Chukusakị 29 - Kịrịkẹnị Baịbụl

Jekọb Ḅe Ò Leban Warị Lasam

¹ Jekọb ḅe pa oria nwẹngị kọnma mun-arị sịkị, ọ̀ tịḅị chama ịrụapakapaka nyọ damẹ.

² Bẹkẹma ḅaraḅụ ò mun eleogbo sime gbọrị tiḅe nwọ lamẹ tẹrẹ-a anana ogbo ḅọlọlọ anị kelemamẹ. Mị tiḅe mị ḅie pakaḅo mengi anị ini se ma ananama pịrịpịrịye-ẹ, gbọrị opu ḍụparị anịa ḅịpị gbẹịnmẹ.

³ Anana ogbo mamgba ḅo koḅirima sịkị layelaye, àrị ḍikiḍiki apụma ḍụparị mị imbibile sin se mengi se àrị pịrịpịrịmẹ. Anịeso mị ini pịkị ḍụparị mị imbibile mun anịa ḅịpị gbẹịn-gbẹịnye-ẹ.

⁴ Jekọb ḅe ori anana ḍikiḍiki apụma gbelamẹ, “Ị̀ya ikiapụ, nde anga ó ḅo?” “Heran ḅie wa ḅomẹ,” ini nwọ pẹkẹrẹmẹ.

⁵ Ò gbelamẹ, “Leban, Nehọ yaḅe ómine ò nemi?” “Iin wa ò nemimẹ,” ini nwọ pẹkẹrẹmẹ.

⁶ “Ọ̀ ḅụ iḅi wara-ao?” ọ̀ nwọ gbelamẹ. “Ọ̀ ḅụ iḅimẹ,” ini nwọ pẹkẹrẹmẹ. “Ḍiki ḅarọ Rechẹl ma árị oria anana ogboma na ḅoaḅẹ.”

⁷ Jekọb ḅe nwọ ḅẹmẹ, “Ene pa ḅaka wara sịkị, ananama se warị chuḅịa sịkị ma laka sịkị, cheye gose ọ́ ḅarị mengi se àrị pịrị se àrịse àrị osuein fịfị nyọ mị munka?”

⁸ Ini nwọ pẹkẹrẹmẹ, “Wa ineda anị mị mịẹkẹ anana ogbo mamgba mịanga kara sịkị mị wa ḍụparị mị imbibile sinḅịaye-ẹ, anịsịkị re mị wa mengi se anana ogbo mị pịrịḅịaye-ẹ.”

⁹ Jekọb ḅe ọ̀ pa ọkwẹịn ini pịrịarịogbo, mị Rechẹl ma árị anana ogboma na ḅolaye-ẹ.

¹⁰ Jekọb ḅe ò Rechẹl ma na, ori numbireowu sẹnịḅọ Leban ḅe oria ananama na ọrị sịkị, ọ̀ nwẹngị tiḅe mị damamun se ḍụparị mị imbibile sin se mengi seni ananama pịrịmẹ.

¹¹ Ori á ḅịpị nọnjụ se ḅieḅẹlẹ ḅụ oloku se owumẹ.

¹² Ò ḍuko á pịrịmẹ, “Ị̀rị̀ ị́ ḍaḅe mịnaḅọ-ẹ, Ribeka ma yayo-ẹ.” Anị á mangị mun ḍuko ḍawu ḅe pịrịye-ẹ;

¹³ ò ḅo oria mịnaḅọ tọkụ Jekọb ḅe ḅẹrẹ naa sịkị, ọ̀ mangị mun ori na ịrịamẹ, pịkị ori oḅolo se ọ̀ ḅịpị nọnjụmẹ, ọ̀ pịkị ori ọkị warị ḅomẹ. Jekọb ḅe pakaye layelaye ọ̀ nwọ ḍuko Leban ḅe pịrị sosịkị,

¹⁴ Leban ḅe nwọ ḅẹmẹ, “Iin, karakaraye-ẹ, ị́rị́ anị ị̀ ḅụ mịnị na pulo na-ẹ.” Jekọb ḅe, bebe gbọrị akalụ ọ̀ nwọse anịanga simemẹ.

Jekọb Ḅe Rechẹl Ma Na Lia Ma Na Tịḅịgose Ọ̀ Fịrịnwẹngị Leban Ḅe Pịrịmẹ

¹⁵ Leban ḅe nwọse Jekọb ḅe ḅẹmẹ, “Ị́rị́ ị̀ya mịnaḅọ-ẹ nwọḅẹsọ ị́ papa fịrịnwẹngị ị̀ pịrịḅịa ọkụ ofori-ẹ. Ị́ya gbẹịnye ndaye ị́ nwọ ḅi?”

¹⁶ Leban ḅe mama eremeni awọ ọ̀ nwọ nyanamẹ; sẹnịḅọ ma árịa ẹrẹ anị Lia, kalaḅọma ẹrẹ anị Rechẹl.

¹⁷ Lia ma á tọrụmgbọlụma ḅụḅẹlẹmamẹ, ọkụma Rechẹl ma arịmgba á karamakaramamẹ, á ḍiki tọrụgbẹịnmẹ, á pịkị iḅimẹ.

¹⁸ Jekọb ḅe ò Rechẹl ma ḅẹlẹma yegose ọ̀ nwọ ḅẹmẹ, “Sọnọma kụra à nwọse fịrịnwẹngị ị́ pịrịḅịa, ị́ ḅereni ị̀ pịrị se à Rechẹl ma simeḅịa ọkụma.”

