Chukusakị 4 - Kịrịkẹnị Baịbụl

Ken Ḅe Na Ebẹl Ḅe Na

¹ Adam ḅe ọ̀ tarọ ma na gbolomamẹ, seni á furamẹ. Á gbọrị owutọkụ yimẹ, seni á nwọ ḅẹmẹ, “Nyanaḅọ Ḅe ḅarachụa ḅụ, à gbọrị owutọkụ nyanasam.” Anịgose Ken á nwọ seni ọ̀ chịnmẹ.

² Anịeso á pịkịna jịn owutọkụ yimẹ anị Ebẹl ḅe-ẹ. Ebẹl ḅe ori anana ḍikiḍiki ḅọ-ẹ, ọkụma Ken ḅe ozukọrị ḅọ-ẹ.

³ Sịkị kele ḅọrọ sịkị, Ken ḅe oria ozu ḅie ò soku ḅoaye ḅie daye nwọse ḅo ḍiepịrịaye agbamịẹ seni Nyanaḅọ Ḅe pịrịmẹ.

⁴ Ebẹl ḅe sọnị oria ananama ḅie gbọrị anana tatarị yi ayamburama anana tọkụ ọkịpakụmaḅo ḅaa, seni ọ̀ ḅụ ḅẹlẹkịma seni agba mịẹmẹ. Nyanaḅọ Ḅe Ebẹl ḅe na ọ̀ mịẹ agba mị na ò ḅieḅẹlẹmamẹ,

⁵ ọkụma Ken ḅe na oria agba mị na ọ̀ sịkịmẹ, Ken ḅe anị ò ḅụo sọ so ọkụma ḍikiḅụnwọnwọ ḅụ ori ò kuḅie ọlọkẹ.

⁶ Anị Nyanaḅọ Ḅe nwọse Ken ḅe ḅẹye-ẹ, “Cheye gose ị́ ịganị-ao? Cheye gose ị́ tọrụfụrụma-ao?

⁷ Ị́ ḅọrọ iḅiye mịẹ ọkụma, ị́yaye sọnị àrị ọkị ḅịa; ọkụma ị́ ḅụ ọbịka ọkụma, si ị́ya warịḅọkọ ḅọị ị́ koruaḅẹ. Anị ḅẹrẹtọn ị́ pịrị ḅiaḅẹ, ọkụma ọrị na ị́ ḅẹrẹtọn anị pịrịmẹ.”

⁸ Anị Ken ḅe nwọse numbireowu Ebẹl ḅe ḅẹye-ẹ, “Ye wa paka eleogbo mun.” Ini paka eleogbo mun sịkị, Ken ḅe, ò vinpịkị numbireowu ḅe dapaka se ọ̀ ḅaamẹ.

⁹ Nyanaḅọ Ḅe Ken ḅe gbelamẹ, “Ị́ mbire Ebẹl ḅe nde ori?” Ọ̀ nwọ pẹkẹrẹmẹ, “À nemikẹ. Àrị ị̀ mbire ḅe koruḅọ sọḅe?”

¹⁰ Anị Nyanaḅọ Ḅe nwọ ḅẹye-ẹ, “Mịn che opu siye ị́ nwọ mịẹsa? Ị́ mbire ḅe ḅụ pakaḅo pulo mị kiriḅie anị owu pakaḅo ị̀ la aḅẹ, gbẹịn fịye fị owu anị nwọ kọn aḅẹ.

¹¹ Worinime ị́ lasam, mịn kiri mị ḅụ, ị́ pịkị ḅarị anịa ḅie fịrịnwẹngị ẹkẹ. Anị ḅịpị finji ị́ mbire ḅe ḅụ pakaḅo pulo mị ọkị mịnị kiri mị ị́ ḅara ḅụ.

¹² Ị́ fịaye ḍipi ḍọkị ḅịa sịkị, kiri mị gbọrịye sọnị anị pakụmaḅo ẹkẹ, ị́ papa warị nyanakaḅọ ḅara nwọse sẹkiri ḅie gelegele ḅụ nwẹngịma ḅọrọḅịa.”

¹³ Anịḅụ Ken ḅe nwọse Nyanaḅọ Ḅe ḅẹmẹ, “Mị fomuḅara mị opuma ḍụḅa ị̀ nẹngịmẹ, àrị ineda anị da ẹkẹ.

