Chukusakị 33 - Kịrịkẹnị Baịbụl

Jekọb Ḅe Isọ Ḅe Na Ịrịamẹ

¹ Isọ ḅe oria kịnị ẹndẹ ma na ḅoarị sịkị, Jekọb ḅe ori ini ọrịmẹ, anịgose ori awọmẹnịma ḍiama Lia ma na Rechẹl ma na pịkị mama ịgwa apụma na pịrịmẹ.

² Ịgwa apụma na inia awọma na se tọrọkọ damẹ, anịsịkị Lia ma na árịa awọma na ini ḍukomamẹ, anịḅe kuluma Rechẹl ma na Josẹf ḅe na ọḅụju simemẹ.

³ Jekọb ḅe ori inia tọrọkọ pẹlẹma nwẹngị mun numbireowu ḅe na kpeki sịkị sọnọma sịkị ọ̀ nwọ seni ọ̀ tịḅị tutu ọ̀ fụḅara se kiri lamamẹ.

⁴ Ọkụma Isọ ḅe ọ̀ mangị ò damamun se ori oḅolo pịkị ọ̀ ḅịpị nọnjụmẹ. Ini mama apụ mamgba owugbolomamẹ.

⁵ Isọ ḅe nyọ ḍiki kelema se ò ḅo eremeni ma na awọmẹnịma na ọrị sịkị ò gbelamẹ, “Nwọ ị́rị́ na sime apụma tapụ?” “Sẹnịḅọ, mị Tamụnọ Ḅe iḅimịẹ ḅaraḅụ se ị̀ pịrị awọ ma-ẹ,” Jekọb ḅe nwọ pẹkẹrẹmẹ.

⁶ Anịsịkị re mị ịgwa eremeni ma na inia awọma na ḅo tịḅịtu ọ̀ pịrịye-ẹ;

⁷ anịsịkị Lia ma na árịa awọma na ḅomẹ, anịḅe kuluma Josẹf ḅe na Rechẹl ma na ḅo inia tịḅịtumẹ.

⁸ Isọ ḅe gbelamẹ, “Nde ị̀rị̀ na ịrịa ísí kpo mị kwanị? Anị anị che fie?” Jekọb ḅe nwọ pẹkẹrẹmẹ, “Se ị́ tọrụ iḅi fẹḅịaye gose-ẹ.”

⁹ Ọkụma Isọ ḅe nwọ ḅẹmẹ, “À ḅakama ye nyanamẹ, ị̀ mbire; ị́ nyanaye ma ọlọ.”

¹⁰ Jekọb ḅe nwọ ḅẹmẹ, “Ẹn-ẹn, pasisi, ị́ nemikase ị̀ ọkị mẹ ḅẹḅẹ, ị̀ya ḍiepịrịayema ọkị. Ị́ tọrụ ọrị mị ị̀ ḅụ à Tamụnọ Ḅe tọrụ ọrị ọkụ simemẹ, ị́ nwọ mịọkụ ikiaḅọ ḅara se ị̀ ọkị sasịkị.

¹¹ Sisi à se ị́ pịrị ḍiepịrịayema ọkị; Tamụnọ Ḅe ori iḅi se ị̀ mịẹsam, ọ̀ pịkị ị̀ ḅụpalịmaye layelaye nwọse ị̀ pịrịsam.” Jekọb ḅe ori opuma ọ̀ ḅụfụkamaye gose, ori àrị ọkịmẹ.

¹² Isọ ḅe nwọ ḅẹmẹ, “Ye wa ḅụkarakarama se so. Ị̀rị̀ tatarị munḅịa.”

¹³ Jekọb ḅe nwọ pẹkẹrẹmẹ, “Ị́ nemimẹ na awọmẹnịma inia ḅụ ịnyọ ofori-ẹ, à pịkị ananama na ísí-a nama na, arịa awọma na se ḅiekoromaḅịa. Ini nemikase kụrọma gbọrị ene kẹngẹ sọnị àrị na nwẹngị ọkụma arịmgba fịḅịa.

¹⁴ Sisi, ị́rị́ tọrọkọ tarị mun anịsịkị à deindeinma, namama na awọmẹnịma na, inedaḅịa ḅara nwọse sarama ị́ ḍuko se à ḅo Idọm ḅie ị́ laḅịa.”

¹⁵ Isọ ḅe nwọ ḅẹmẹ, “Anịọkụma ye àrị ị̀ya tomonima ḅụ ḍapụ se koroma ị́ pịrị.” Ọkụma Jekọb ḅe nwọse ọ̀ pẹkẹrẹmẹ, “Ọkọmịẹma, anịatịḅị ị́ya ḅẹlẹma kẹngẹ mị à ḅiarịye-ẹ.”

¹⁶ Anị ḅụ Isọ ḅe anị ene mị ḅụ vinpịkị nwẹngịso Idọm mun mẹ.

¹⁷ Ọkụma Jekọb ḅe ò so Sọkọt mun mẹ, ori anịanga warị nama ọ̀ ḅụ pịrịmẹ, ọ̀ pịkị tịḅịkikima nyọ nama oria namama sọ pịrịmẹ. Anị ini gose Sọkọt nwọse nyọ mị chịnye-ẹ.

¹⁸ Jekọb ḅe Mẹsopotemịa ḅie, ò deinma ḅụ vinpịkị mun Kenan ama ḅie sime opuama Shẹkẹm mị lamẹ, anịanga opuama mị na kpeki gbọrị ele ogbo ori oria ikowarị nwọ namamẹ.

¹⁹ Anị ele mị Hemọ Shẹkẹm ḍaḅe furo ḅie apụ ḅara mị ọ̀ seleḅa pẹkẹrẹ-a sọnọasi se fẹye-ẹ.

²⁰ Anịanga ori agbamịẹ ẹbẹ pike se nwọse anị chịnmẹ El, Izrẹl Tamụnọ Ḅe.