¹⁹ Leban ḅe nwọ pẹkẹrẹmẹ, “Àrị á se jụmḅọ pịrị nakaraka ị́rị́ mị àrị á se pịrịḅịaye-ẹ; mịanga ị̀rị̀ na sime.”

²⁰ Jekọb ḅe ò Rechẹl ma nyanaḅịa yegose sọnọma kụra ọ̀ nwọ seni fịrịnwẹngịmẹ, ori á ḅẹlẹma ẹrẹchị, ọ̀ ḅụ enema ḅọlọkẹ.

²¹ Anị Jekọb ḅe nwọse Leban ḅe ḅẹye-ẹ, “Sịkịmị lasam, ye àrị ị́ ndụḅa ma sime.”

²² Anịẹrẹchị Leban ḅe ori ere ya alalị nwọ koromamẹ se ḅẹḅọ ḅẹḅọ chịnmẹ.

²³ Ọkụma anị ḍin mị ḅie ò Rechẹl ma se ọ̀ pịrị nakaraka, Lia ma re mị ori ọkịmun Jekọb ḅe pịrị se, Jekọb ḅe ori árị na gbolomamẹ.

²⁴ (Leban ḅe oria eremeni omoniḅọ Zilpa ma ọ̀ nwọ seni ḅarọ Lia ma pịrịmẹ árịa fịrịnwẹngịḅọ ḅaraḅụ.)

²⁵ Ọkịmun ene ḅa dede ḅie anị Jekọb ḅe ò ḅo nemiye-ẹ na Lia ma árị-ẹ. Ò Leban ḅe damamun se nwọ ḅẹmẹ, “Cheye gose ị́ nwọse ị̀ mịẹ? Rechẹl ma ẹrẹchị à fịrịnwẹngịmẹ. Cheye gose ị́ nwọ sime epelese ị̀ ti?”

²⁶ Leban ḅe nwọ ḅẹmẹ, “Anị mịanga mịẹmịẹyekẹ, sẹnịḅọ ma tọrọkọ pẹlẹma kalatọkụ ma re se owuḅọ pịrị sime mị.

²⁷ Koru ere sime sọnọma ḍin ma ḅe alalị mị kara sịkị la, à Rechẹl ma se ị́ pịrịḅịa, ị́ nemikase jịn sọnọma kụra se pịkị fịrịnwẹngị ị̀ pịrịḅịa ọkụma.”

²⁸ Jekọb ḅe ò ḅerenimẹ, se sọnọma ḍin alalị mị kara sịkị, Leban ḅe ọ̀ ḅarọ Rechẹl ma se tarọ ḅaraḅụ ọ̀ pịrịmẹ.

²⁹ (Leban ḅe oria omoni eremeni tọkụ Bilha ma ọ̀ nwọse ḅarọ Rechẹl ma pịrịmẹ, árịa fịrịnwẹngịḅọ ḅaraḅụ.)

³⁰ Jekọb ḅe ọ̀ pịkị Rechẹl ma na gbolomamẹ, ori á ḅẹlẹmatẹịn Lia ma nẹngịmẹ. Anịsịkị ọ̀ pịkị jịn sọnọma kụra se fịrịnwẹngị Leban ḅe pịrịmẹ.

Jekọb Ḅe Yi Awọ Ma

³¹ Nyanaḅọ Ḅe, ori ọrịmẹ na Jekọb ḅe ò Rechẹl ma ḅẹlẹmatẹịn Lia ma nẹngịmẹ gose, ọ̀ mịẹse Lia ma á furo mị awọ ḅụ lolomẹ, ọkụma Rechẹl ma árị awọ yikẹ.

³² Lia ma á simekọn se gbọrị owutọkụ nwọ yimẹ. Á nwọ ḅẹmẹ, “Nyanaḅọ Ḅe ị̀ya ḅụfụka ma ori ọrịsam, mịọkụ ị̀ deḅe ori ị̀ ḅẹlẹmaḅịa;” anịgose á nwọse tọkụ ḅe chịnmẹ Rubẹnị.

³³ Á pịkị simekọn se jịn owutọkụ nwọ yimẹ. Á nwọ ḅẹmẹ, “Nyanaḅọ Ḅe pịkị ḅe owutọkụ ḅe se ị̀ pịrịsam, anịatịḅị ọ̀ naamẹ na ini ị̀ ḅẹlẹmakẹ;” anịgose á nwọse ọ̀ chịnmẹ Simiọnị.

³⁴ Á pịkị jịn simekọn se jịn owutọkụ yimẹ. Á nwọ ḅẹmẹ, “Mịọkụ ị̀ deḅe ori ị̀ kpekimatẹịnḅịa, anịatịḅị à tẹrẹ-a owuapụ awọ yi ọ̀ pịrịsam;” anịgose á nwọse ọ̀ chịnmẹ Livaị.

³⁵ Anịsịkị á pịkị jịn simekọn se pịkị jịn owutọkụ yimẹ. Á nwọ ḅẹmẹ, “Mịọkụ àrị ị̀ Nyanaḅọ Ḅe tokoniḅịa;” anịgose à nwọse ọ̀ chịnmẹ Juda. Anịsịkị re mị árịa awọ yimị ḅo dachịẹye-ẹ.