Chukusakị 22 - Kịrịkẹnị Baịbụl

Tamụnọ Ḅe Tọn Ebraham Ḅe Pịrịmẹ Na Ori Aịzịk Ḅe Se Agbamịẹ

¹ Anịeso Tamụnọ Ḅe Ebraham ḅe ḍaḍikimẹ, ori ọ̀ chịnmẹ, “Ebraham!” Se Ebraham ḅe nwọ pẹkẹrẹmẹ, “Aan, mị ị̀rị̀-ẹ!”

² “Ị́ya tọkụ ḅe ọkị,” Tamụnọ Ḅe ọkọ ḅẹmẹ, “ị́ya ngẹrị tọkụ, Aịzịk ḅe, ị́ opuma ḅẹlẹma ḅọḅe se Moraya ama mị mun. Anịanga à se ị́ ḍieḅịa gbọrị tụndụ ọgọnọ, ò seni agbamịẹ ị̀ pịrị.”

³ Anị eneḅa, dedeḅie, Ebraham ḅe ò se agba mị mịẹḅịa fịnị nwọ pẹlẹye-ẹ, ori àrị seni oria yepụra asụn ḅe ọgọnọ gbana se, pịkị Aịzịk ḅe na mama fịrịnwẹngịapụ na nwọ ọkị ọ̀ ḅụchụamẹ. Se Tamụnọ Ḅe go ọ̀ pịrị nyọ mị sakị nwọ mun ye-ẹ.

⁴ Tẹrẹ-a ḍin karama ene Ebraham ḅe sasaju nyọ mị ọrịmẹ.

⁵ Anị ọ̀ nwọse fịrịnwẹngịapụma ḅẹye-ẹ, “Ómine na yepụra asụn ḅe na ọ́ mịanga sime. Tọkụ ḅe na ị̀rị̀ na wa saḅamun anịanga tẹkẹḅịa anịsịkị wa pịkịma ọ́ damaḅoḅịa.”

⁶ Ebraham ḅe ò se agbamịẹḅịa fịnị mị nwọse Aịzịk ḅe pịrịse ọ̀ pụramẹ, anịsịkị gbọrị agiji na ò se fịnị mị tọnọḅịa binka anyịmgbọlụ ma na ọ̀ nwọ dekimẹ. Ini nwẹngị mun-arị sịkị,

⁷ Aịzịk ḅe nwọ ḅẹmẹ, “Ḍaḍa!” Ọ̀ pẹkẹrẹmẹ, “Aan, ị̀ya tọkụ?” Aịzịk ḅe nwọ gbelamẹ, “Àrị ọrịaḅẹ anyịmgbọlụ ma na pịkị fịnị na ị́ ḅara omi-ẹ, ọkụma nde ị́ se agbamịẹḅịa ayamburama anana ḅe?”

⁸ Ebraham ḅe nwọ pẹkẹrẹmẹ, “Tamụnọ Ḅe ọ̀ ḅarana gbọrịwu nwọ pakụmaḅoḅịa.” Ini mama apụma, ini pa nwẹngịma mun aḅẹ.

⁹ Iniḅo Tamụnọ Ḅe ḍuko ọ̀ pịrị nyọ mị lasịkị, Ebraham ḅe gbọrị agbamịẹ ẹbẹ nwọ pikemẹ se ori anị ọgọnọ fịnị ma se ọrụ tọntọn koromamẹ. Ori oria tọkụ Aịzịk ḅe fịna se ò se agbamịẹ ẹbẹ mị ọgọnọ gbanamẹ.

¹⁰ Anị ori ọ̀ ḅaaḅịa ẹrẹchị ori agiji mị dekichịẹmaye-ẹ.

¹¹ Ọkụma Nyanaḅọ Ḅe enjẹlḅọ soḅie wẹrị ọ̀ chịn olokumẹ, “Ebraham, Ebraham!” Ọ̀ pẹkẹrẹmẹ, “Aan, mị ị̀rị̀-ẹ.”

