Chukusakị 34 - Kịrịkẹnị Baịbụl

Kụrọ Ḅarase Daịna Ma Na Ḅụgboloma Mị

¹ Gbọrị ene Daịna Jekọb ḅe na Lia ma na tọkụ ma, mun Kenan eremeni ma ḅụ dapụ la-ẹmunmẹ.

² Shẹkẹm, Hivaịḅọ Hemọ, anịnyọ tịḅịdaḅọ ḅe, tọkụ ḅe, árị ọrị se, kụrọ ḅarase á kun se árị na gbolomamẹ.

³ Ọkụma, ọ̀ tọkụ ma ọrịmẹ se árị ọ̀ ḅụḅẹlẹ-so-ọkụma, ori árị na lekiriamẹ se pịkị ḅụkụrọma árịa ḅẹlẹma mị nyanamẹ.

⁴ Ọ̀ nwọse ḍawu ḅe ḅẹmẹ, “À ḅimẹ ị́ ma eremeni tọkụ ma nyanaḅo ị̀ pịrị se á ḅo ị̀ ta sọ.”

⁵ Jekọb ḅe ḅo naamẹ na ḅarọ ma ini á ḅụgereremasam, ọkụma oria owuapụ awọma ini eleogbo oria ananama nwọ ḍikiḍiki aḅẹ, anịgose gbọrịye sọnị ọ̀ mịẹkẹ ọkịmun ini vinpịkị ḅo sịkị lamẹ.

⁶ Hemọ Shẹkẹm ḍaḅe mị ḅụ mun Jekọb ḅe na ọkwẹịnma sịkị,

⁷ anị pa Jekọb owuapụ awọma nama ḍikiḍiki nyọ ḅụ ḅo warị sọ ọkụ-ẹ. Ini anị naa sịkị, anị inia ḅụosọmẹ pịkị inia ḅụgbiripumamẹ, na Shẹkẹm ḅe nwọ simeye mịẹsam se Izrẹlapụma wọlọmẹ ọ̀ nwọ kụrọ ḅarase Jekọb tọkụ ma na ḅụgbolomaye mị.

⁸ Hemọ ḅe nwọse ọ̀ ḅẹmẹ, “Ị̀ya tọkụ Shẹkẹm ḅe ori ị́ya tọkụ ma na lekiriasam, sisi ye ori á sime.

⁹ Ye wa ḅịpị se ogbosọ nyana, na mịna tomonima na ọ́mịna tomonima na wa eresime gbolomaḅịa.

¹⁰ Anịọkụma ị́ pa mine na mị ama ḅie anga gbolomaḅịa, anịsịkị ị́ ḅụḅẹlẹ anga ḅụḅẹlẹ anga ị́ ineda angaḅịa, tuḅokọn pịkị ye nyanaḅịa, ḅụḅalaḅala oforiḅụ.”

¹¹ Anịsịkị Shẹkẹm ḅe nwọse Daịna ma ḍaḅe na árịa mịnapụma na ḅẹmẹ, “Ọ́ mịn iḅi mị se ị̀ mịẹ, à pịkị ó ḅiye layelaye mịẹ ọ́ pịrịḅịa.

¹² Ó ḅiarị ḍiepịrịye ọ́ nwọ ḍuko ị̀ pịrị, pịkị á tịḅị simeayema, ọ́mịna ḅụḅẹlẹ àrị ḅaka laḅịa ḅara ọ́ nwọ ḍuko, ó ḅiḅịaye layelaye à mịẹ ọ́ pịrịḅịa, ó nemikase pa ḅereni se àrị á simemẹ ḅẹḅẹ.”

¹³ Ọkụma Shẹkẹm ḅe inia nụmbụrarọ Daịna ma ḅụgereremasaye gose, Jekọb owuapụ awọma epele ḅaraḅụ Shẹkẹm ḅe na ḍawu Hemọ ḅe na pẹkẹrẹmẹ.

¹⁴ Ini nwọse ọ̀ ḅẹmẹ, “Wa ḅereni ẹkẹ mịna nụmbụrarọ ma mun ḅụpẹlẹkaḅọ nwọ sime, anị ḅụgereremaye sọ wa pịrịḅịa.

¹⁵ Mịẹse wa ḅereniḅịaye anị ị́ ḅo wa simeọkụ simeḅịa, pịkị ị́ nyana owuapụ mamgba inia ḅụpẹlẹḅịa.

