹchịẹ se à mun ḍukoḅịaye ḅeri tokoloma àrị poki. Ini ị̀ se ị́ fịrịmasam.” Ọ̀ mịn mị ḍukoso sịkị, à sịsẹchịẹmẹ ḅụgeregere ḅụ.

¹² Anịsịkị ọ̀ nwọ ḅẹmẹ, “Danịẹl, ḅalafa nyanama. Tamụnọ Ḅe ori ị́ya tẹkẹma naasam, ị́ sakị ị́ ḅụ iderima ene ngịsị, yekaịnḅo ị́ nwọ nyanaḅịa ẹrẹchị. À ḅomẹ ị́ya tẹkẹ mị pẹkẹrẹḅịa ye gose.

¹³ Si-gbọrị-ḍin-fịnjị Pesia amanyanakiri enjẹlḅọ ḅe tọkụ nwọse ị̀ dachịẹmamẹ. Anịsịkị Maịkịẹl, tịḅịnị enjẹlapụma ḅụ gbọrịḅọ ḅe, ḅo ḅarachụa ị̀ pịrịmẹ, anịatịḅị ị̀rị̀ ngẹrị kpọngọlọma Pesia ḅie simemẹ.

¹⁴ À ḅosam, ị́ mịẹmẹ tọrọkọju ị́ya tomonima ḅụ pakaḅịaye na ị́ nwọ kaịnḅoḅịa ọkụ. Mị anị tọrọkọju pakaḅịa tẹmẹḅụ ọrịye-ẹ.”

¹⁵ Ọ̀ mịn mị ḅẹ sịkị, à kiri mị ḍikimẹ, ọkwẹịnka ḅụ.

¹⁶ Anịsịkị tomoniḅọ kịkẹ enjẹlḅọ ḅe, ḅara sụma ị̀ ḅịpịḅọkọ ma lamamẹ. À nwọse ọ̀ ḅẹmẹ, “Ị̀ nyanaḅọ, mị tẹmẹḅụ ọrịye mị ị̀ ḅụ lọkọma so ọkụma, àrị ineda ḅụgeregere mị dachịẹmakẹ.

¹⁷ Ọ̀ nyanaḅọ ḅe tọrọkọ chịẹarị omoniḅọ à nwọ kịkẹmẹ. Nde àrị ineda ọkwẹịn ị́ pịrịḅịa ọkụ? Ịnyọ anịkanịka ọwụ ḅarị ị̀ ḅụ ofori-ẹ.”

¹⁸ Ọ̀ pịkị kapụma ị̀ ọlọmẹ se à ḅo kụrọtẹịnmẹ.

¹⁹ Ọ̀ nwọ ḅẹmẹ, “Tamụnọ Ḅe ori ị́ ḅẹlẹmamẹ, anịẹrẹchị ḅerenima, gbọrịye sọ ị́ ḅụfụkama anịkanịka ị́ ḅalafama.” Ọ̀ mịn mị ḍuko so sịkị, à ḅo jokoma kụrọtẹịnmẹ se nwọ ḅẹmẹ, “Ị̀ nyanaḅọ, ị́ nyana se ḍukoḅịaye mị ḍuko ị̀ pịrị. Ị́ ị̀ mịẹkụrọmatẹịnsam.”

^20-21 Ọ̀ nwọ ḅẹmẹ, “À gose ị́ damaḅoye ị́ nemi? Anị ḅo Karakara ḍiri mị ḅie gịẹịn ayema ḍieḅelema ị́ pịrị gose-ẹ. Mịọkụ à vinpịkị mun Pesia koruarị enjẹlḅọ ḅe na owu sọḅịa. Anị ḅọrọ so, Gris koruarị enjẹlḅọ ḅe pakaḅoḅịa. Ḅarachụa ị̀ pịrịḅịa gbọrịḅọ sọ ofori-ẹ, Maịkịẹl, Izrẹl koruarị enjẹlḅọ ḅe sikima.