¹² “Yese tọkụ ḅe lamama pịkị gbọrịye sọ se ọ̀ mịẹma,” ọ̀ nwọ ḅẹmẹ. “Mịọkụ mị à nemiye-ẹ na ị́ Tamụnọ osi pịkịna ọ̀ ḅịpị pokimẹ; anịatịḅị ị́ya ngẹrị tọkụ ḅe se ị̀ pịrị mị ḅụ ị́ ọlọchịẹmakẹ.”

¹³ Ebraham ḅe ọ̀ nyọ mị ḍikikelema se gbọrị ajirima nwọ ọrịmẹ, ọ̀ tịḅị ịvalị ma piri ḅie sụka waraḅẹ. Ò mun ori ọkị se ò se oria tọkụ ḅe tịḅịḍinma se dọkịma agba mị mịẹmẹ.

¹⁴ Ebraham ḅe nwọse anịanga mị chịnmẹ, Jehova Jire; na “Nyanaḅọ Ḅe Pịrịmẹ.” Mịmgba sọnị tomoni pa “Nyanaḅọ Ḅe oria tụndụ ọgọnọ ḅẹaḅẹ na ori mị pịrịpịrịye-ẹ.”

¹⁵ Nyanaḅọ Ḅe oria enjẹlḅọ soḅie maịn-karama sịkị se Ebraham ḅe chịnmẹ,

¹⁶ “Ị̀ya ẹrẹḅụ à yekarịfị se yeḅerenisam, Nyanaḅọ Ḅe nwọ ḅẹmẹ, à ḅakama yela ḅarase ị́ ḅẹlẹmaḅịa. Anịatịḅị ị́ mịn mị mịẹye gose, pịkị ị̀ ḅụ ị́ya ngẹrị tọkụ ḅe ị́ nwọse ọḅụdakaye gose,

¹⁷ à ḅereni na à mịẹḅịa ị́ ḅụ pakaḅoḅịa apụma ini sotọrụ sime lolia ma ḅaka ọkụ ḅakaḅịa pịkị tọrụ aka sime onwun mgbọlụma ḅaka ọkụ ḅakaḅịa. Ị́ furo ḅie pakaḅoḅịa apụma ini ini na taraka apụma ḅụ ọmụḅaraiḅi nyanaḅịa.

¹⁸ Sẹ mamgba ḅẹḅịa àrị ị́ furo ḅie pakaḅo apụma ḅẹlẹma ọkụ nwọse ini ḅẹlẹma—arịmgba anịatịḅị à tọn ị́ pịrịye ị́ nwọ mịẹmẹ.”

¹⁹ Ebraham ḅe ò vinpịkị oria fịrịnwẹngịapụma damamunmẹ se ini gbọrị ḅụọḅụ so Biashiba anị Ebraham ḅe ori anga nyọ mị mun mẹ.

Nehọ Ḅe Furo Ḅie Apụ Ma

²⁰ Ọḅụkọ, sịkịḅo kele ḅọrọ sịkị Ebraham ḅe ò ḅo naamẹ na Milka ma nine awọ á nwọ yi numbireowu Nehọ ḅe pịrịsam:

²¹ Ọz anị ini tarị yiḅọ ḅe-ẹ, Bọz ḅe numbireowu-ẹ, Kẹmuẹl ḅe anị Eram ḍa-ẹ,

²² Kisẹd ḅe na, Hezọ ḅe na, Pildash ḅe na, Jidlaf ḅe na pịkị Bẹtuẹl ḅe na,

²³ Ribeka ma ḍaḅe: Milka ma mịna nine-a owuapụ awọma yi Nehọ ḅe pịrịmẹ, Ebraham mịnaḅọ ḅe.

²⁴ Reuma, Nehọ ịgwa eremeniḅọ ma, Tiba ḅe na, Geham ḅe na, Tehash ḅe na pịkị Meaka ḅe na yimẹ.