¹⁶ Anịsịkị re mị wa ómine na ere sime gbolomaḅịaye-ẹ. Wa ómine na anga gboloma pịkị gbọrị apụ sọḅịaye-ẹ.

¹⁷ Ọkụma ó nemikase wa ḍuko ayema ḅerenikẹ se ómine ọ́mịna owuapụma ḅụpẹlẹkẹ ḅẹḅẹ wa árị ọkị soḅịa.”

¹⁸ Ma ini ḍukoaye ma, Hemọ ḅe na oria tọkụ Shẹkẹm ḅe na inia ḅụḅẹlẹ ḅara simemẹ,

¹⁹ owutọkụ ḅe ini ḍukoaye ma ọ̀ sịkịfamakẹ àrị mịẹḅụ, anịatịḅị Jekọb ḅa ma na ori na ini lekiriamẹ. Oria furo ḅie ori yesọtẹịnḅọ-ẹ.

²⁰ Hemọ ḅe na yayo Shẹkẹm ḅe na ini mun opuama mị onu ḅọkọ ḅụ ini koḅiria sọsọnyọ lasịkị ini ọkwẹịn inia ama owuapụma pịrịmẹ:

²¹ “Mịna owuapụma ini ikia nemimẹ, ye ini ama mị ḅie mine na anga pịkị nwẹngịgboloma. Ama mị ḍụḅamẹ pịkị ini na lọkọlọkọḅịa. Ye wa inia eremeni awọma sime, pịkị mịna eremeni awọma se ini pịrị ini sime.

²² Ọkụma mịna apụma ini ḅereni se mine na angaḅịa pịkị mine na gbọrị ḅụ simeḅịa, wa nemikase mịna owuapụma ḅụpẹlẹḅịa ọkụma, ini inia owuapụma ḅụpẹlẹ ọkụ mị.

²³ Inia namama na, pịkị ini nyanaye layelaye mịnaye sọẹka? Anịẹrẹchị ó ye wa ḅereni ini mine na anga.”

²⁴ Opuama mị ḅie sime owuapụ mamgba Hemọ ḅe na Shẹkẹm ḅe na ḍukoye mị ḅerenimẹ, owuapụ mamgba ini pịkị inia ḅụpẹlẹmẹ.

²⁵ Tẹrẹ-a ḍin ḅo ḅọrọ sịkị, owuapụma pa inia ḅụpẹlẹ ịrịa mị ḅie simearịogbo, Jekọb ḅe oria mama owuapụ awọ, Simiọnị ḅe na Livaị ḅe na, anị Daịna owuapụ mịnapụma, gbọrị ḅẹrẹsọ ofori pịkị tọrụse kịẹnmaḅịa ḅẹrẹ ofori ḅụ, opuama mị ḅie sọmun, okola-agiji se owuapụ mamgba ḅaamẹ,

²⁶ pịkị Hemọ ḅe na oria tọkụ Shẹkẹm ḅe na. Anịsịkị mị ini mun Shẹkẹm warị ḅie Daịna ma ọkịsoye-ẹ.

²⁷ Ini ini ḅaaso sịkị, Jekọb ḅe oria ísí owuapụ awọma, á tịḅị sowu ḅi gose mun ama mị ọfọịnmẹ, ini inia nụmbụrarọ ma ḅụgereremaye gose.

²⁸ Ini ananama na, nama tọrụ kịrịkịrị ma na, yepụra asụnma na pịkị yelayelaye opuama mị ḅie na eleogbo sime aye mamgba na nwọ dekisomẹ.

²⁹ Ini yelaye mamgba, pịkị eremeni ma na awọmẹnịma na nwọ kunmẹ, pịkị warịma ḅie simeaye mamgba nwọ deki somẹ.

³⁰ Jekọb ḅe nwọse Simiọnị ḅe na Livaị ḅe na ḅẹmẹ, “Ọ́ ḅụfụka ọkịḅo ị̀ pịrịsam; mịọkụ Kenan apụma na Pẹrizaị apụma na, pịkị ama mị ḅie anga jịn apụ na ị̀ ḍiki ḅụnwọnwọḅịa. À tọn-a owuapụ nyanakẹ; ini nemikase gbolomase owu se ị̀ pakaḅịa ọkụma, ini mịna furo mgba nwọ famaḅịa.”

³¹ Ọkụma ini nwọ pẹkẹrẹmẹ, “Wa ḅikẹ ini sẹ fị ḅọ ḅara nwọse mịna nụmbụrarọ ma ọkị.”