Chukusakị 26 - Kịrịkẹnị Baịbụl

Aịzịk Ḅe Gira Ḅie Ḅụ Angamẹ

¹ Jịn ḅuruḅaa ḅomẹ, tatarị Ebraham ḅe sịkị ḅụ ḅo ḅuruḅaa mị sikima ọkụma. Aịzịk ḅe, ò Gira ḅie Filistia amanyanaḅọ Abimẹlẹk ḅe damamunmẹ.

² Nyanaḅọ Ḅe, ọ̀ ḅụse Aịzịk ḅe ḍiese nwọ ḅẹmẹ, “Ijipt mị munma, mị ama mị ḅie sime, àrị ị́ ḅe na sime nwọ ḅẹ nyọ mị.

³ Mịanga anga, à pịkị ị́rị́ na simeḅịa, se pịkị ị́ ḅẹlẹmaḅịa. Nyọ mị mgba à se ị́rị́ na ị́ furo ḅie pakaḅoḅịa apụma na pịrịḅịa. À ḅereni ị́ ḍa Ebraham ḅe pịrị yemị à nwọ mịẹ ḅeinmaḅịa.

⁴ Sotọrụ sime loliama ḅaka ọkụ ḅaka apụ à nwọse ị́ pịrịḅịa, à pịkị mị bebe nyọ mị mgba se ini pịrịḅịa. Sẹ mamgba ị̀ ḅẹḅịa na à nwọ ị́ furo ḅie pakaḅo-apụ ma ḅẹlẹma ọkụ nwọse ini ḅẹlẹma.

⁵ Àrị ị́ ḅẹlẹmaḅịa, anịatịḅị Ebraham ḅe ori ị̀ ḅịpị poki pịkị ị̀ya oloko mamgba kokokokomẹ, pịkị à tọn aye mamgba mịẹmẹ.”

⁶ Anị gose Aịzịk ḅe ò Gira ḅie angamẹ.

⁷ Anịanga sime owuapụma tarọ ma ḅụye nwọse ò gbela sịkị, ọ̀ nwọ ḅẹmẹ na árị nụmbụrarọ-ẹ. Árị tarọ-ẹ nwọ ḅe yemị ò ḅerenikẹ, anịatịḅị ọ̀ ḅalafamẹ na anịanga sime owuapụma ini ọ̀ ḅaaḅịa se Ribeka ma ọkịḅịa ẹrẹchị, anịatịḅị árị opuma ḍikitọrụgbẹịnmẹ.

⁸ Aịzịk ḅe ori anịanga sime se sịkị kele ḅọrọ sịkị, Amanyanaḅọ Abimẹlẹk ḅe oria pẹlẹḅọkọ ḅie tọrụ toluma kiri ḍiki ọkụma, Aịzịk ḅe na Ribeka ma na ḅẹlẹma ti kọn aḅẹ.

⁹ Abimẹlẹk ḅe Aịzịk ḅe chịn se nwọ ḅẹmẹ, “Sembe árị ị́ ta-ẹ! Cheye gose ị́ nwọ ḅe na árị ị́ mbụra-ẹ?” Ọ̀ nwọ pẹkẹrẹmẹ, “À nwọ chịnmẹ ini ị̀ ḅaaḅịa, à nemikase ḅẹ na árị ị̀ ta-ẹ ḅẹ ọkụma.”

¹⁰ “Mị cheye ị́ nwọse wa mịẹ?” Abimẹlẹk ḅe ọkọ ḅẹmẹ. “Ị̀ya owuapụma ḅie gbọrịḅọ ineda nemika ḅara ḅụ ị́ ta ma na gbolomaḅịa, anịsịkị anị ḅẹrẹḅarasi mị ị́rị́ mịẹmẹ.”

¹¹ Abimẹlẹk ḅe ori oria tomoni mamgba ḅeri jine se nwọ ḅẹmẹ, “Siḅara se ḅeḅọ ḅe anịkanịka tarọ ma na angaḅọ goyegoye ini nụḅọ ḅaaḅịa.”

¹² Aịzịk ḅe anị kiri mị ḅie ò ye ḍipimẹ se anị kụra mị ḅie ò ḍipiye la-ọkụ la-ọkụ ḅe kiri-a sọnọasi ọ̀ nwọ sokumẹ, anịatịḅị Nyanaḅọ Ḅe ori ọ̀ ḅẹlẹmamẹ.

¹³ Ye ori na lọkọlọkọ ḅụ ọ̀ dachịẹ nyanakẹ ọkịmun ò ḅo opu ngọ kọnḅọ nwọ sọmẹ.

¹⁴ Anịatịḅị ọ̀ tọntọn-a anana ogbo na, tọrụ kịrịkịrị nama na pịkị fịrịnwẹngịapụ na nwọ nyanamẹ, Filistia apụma ini ò ḍiki pụkọsolimẹ.

¹⁵ Anịgose tiḅe mamgba ini pụnmamẹ anị ḍawu, Ebraham ḅe oria fịrịnwẹngịapụma, ò ḍumo sịkị soku ayema.

¹⁶ Anịsịkị Abimẹlẹk ḅe nwọse Aịzịk ḅe ḅẹmẹ, “Mịna sẹ ḅie so. Ị́ opuma kụrọ wa nẹngịsam.”

¹⁷ Anịgose Aịzịk ḅe ò somẹ se mun Gira Pẹsịkiri mị ḅie oria ikowarị mị pike anga se kele anịanga simemẹ.

