Chukusakị 7 - Kịrịkẹnị Baịbụl

Opumengi Mị

¹ Nyanaḅọ Ḅe nwọse Noa ḅe ḅẹmẹ, “Arụ mị ḅie sọmun, ị́ furo mị mgba na ị́rị́ na; àrị ọrịsam na bebe tomonikiri mị ḅie mgba ị́rị́ ngẹrị ngẹrị mị karakaraye mịẹarịye-ẹ.

² Fịafịa namama ḅụ kịrịkịrị ḅụ maịn gbọrịḅụ maịn gbọrịḅụ ḅe sọnọma kiri seni arụ mị ḅie sẹịn, ọkụma fịafịaka kịrịkịrị namama ḅụ maịn gbọrịḅụ kẹngẹ nwọse sẹịn.

³ Fenima sọnị maịn maịn sọnọmakiri nwọ sẹịn kịrịkịrị ḅụ. Mịn mị mịẹsosịkị kịrịkịrị nama na kịrịkịrị-a feni na ḍumo se sẹkiri ḅie yimayima.

⁴ Mịọkụ ọkịmun sọnọma ḍin la ḅịa sịkị, àrị ene fịrịmaḅịa, anị enekaka mesi na ḍin-a mesi na nwọse koroḅịa, mịẹsosịkị à tẹmẹ ḍumo nyanaye mamgba fịfamaḅịa ọkụ.”

⁵ Noa ḅe Nyanaḅọ Ḅe tọn ọ̀ pịrịaye goyegoye ọ̀ pịkị mịẹmẹ.

⁶ Opumengi mị ḅo sẹkiri ḅilema sịkị, Noa ḅe kụra ẹndẹ oyiasi fịnjị ọ̀ nwọ lasam.

⁷ Ori na, tarọ ma na, oria owuapụ awọma na, inia erema na arụ mị ḅie sọmun seni opumengi mị ḅaraḅie pọkọsomẹ.

⁸ Owoi na ịrọrọ na kịrịkịrị nama na feni na, anị se agbamịẹ ḅịa ḅara simeye fịafịaye-o fịafịakaye sọnị,

⁹ Noa ḅe na arụ mị ḅie sọmunmẹ, Tamụnọ Ḅe tọn ḅaraḅụ.

¹⁰ Sọnọma ḍin ma ḅo ḅọrọ sịkị opumengi mị sakị ḅomẹ.

¹¹ Noa ḅe ḅo kụra ẹndẹ oyiasi fịnjị lasịkị, anị maịn karama akalụ mị ḅie tẹrẹfasi ḍin karama ene ḅieḅụ, sẹkiri chuku ḅie mengi sime nyọ goyegoye kansara pakaḅomẹ, soḅie ḅụ palị mengi ḅọkọ mamgba fịnjị saramẹ,

¹² ene mị pịkị sẹkiri ọgọnọ sara enekaka mesi na ḍin-a mesi na lamẹ.

¹³ Anị gbọrị ene ḅie Noa ḅe na tarọ ma na arụ mị ḅie sọmunmẹ, inia tẹrẹ-a owuapụ awọ Shẹm, Ham, pịkị Jafẹtị ḅe na, pịkị inia erema na.

¹⁴ Piri ḅie owoi-a nama na, warị anga nama kịrịkịrịaye, kalaye na opuaye na pịkịna kịrịkịrị feni goyegoye na, ini na sọmunmẹ.

¹⁵ Ḍumo nyanaye goyegoye kịrịkịrịye ḅụ, owoi na ịrọrọ na, Noa ḅe na arụ mị ḅie sọmunmẹ,

¹⁶ anị Tamụnọ Ḅe tọn ḅaraḅụ. Anịsịkị Nyanaḅọ Ḅe ḅọkọ mị palị Noa ḅe pịrịmẹ.

¹⁷ Opumengi mị seri mun ḍin-a mesi lamẹ, mengi mị ḅo opuma ḅakasịkị arụ mị foinmẹ.

¹⁸ Mengi mị ḅo gbun sịkị, arụ mị mengi mị ọgọnọ tẹịnma ḅọrọmẹ.

¹⁹ Mengi mị anị ḅo opuma gbun sịkị geletẹịn tụndụma àrị ḅilemẹ;

²⁰ anị pa seri nweni so ọkụma anị kuḅu-a mesi pembeye seni geletẹịn tụndụma nẹngịmẹ.

²¹ Sẹkiri ḅie ḍumo nyanaye goyegoye fịmẹ—feni goyegoye na, nama goyegoye na, pịkị tomoniḅọ goyegoye na.

²² Sẹkiri mị ḅie ọwụsaraye goyegoye fịmẹ.

²³ Nyanaḅọ Ḅe sẹkiri ḅie ḍumoye goyegoye ọ̀ ḅaafamamẹ—tomoni na, nama na, pịkị feni na. Kọn aye anị Noa ḅe na ori na arụ mị ḅie simeayema na kẹngẹ-ẹ.

²⁴ Mengi mị iderimakẹ ọkịmun ḍin-a sọnọmasi oyi fịnjị lamẹ.