Chukusakị 8 - Kịrịkẹnị Baịbụl

Opumengi Mị Ḅe kuluma

¹ Tamụnọ Ḅe ò Noa ḅe se ḅieḅaramakẹ, pịkịna ori na arụ mị ḅie sime nama mamgba na; ọ̀ mịẹ seni fọrụ fiemẹ, se mengi mị sakị iderimamẹ.

² Sẹkiri chuku ḅie mengi nyọnyọḅụ kanpakaḅo nyọma na pịkịna sotọrụḅụ mengi kansara ḅọkọ mamgba na palịmẹ. Ene mị sọnị ḅarị korokẹ,

³ mengi mị sọnị kelekelema iderimamun ḍin-a sọnọmasi oyi fịnjị lamẹ.

⁴ Sọnọma akalụ mị ḅie tẹrẹfasi ḍin ene mị arụ mị Ararat tụndụma ọgọnọ ḅụ gbọrị tụndụ ọgọnọ gbanamẹ.

⁵ Mengi mị pa iderimaḅẹ, se oyi akalụ mị ḅie ngei ene ḅie mị tụndụma tịḅịma pakaye-ẹ.

⁶ Ḍin-a mesi ḅọrọ sịkị Noa ḅe gbọrị pẹlẹḅọkọ nwọ finjimẹ

⁷ se gbọrị kurukịara ọ̀ nwọ fịrịma pakụmamẹ. Ọ̀ ḅarị pịkịmaḅokẹ, ọkụma ò finma finma ḅọrọ nweni mengi mị gbọtụma faso sịkị lamẹ.

⁸ Anịeso Noa ḅe, ọ̀ pịkịna gbọrị okuku fịrịma pakụmamẹ, nwọfa mengi mị iderimasa otuḅo,

⁹ ọkụma mengi mị pa kiri mị mgba gbẹịn ẹrẹchị okuku ḅe, ọ̀ chịẹḅịa nyọ ọ̀ nwọ ọrịkẹ. Anị ọ̀ pịkị fin arụ mị daḅoye-ẹ, se Noa ḅe ḅarasụma ọ̀ da arụ mị ḅie chumẹ.

¹⁰ Ọ̀ pịkịna jịn sọnọma ḍin se korumẹ, seni ọ̀ pịkịna okuku ḅe fịrịma pakụmamẹ.

¹¹ Okuku ḅe saso ḅiri ò ḅosịkị ịwọ oliv ịnyanya ọ̀ ḅịpị omi-ẹ. Anịḅụ Noa ḅe ò nemisam na mengi mị iderimasam.

¹² Ọ̀ pịkịna jịn sọnọma ḍin seni korumẹ, se ọ̀ pịkị okuku ḅe fịrịma pakụmamẹ, mịsịkịḅụ ọ̀ ḅarị pịkịmaḅokẹ.

¹³ Noa ḅe kụra ẹndẹ oyiasi fịnjị na gbọrị kụra nwọ lasịkị, tatarị akalụ mị ḅie ngei ene ḅie, mengi mị sọnị fasosam. Noa ḅe, arụ mị gbẹịn ayema nwọ sinmẹ, ọ̀ nyọ mị ḍikikelemase ọrịmẹ na kiri mị samịnaḅẹ.

¹⁴ Maịn karama akalụ mị ḅie tẹrẹfa ḍin soi ene mị ḅieḅụ kiri mị gbọtụma samịnasosam.

¹⁵ Tamụnọ Ḅe nwọse Noa ḅe ḅẹmẹ,

¹⁶ “Arụ mị ḅie pakaḅo, ị́ tama na, ị́ya owuapụ awọma na, pịkị inia erema na.

¹⁷ Ị́rị́ na arụ mị ḅie sime feni mamgba na, nama mamgba na, pakaḅo mịẹsosịkị àrị yi sẹkiri wasamaḅịa ọkụ.”

¹⁸ Anịḅụ Noa ḅe na, tarọ ma na, oria owuapụ awọma na, pịkịna inia erema na arụ mị ḅie pakaḅomẹ.

¹⁹ Nama mamgba na, fenima na kpokpo ḅụ arịa juaye ḅụ arụ mị ḅie pakaḅomẹ.

Noa Ḅe Agbamịẹmẹ

²⁰ Noa ḅe ori agbamịẹ ẹbẹ nama Nyanaḅọ Ḅe pịrịmẹ; namama na fenima na ḅie fịafịayema ḅie ḅụ gbọrịwu gbọrịwu ọ̀ nwọ ọkị seni agbamịẹ ẹbẹ mị ọgọnọ ḅụ bebema dọkịma agba mịẹmẹ.

²¹ Agba mị onu mị Nyanaḅọ Ḅe ḅieḅẹlẹmamẹ, se ọ̀ nwọ seni ọ̀ ḅụ ḅẹmẹ, “À ḅarị ngịsị worinime seni sẹkiri mị pịrị ẹkẹ tomoniḅọ ḅe mịẹaye gose; à nemimẹ na oria kalasịkị ḅụ ngịsị oria koromama siaye-ẹ. À ḅarị pịkị ngịsị ḍumoaye mamgba ḅaa-ẹkẹ, anị mịọkụ à mịẹsa ḅara mị.

²² Sẹkiri mị sime lasịkị lasịkị, fịaye ḍipi sịkị simeḅịa, àrị soku sịkị pịkị simeḅịa. Sịkịmamgba oḅoku na ọfịrị sịkị na simeḅịa, otoku sịkị na fọngụ sịkị na simeḅịa, pịkịna ḍin na enekaka na simeḅịa.”