¹⁸ Ebraham ḅe ò ḍumo sịkị ḅụ soku tiḅe ma, se ọ̀ fịḅọrọso se Filistia apụma pụnma ayema, Aịzịk ḅe pịkịna àrị sokumẹ. Aịzịk ḅe ḍawu ḅe se tiḅe ma chịn gbọrị ẹrẹ ma mị ò seni àrị chịnye-ẹ.

¹⁹ Aịzịk ḅe oria fịrịnwẹngịapụma pẹsịkiri mị ḅie ini tiḅe sokumẹ, se mengi pakaḅomẹ.

²⁰ Gira mị ḅie anana koruapụma ini Aịzịk ḅe oria anana koruapụma na kamụ sọmẹ se nwọ ḅẹmẹ, “Mị mịna mengi-ẹ.” Anịgose Aịzịk ḅe nwọse tiḅe mị chịnmẹ “Kamụ.”

²¹ Aịzịk fịrịnwẹngịapụma ini jịn tiḅe sokumẹ, anị mị sọnị anị kamụ dekiḅoḅomẹ anịgose ọ̀ nwọse anị chịnmẹ, “Taraka.”

²² Ori anịanga ḅụsikima se jịn tiḅe sokumẹ. Mịn mị ḅụ ịgbanịaye ofori-ẹ anịgose ọ̀ nwọse anị chịnmẹ, “Ḅụḅalaḅala Ofori-ẹ.” Ọ̀ nwọ ḅẹmẹ, “Mịọkụ anị Nyanaḅọ Ḅe, ḅụḅalaḅala oforiḅụ ò ḅereni wa pịrịsaye-ẹ, na wa mị ama ḅie anga-ẹ, mịanga wa pịkị lọkọlọkọ nyanaḅịa.”

²³ Aịzịk ḅe ò so Biashiba mun mẹ.

²⁴ Anị ḍin mị ḅie Nyanaḅọ Ḅe ọ̀ ḅụ se ò ḍiemẹ se nwọ ḅẹmẹ, “Ị̀rị̀ anị ị́ ḍa Ebraham Tamụnọ Ḅe-ẹ. Ḅalafama; àrị ị́rị́ na omi-ẹ. Àrị ị́ ḅẹlẹmaḅịa, à pịkị tọn-a awọ se ị́ pịrịḅịa, ị́ furo ḅie pakaḅoḅịa apụ anịatịḅị à ḅereni ị̀ya fịrịnwẹngịḅọ Ebraham ḅe pịrịye mị ẹrẹchị.”

²⁵ Aịzịk ḅe ori anịanga agbamịẹ ẹbẹ pike se Nyanaḅọ Ḅe tẹkẹtẹkẹmẹ. Anịsịkị ọ̀ pịkị oria ikowarị mị nwọ pike chịẹmamẹ anị nyọ, se oria fịrịnwẹngịapụma ini pịkị jịn tiḅe sokumẹ.

Aịzịk Ḅe Na Abimẹlẹk Ḅe Na Nyana Ḅịpịogbosọ

²⁶ Abimẹlẹk ḅe na ò tetema-tetemaḅọ Ahuzat ḅe na pịkị oria ọmụogbo tịḅịnịḅọ Fịkọl ḅe na Gira ḅie ḅụ so mun Aịzịk ḅe ḍiki-emunmẹ.

²⁷ Aịzịk ḅe nwọse ini gbelamẹ, “Cheye gose mịọkụ ó ḅo ị̀ ḍiki-eḅo, ómine ikiaḅara se ị̀ ọkịka yegose àrị ọ́mịna sẹ wẹrịsoka?”

²⁸ Ini nwọ pẹkẹrẹmẹ, “Mịọkụ anị wa nemiye-ẹ na Nyanaḅọ Ḅe ori ị́rị́ na omi-ẹ, wa ḅimẹ na ị́rị́ na mine na ogboku iḅi ḅịpịogbosọ sime. Wa ḅimẹ na ị́ ḅereni

²⁹ na ị́ yese wa lama-ẹkẹ, mine sọnị pịkị yese ị́ lamaka ọkụ mị. Wa iḅiọkụ se ị́rị́ na angamẹ, wa mịẹmẹ dein ḅụ ị́ somẹ. Mịọkụ anị ḍiepakụmamẹ na Nyanaḅọ Ḅe ori ị́ ḅẹlẹmasam.”

³⁰ Aịzịk ḅe ọ̀ fịye chụọ ini pịrịmẹ, se ini fị pịkị ḅumẹ.

³¹ Eneḅa dedeḅie, ḅọḅọ ye ḅerenimẹ, se yekarịfị nụḅọ ḅereniye ma mịẹkụrọmamẹ. Aịzịk ḅe ḅaḅa se ini ḅẹmẹ, se ikiapụ ḅaraḅụ ini somẹ.

³² Anị ene mị Aịzịk ḅe oria fịrịnwẹngịapụma ini soku tiḅe ḅẹrẹ mị ḅo nwọ ḍuko ọ̀ pịrịye-ẹ. Ini nwọ ḅẹmẹ, “Wa mengi ọrịsam.”

³³ Ọ̀ nwọse tiḅe mị chịnmẹ, “Ọḅọkụ.” Mị anị Biashiba opuama mị anịa ẹrẹ nyanaḅo ọkụ-ẹ.

Isọ Ḅe Sime Jịn Sẹ Eremeni Ma

³⁴ Isọ ḅe ọ̀ kụra mesi nwọ lasịkị Hitaị mama eremeni ọ̀ nwọ simemẹ. Judịt, Beraị ḅa ma na pịkị Basemat Ilọn ḅa ma na.

³⁵ Mịn mị anị ḅakama ḅụḅalaḅala se Aịzịk ḅe na Ribeka ma na pịrịmẹ.