¹⁴ Kiri mị ḅụ na, ị́ tọrụkuḅu na ị́ ị̀ desin aḅẹ, sẹkiri ḅie warị nyanakaḅọ ḅara à nwọse gelegele ḅụ nwẹngịma ḅọrọḅịa, ị̀ ọrịḅọ ọrịḅọ ineda ị̀ ḅaaḅịa.”

¹⁵ Ọkụma Nyanaḅọ Ḅe nwọ pẹkẹrẹmẹ, “Ẹn-ẹn, ị́ ḅaaḅọ goyegoye sowuḅi ḅụ sọnọmapụ ḍumo faḅịa.” Anịẹrẹchị, Nyanaḅọ Ḅe ori elekima seni Ken ḅe ḅụ chụamẹ, seni ọrụḅọḅọ ḅerijinemẹ na ori ọrịḅọ goyegoye ọ̀ ḅaama-ẹ.

¹⁶ Anịḅụ, Ken ḅe Nyanaḅọ Ḅe tọrụkuḅu nwẹngịso mun “Nwẹngịmaḅọrọ” nwọ chịn gbọrị ama ḅie angamẹ, anị Idẹn ḅụ ịrụapakapaka nyọ daọrụ ḅụ.

Ken Furo Ḅie Awọ Ma

¹⁷ Ken ḅe na tarọ ma na gbọrị owutọkụ nwọ yimẹ, ini nwọse ọ̀ chịnmẹ Enọk. Ken ḅe gbọrị opuama ọ̀ nwọ namamẹ, ori anị seni oria tọkụ ḅe korumẹ.

¹⁸ Enọk ḅe Ịrad nwọ chịn gbọrị owutọkụ ọ̀ nwọ yimẹ, ori anị Mẹhujaẹl ḍa-ẹ, Mẹhujaẹl ḅe anị Mẹtushaẹl ḅe yi ye-ẹ, Mẹtushaẹl ḅe anị Lemẹk ḍa ḅe-ẹ.

¹⁹ Lemẹk ḅe mama eremeni ọ̀ nwọ simemẹ, Ada ma na, Zila ma na.

²⁰ Ada ma Jabal ḅe yimẹ, ori anị ikowarịma ḅie anga, se nama kokokokoapụma inia ḅieju ḍaḅọ-ẹ.

²¹ Numbireowu, anị Jubal ḅe-ẹ, ori anị nime chuchuapụ na farịfarịaye na pịkị ọbọ na ye ofurofuroapụma inia ḅieju ḍaḅọ-ẹ.

²² Zila ma Tubal Ken ḅe yimẹ, ori anị alapẹlẹka na ikulele na se kịrịkịrị fịrịnwẹngịaye tẹmẹtẹmẹḅọ-ẹ. Tubal Ken ḅe nụmbụrarọma anị Neama ma-ẹ.

²³ Lemẹk ḅe nwọse oria erema ḅẹmẹ, “Ada na Zila na, ómine ị̀ poki: Gbọrị asẹmẹnị tọkụ à nwọ ḅaasam ò yese ị̀ lamamẹ gose.

²⁴ Ken ḅe tịḅị sowu sọnọmapụ ọkịmẹ ḅẹḅẹ, Ị̀rị̀ Lemẹk ḅe tịḅị sowu tẹrẹfa kịnị-a iniasi anị nwọ ọkị ḅịa.”

Sẹt Ḅe Na Enọs Ḅe Na

²⁵ Adam ḅe na tarọ ma na ini pịkịna jịn owutọkụ yimẹ. Á nwọḅẹmẹ, “Tamụnọ Ḅe Ken ḅe ḅaa Ebẹl ḅe tịḅị ḍinmaḅịa jịn owutọkụ ọ̀ nwọse ị̀ pịrịsam.” Anịẹrẹchị Sẹt á nwọse ọ̀ chịnmẹ.

²⁶ Sẹt ḅe gbọrị owutọkụ yimẹ se ọ̀ nwọse ọ̀ chịnmẹ Enọs. Anịsịkị mị ḅụ anị tomoni sakị Nyanaḅọ Ḅe fịafịa ẹrẹ mị seni ọ̀ tẹkẹye-ẹ.